‘Ez ginen atzera egiteko jaio. Faxismoaren aurka, feminismoa’ lelopean kaleak hartzeko deia egin du Euskal Herriko Mugimendu Feministak. Busturialdeko txoko guztietan ere aldarriz beteko dituzte kaleak.


Bermeoko Udalak informazio panel berezi bi ipini ditu herrian herritarrek euren oharrak, eskaintzak edo bestelakoak ipini ahal izateko. Paneletako bat Atalde kalean dago, bestea, barriz, Lamera parkean. Horien helburua herritarrek beraien eskaintzak he...

Busturiko Udalak lehenengoz antolatuko duen bigarren eskuko azokan parte hartu gura duten horiek aurretiaz izena emon beharko dute, «aurreikuspenak egin ahal izateko», azaldu du Ziortza Bilbao udaleko kultura zinegotziak. Eguaztena izango da izena emoteko azken eguna eta Altamira auzoko liburutegira hurbildu beharko da horretarako. Datorren domekan izango da bigarren eskuko azoka Altamira auzoko plazan, hain zuzen be. «Krisi garaia dela eta, gauza birziklatuei garrantzia emon asmoz erabaki dugu horrelako merkatu bat antolatzea» dio Bilbaok. Irtenbidea erabilitako gauzei Busturiko Udaleko kultura zinegotziak azaldutakoaren arabera, «herritarrei aukera emon gura diegu jadanik erabiltzen ez dituzten gauzei irtenbidea emoten, izan be, batek erabiltzen ez duen zerbait beste batek erabil dezake». Horregatik, bigarren eskuko merkatuan denetarik ipini ahalko dela jakinarazi du Bilbaok, arropak, oinetakoak, jostailuak, liburuak… «bakoitzaren araberakoa». Hasieran trukea erabiltzea pentsatu zutela azaldu du, «baina uste dugu aproposagoa izango dela bakoitzak bere prezioa ezartzea, gauza batzuen balioa handiagoa izan daitekeelako». Azokan parte hartuko dutenek, domekan, 09:30ak 10:00ak inguruan batzeko asmoa dutela agertu du kultura zinegotziak «gauzak apur bat prestatzeko».

Casablanca (Aragoi; Espainia) lider bezala heldu zen Gernika-Lumora, baina ez zen lider bezala joan etxera. Partida orekatu baten, Gernika KESBeko neskek garaipena Malosten geratzea lortu zuten, eta bide batez, bigarren partida irabazi zuten jarraian. Hala, liderraren kontra ezustekoa emonez, jeitsiera postuetatik aldenduta jarraitzen du KESBek. Azken sailkatua, halanda be, partida bakarrera dute bertokoek. Casablancaren kontrako partida oso orekatua izan zen hasieratik. Bi taldeek maila edarra emon zuten, eta lau puntuko aldeagatik erabaki zen norgehaigoka. Defentsako jokoan oinarrituta, liderra estu hartzea lortu zuten bertokoek. Lehenengo laurdenean, esaterako, bost puntuko errenta lortu zuten gernikarrek, eta bigarren eta hirugarren laurdenetan aldea handitzen jarraitu zuten pauso txikiak emonez. Hala, hirugarren laurdenaren amaieran zortzi puntuko aldea zuten KESBeko neskek. Laugarren laurdenean, errenta mantentzen ahalegindu ziren bertokoak, baina zenbait arazo izan zituzten, Aragoiko jokalariei eusteko. Hala, Casablancak aldea jatea lortu zuen, baina partidari buelta emon barik. Amaieran 67-63ko emaitza islatzen zuen markagailuak. Tyniiki Crook izan zen partidako onena gernikarren artean, 17 puntuko balorazioa jasota. Hain zuzen, 13 puntu lortu zituen, eta sei errebote hartu zituen. Izaskun Garciaren (hamabi puntu) eta Evelina Gunevaren (hamaika puntu) laguntza be ezinbestekoa izan zen garaipena etxean geratzeko.

Europako errugbiaren jaia Gernika Lumora bueltatuko da asteburuan, Amlin Challenge txapelketagaz. Basurdeek Rovigo talde italiarraren kontra jokatuko dute multzoko hirugarren jardunaldia, Europan lehenengo garaipena lortzeko helburuagaz. Oscar Astarloa Bizkaia Gernikaren bigarren entrenatzaileak azaldu duenez, “zaleei poztasun bat emon gura diegu, goi mailako talde bat menpean hartuta”. Zapatuan, hilaren 8a, jokatuko dute partida, 16:00etatik aurrera. Partida irabaztea, halanda be, ez da erraza izango. Rovigo talde profesional bat da, eta horrenbestez, basurdeek “partida bikaina”jokatu beharko dute garaipena etxean geratzeko. Azkenaldian maila edarra emon dutela argudiatuta, baikor azaldu da Astarloa. “Defentsa ona eginez gero, eta hegaleko jokoan asmatuz gero, irabazteko aukera izango dugu” dio. Zelaiaren egoera be, alde izango dutela uste du bigarren entrenatzaileak. Azkenaldian euri asko egin duela eta, zelaia basaz beteko dela deritzo; eta hala gertatuz gero, gernikarren mesedetan izango dela uste du. Astarloak azaldu duenez, “ohituta” daude egoera horietan jokatzera.

Udaletxea abadetxera lekualdetzea posible egingo duen beste zenbait lan hasi ditu Muruetako Udalak, hau da, bigarren faseari ekin diote. Oraingo honetan igeltserotza, iturgintza, errementaritza eta elektrizitate lanak egingo dituztela jakinarazi du Muruetako alkate Jabier Ondarzak. Abadetxea udaletxe bihurtzeko bigarren faseko lanak asteon hasi dira eta horiek egiteko 110.000 euroko aurrekontua dauka udalak. «Diruak neurtuta erabilitako aurrekontua da, diruak neurtuz ibili behar dugulako», adierazi du alkateak. Gauzak «itsu-itsuan» egin gura ez dituztela eta, «lehentasuna duten beste zenbait beharrizan egonez gero, lanok gelditzeko prest egongo litzatekeela» aipatu du Ondarzak. Aurrekontua apala dela dio baina «aurrerapauso bat emongo dugu». Asteon hasitako lanak bost hilabetetan amaitzea aurreikusi dute, maiatzeko San Isidro jaietarako, hain zuzen. Halanda be, oraindik nahikotsu lan egin beharko dituzte udaletxea bertara lekualdatzeko: igeltsu eta arotzeri lanak, besteak beste. «Gizarteak bizi duen egoerara moldatu behar izan gara eta ahal dugun heinean egingo ditugu falta diren lanak. Dirua neurtu egin behar da eta ondo kudeatu, harrokeri barik», dio.

Gernika-Lumoko herritarrek ez dute aspertzeko betarik izango hil honetan; izan be, Bakearen Museoak hainbat ekintza antolatu ditu hil hasieratik bukaerara arte. Giza Eskubideen egunerako eta Gabonetarako, bisita gidatuak, antzezlanen aurkezpenak, tai...

Gernika KESBeko neskek partida zaila jokatu beharko dute, asteburuan. Hain zuzen, Casablanca liderraren kontra lehiatuko dira bertokoak, Malosten. Joan den liga jardunaldian denboraldiko bigarren partida irabazita, gernikarrek sailkapenaren behekaldetik egin zuten ihes. Hala, bolada onari jarraipena emoten ahaleginduko dira KESBekoak, zapatuan. Mario Lopez entrenatzaileak azaldu duenez, Maloste jendez gainezka egotea gura dute, 18:30etik aurrera. Izan be, zaleen babespean ezustekoa emoteko aukera izango dutela deritzo entrenatzaileak. Bi partida irabazita, Gernika KESBek nahiko hurbil dauka jeitsiera postua, eta horrenbestez, garaipena extean geratzea oso garrantzitsua izango litzateke. Hain zuzen Las Rozas da azken sailkatua partida bakarra irabazita. Gernikarrak, bestalde, sailkapeneko bederatzigarren postuan daude.

Joan den astean komunikabide batek argitaratutako albistea gezurtatu du Gernika-Lumoko Jai Batzordeak, Andra Mari eta San Roke jaietako egitarauaren liburuxkekin iruzur fiskalik ez dela egin argudiatuz. Jai Batzordeak azaldu duenez, liburuxkarako publizitatea saltzerako orduan, “funtzionamendua zuzena» izan dela eta “dena legezkoa” dela esan du. Bada, komunikabide hark argitaratutakoa “interes politikoek bultzatutakoa” izan dela nabarmendu du. Joan den barikuan piztu zen polemika, azaroaren 30ean, hedabide batek gaia orrialde osora eroan zuenean. Albisteak zioenez, Gernika-Lumoko Udalak ustezko delitu fiskal bat egitera bultzatu ahal izan zituen herriko merkatariak, Jai zinegotziak liburuxketako publizitatea BEZik barik ordaintzeko aukera eman baitzien. Gainera, komunikabide haren arabera, Bilduko zinegotziak idatziz helarazi zien proposamena enpresari autonomoei, Jai zinegotziak berak sinatuta eta Gernika-Lumoko Udalaren zigiluagaz. Zapatuan, aldiz, Bizkaiko Ogasun Sailak udalaren jardunbidea ikertuko duela argitaratu zuen egunkari berak. Horren aurrean, Jai Batzordeak “haserrea” adierazi du, bere iritziz, “falta fiskaltzat mozorrotuta, jaietako kudeaketa” baitago muinean. Azaldu duenez, jaien antolakuntzan parte hartzen duen kultur talde batek gestionatu du aurten liburuxkaren osaketa, eta kultur taldearen izaeragatik, komertzianteei eta gizarte eragileei jarduerak zein liburuxka bera finantzatzeko egiten dieten ekarpen ekonomikoak “ez du zertan BEZa eduki behar, baina komertzianteek hala eskatuta luzatu ditzake fakturak eta gero dagokion lekuan kontu eman”. Hori horrela, funtzionamendua zuzena izan [...]

Ikastetxe desberdinen arteko elkarlana bultzatzen duen Comenius programan parte hartzen ari dira Bermeoko Sagrado Corazon ikastetxeko D.B.Hko 2. eta 3. mailako ikasleak. Friendship Olympics proiektua garatu beharko dute ikasleek ikasturte honetan eta hurrengoan. Turkiako, Poloniako eta Bulgariako ikastetxeekin parte hartzen ari dira eta dagoeneko egin dute lehenengo bidaia Turkiara. Ikasturte bitan Friendships Olympics proiektua gauzatu beharko dute, hau da, Joko Olimpikoen inguruan lan egin beharko dute. Hainbat dira ikasleek egin beharreko lanak baina beste zenbaiten artean Joko Olinpikoen inguruko ikerketa egin beharko dute, bandera eta dominak diseinatu eta ereserkia konposatu. Egiten duten lana sarean ipini beharko dute ikusgai beste ikastetxetakoek ikusteko aukera izan dezaten. Orain arte bandera eta dominak asmatu dituzte eta Joko Olinpikoen garapena aztertu dute. Halanda be, oraindik asko dute egiteko: osasuntsuak diren errezeten liburuxka, bandera olinpikoa, ereserkia… Aste bat Turkian Proiektuan parte hartzen ari diren ikastetxeak bildu dira lehenengoz eta Turkian egin dute bilera. Bertan momentura arte egindakoaz aritu dira eta egiteko dutenaz mintzatu be. Sagrado Corazon ikastetxeko sei ikasle eta irakasle bi izan dira Turkian eta «oso ondo» pasatu dutela azaldu du Itziar Toja irakasleak, «oso esperientzia polita izan da guztiontzat». Proiektuko lanak egiteaz gain, Capadociako inguruak ezagutzeko aukera be izan zuten eta baita bertako kultura [...]