Sanjoanetan hasitako jaiak gora baino ez du egingo sanpedroetan
Uztailaren 5era arte, San Pedro jaietako jarduerez gozatuko dute mundakarrek. Udalak eta herriko kultur taldeek auzolanean ondu dute jaietako egitaraua. Adin denetako herritarrak aintzatetsiko dituzte: haur, gazte, nagusi eta helduei bereziki zuzendutako jardueraz osatuta egongo dira jaiak.
Eguraldia ez da azken egunotan bero-bero azaldu den faktore bakarra. Mundakarren egutegietako datarik seinalatuenetakoa, seinalatuena ez bada, ate joka dago: San Pedro jaietako ospakizunaren berotasuna hastear da.
Sanjoanak izan ziren herriko jai nagusietarako beroketak, eta orain plater nagusiaz gozatzeko unea iritsi zaie herritarrei. Herriko jaiak uztailaren 5era arte luzatuko dira, eta beren egitaraua elkarlanean ondu dute udalak, batetik, eta herriko kultur taldeek zein eragile sareek, bestetik.
Aipagarrienak Espuelatxuek, Txilipitxeruek eta Kiskillon kultur taldeak dira. Horiekin batera, urte osoko ekimen zein ospakizunetan presente egin ohi diren taldeek ez dute hutsik egingo jaietan, hala nola, Jose Mari Egileor Txistulari Taldeak, Egunsenti Dantza Taldeak edota Mundakako Abesbatzak zein Mundakako Arraun Taldeak.
Jaietako egun nagusia astelehena —San Pedro Eguna— izango den arren, adin tarte guztietako herritarrentzako jaiak bermatu gura dituzte eta, horrenbestez, sanpedroetako egitarauak umeei edota nagusiei espresuki zuzendutako egunak edukiko ditu. Jaiez “alaitasunez gozatzeko” deialdia luzatzeagaz batera, Sorne Rubio Aranok “arduraz jokatzeko” eskaria egin die herritarrei.
Mundakako alkateak nabarmendu du Txorrokopunta, udaletxeko arkupea, portua, Santa Katalina ingurua eta udalerriko bestelako txokoak “herritarren altxorrak” direla, eta horiek garbi mantentzearen esangura mahaiganeratu gura izan du: “Leku horietan denetan edota bestelakoetan sortzen dugun zaborraren ardura geurea da; zaindu dezagun herria”.
Bestalde, Rubiok palestinar herria jasaten ari den genozidioa gogoratu du jaien atarian, baita euskara jaietan “presente” egoteko beharrizana ere: “Euskarak kaleak eta plazak ditu gogoko”.
Jaietan, “kolore morea”.
Rubiok inongo erasorik gabeko jaiak opa dizkie mundakarrei, eta, alde horretatik, Mundakako Jaiak “kolore morekoak” ere badirela aldarrikatu du.
Jaien antolakuntzako kideek, hain zuzen, erasoaldien aurrean “modu pasiboan ez jarduteko” deia egin dute. Alde batetik, erasoa jasandako herritarrari entzuteko eta laguntzeko modurik eraginkorrenak argitara eman dituzte; beste alde batetik, erantzuteko moduan ez dagoenean, hartu beharreko neurriak zeintzuk diren zehaztu dute.
Beraz, sanpedroez egunez gozatzeko asmoa daukatenek nahiz gautxoriagoak direnek denetariko kontzertu, kalejira, txapelketa, emanaldi, kirol jarduera zein jolasez gozatzeko aukera edukiko dute aurten ere.
EGITARAUA
Gaur.
13:00. Izaro-Mundaka igeriketa trabesia, Alain Sainz Memoriala.
13:00. Espuelatxuek taldeak antolatuta, poteoa.
15:00. Espuelatxuek taldeak antolatuta, herri bazkaria.
17:00. Espuelatxuek taldeak antolatuta, jolasak.
20:00. Bajada, Basaranetik. Aurtengo gaia: Supermerkatuko produktuak.
Ondoren. Txosnagunearen irekiera.
21:30. Kontzertuak, txosnagunean,Espuelatxuek taldeak antolatuta: Mairi eta Begibide Erromeria.
Bihar, zapatua.
18:00. Hamarru Elektrotxaranga, Espuelatxuek taldearen eskutik.
20:00. Mundakako Abesbatzaren eta Mañariko Kirikiño Abesbatzaren emanaldiak, Andra Mariaren Zeruratzearen Parrokian.
21:00. Txupina eta pregoia, plazan.
22:30. Kontzertuak, plazan: Zahil eta Oxabi Erromeria.
Ondoren. DJ Dani Diaz+Steff, txosnagunean, Espuelatxuek taldeak antolatuta.
Etzi, domeka.
03:00. Alborada, Jose Mari Egileor Txistulari Taldeagaz eta udalbatzagaz.
13:00. Ur jolasak, plazan.
18:30. Katius-K Zabal Banden kalejira, buruhandiekin eta Ator zein Lamina erraldoiekin.
Ekainak 29, San Pedro Eguna.
10:30. Jose Mari Egileor Txistulari Taldearen kalejira.
11:45. Udalbatzaren irteera udaletxetik elizara, txistulariek lagunduta.
12:00. Meza, udalbatzaren eta Mundakako Abesbatzaren parte hartzeagaz.
Ondoren. Prozesioa, Mundakako Arraun Taldearen laguntzaz, eta Egunsenti Dantza Taldearen ohorezko aurreskua.
Gero. Sardina janaldi herrikoia, plazan.
17:00. Ping-pong txapelketa, txosnagunean, Espuelatxuek taldearen eskutik.
Ostean. Bingo musikatua.
18:00. Pilota partiduak.
Jarraian. Kittu Kale Animazioa.
Ekainak 30, Nagusien Eguna.
14:00. Nagusien bazkaria, Isla Kale kiroldegian.
Bazkalostean. Dantzaldia, Maran Txitxarrillo taldeagaz.
17:00. Tortilla txapelketa, txosnagunean, Kiskillon Kultur Elkartearen eskutik.
Ondoren. Jolasak, Espuelatxuek taldeak antolatuta.
Uztailak 1, eguaztena.
18:00. Itsas Jaia, portuan.
Egun osoan. Barrakak merkeago.
Uztailak 2, eguena.
18:00. Umeen play-backa.
Ondoren. Gazteen play-backa.
Jarraian. Nahastuak.
22:00. Nagusien play-backa.
Gaualdian. DJ KY, txosnagunean.
Uztailak 3, Umeen Eguna.
12:00-14:00. Umeentzako puzgarriak, Isla Kale kiroldegian.
17:00. Dantza Gurekin emanaldia, plazan.
18:00. Apar Jaia, plazan.
19:00. Txokolate janaldia, plazan, IGEk antolatuta.
16:00. Mus txapelketa herrikoia, txosnagunean.
22.30. Kontzertuak, txosnagunean: Depardieu eta Jonkass.
Uztailak 4, Sukalki Eguna.
11:00. Kalejira, Jose Mari Egileor Txistulari Taldeagaz.
13:00. Sukalki txapelketarako kazolen aurkezpena.
Ondoren. Sari banaketa.
13:00. Fruiztariak taldearen kalejira, plazatik hasita.
18:00. Esku pilota partiduak.
22:30. Zutik Erromeria, plazan.
01:30. Kaparrak, txosnagunean.
Ondoren. DJ Serna.
Uztailak 5, domeka.
10:00. Igeribideak, Masterclass.
11:00. Jose Mari Egileor Txistulari Taldearen eta erraldoien kalejira.
12:00. Herri kirol saioa, plazan.
20:00. Mariatxien emanaldia, plazan.
22:30. Lekittoko Deabruak taldearen piroteknia ikuskizuna jaiei amaiera emateko eta azken traka.
