Olatz Arrizabalaga, munduko txapeldun
Olatz Arrizabalagak Euskal Selekzioarekin jokatu du CIJBk antolatutako Munduko Txapelketa, Argentinan. Jokatu dituzten lau modalitateetako hirutan urrezko domina lortu dute selekziokideek.
Euskal Selekzioak munduko onenen pare dela sober frogatu du Mendozan (Argentina), berriki amaitu duten CIJBk antolatutako Munduko Txapelketan. Selekziorik indartsuenen aurrean aurpegia erakutsita, euskaldunek zortzi dominako uzta jaso dute, launa emakumekoek eta gizonezkoek: urrezko hiru domina eta zilarrezko bat eskuratu dituzte emakumezko pilotariek; urrezko eta brontzezko bana eta zilarrezko bi, ostera, gizonezkoek. Hala gizonezkoen, nola emakumezkoen kasuan, Euskal Selekzioa izan da Munduko Txapelketa honetan domina gehien lortu dituen lantaldea.
Argazkia: Euskadiko Euskal Pilota Federakuntza.
Olatz Arrizabalaga pilotari gernika-lumotarra selekzioaren espedizioko kide izan da. Emaitzetatik harago, “egundoko esperientzia” bizi izan du orain arteko espediziorik “handienean”: “31 laguneko lantaldeak egin du bidaia, eta egunero-egunero giro itzela sortu dugu geure artean; gainontzeko selekzioena baino hobea izan delakoan nago. Txapelketa oso gogorra izan da, baina geure aldartearekin sufrimendua erabat orekatu dugu”.
Gernika-lumotarrak lau modalitatetan parte hartu du: One Wall, Llargues, Manito eta Nazioarteko Jokoa. Maniton izan ezik, beste guztietan finala ere jokatu du Arrizabalagak. Eta, jokatu ez ezik, lau domina lortu dituzte hark eta bere selekziokideek. “Igarri dugu beste lehia batzuetan baina prestakuntza espezifikoagoa egin izanak eragin zuzena eduki duela emaitzetan; urtean zehar, hainbat asteburuz modalitateok entrenatzen ibili gara, eta behar horrek fruitua eman du”.
Argazkia: Euskadiko Euskal Pilota Federakuntza.
One Wall modalitatean baino ez zion urreak ihes egin Euskal Selekzioari. Herbehereak izan ziren garaile maila horretan, 0 eta 2 nagusituta. Iazko One Walleko Munduko Txapelketan ere aurkari berberaren kontra galdu zuten euskaldunek, eta aurtengon ere txanponaren ifrentzu bera suertatu zaie. “Arerioek final distiratsua eta inongo hutsik gabekoa jokatu zuten, eta guk, berriz, ez genuen geure egunik onena eduki”, azaldu du Arrizabalagak. Manito modalitateari buruz, baina, bestelako berbak dauzka: “Lehiaketa osoan nagusi izan gara joko horretan; euskaldunok gainontzekoak baino ohituago gaude hormekin jokatzera, eta Manitoan hori pila bat igarri genuen”. 21 eta 7 menperatu zuten Valentzia, erabateko sendotasunez.
Argazkia: Euskadiko Euskal Pilota Federakuntza.
Nazioarteko Jokoan, berriro egokitu zitzaien Herbehereen aurka jokatzea, baina final hartan aurkariek “gehiago estutu zuten”: “Modalitate horretako munduko txapeldunak ginenez, lorpena defendatzea tokatu zitzaigun, eta, gogor lan eginda, lortu genuen. 6 eta 3 nagusitu ginen finalean”. Azken modalitatea Llargues modalitatekoa izan zen Euskal Selekzioak jokatu zuen azken finala, hura ere herbeheeretarren aurka; azken borroka hartan 6 eta 1 gailendu ziren, malgutasun handiagoz. “Emakumezkoek estreinakoz lehiatu dugu Llargues modalitatea eta, horrenbestez, kezkaz heldu genion. Bai Herbeheeretako, bai Valentziako jokoek Llarguesen antz handiago dutenez, ez genuen geure burua faborito nagusitzat. Edozelan ere, finalean bikain jokatu genuen, eta hasieratik amaierara arte nagusi izan ginen”.
Argazkia: Euskadiko Euskal Pilota Federakuntza.
Helburuak, bidean.
Munduko Txapelketaren balorazio “ezin hobea” eginda, gernika-lumotarrak argi du bere modalitate gustukoena zein den: “One Wall modalitatearekin geratuko nintzateke. Oraindik urratsak egin ditzaket alo horretan, eta hobetzeko gogotsu nago”. Epe laburrera begira, bestalde, helburu handiak ditu Arrizabalagak: “Aste pare batez partiduetatik atseden hartuko dut, eta entrenatzen baino ez naiz ibiliko. Ondoren, Euskadiko Lau eta Erdiko Txapelketa ere jokatuko dut; maiatzaren 8n ekingo diot hurrengo jomugari”. Ostean, udara begira jarriko da aurrelaria: “Udako Torneoa eta San Fermin Torneoa urtero-urtero lehiatzen ditudan txapelketak dira, eta aurten ere bietan ariko naiz”.
