Bermeoko Udalak adineko pertsonekiko herri lagunkoiaren diagnostiko berria egingo du
Bizitzen Fundazioarekin elkarlanean eta Bizkaiko Foru Aldundiaren laguntzarekin egingo du udalak diagnostikoa. Batzar desberdinak antolatu dituzte adinekoekin batera diagnostikoa egiteko.
Bermeoko Udalak, Bizitzen Fundazioagaz elkarlanean eta Bizkaiko Foru Aldundiaren laguntzagaz adineko pertsonekiko herri lagunkoiaren diagnostiko berria egingo du. Horrela, adineko-pertsonek beraien bizimoduari ahalik eta autonomia eta bizi-kalitate handienarekin eutsi ahal izateko, herriko egungo egoera ezagutu eta hobekuntzarako proposamenak jasoko dituzte, udal ordezkariek azaldu dutenez.
Ekimena Osasunaren Mundu Erakundeak (OME) sustatzen duen herri lagunkoien mugimenduaren baitan kokatzen da, eta horrekin, herriak adineko pertsonen beharretara eta gaitasunetara egokitzea bilatzen du, haien ongizatea eta gizartean parte hartzeko aukerak sustatzeko. Helburu hori lortzeko bidean, herriko politikak, zerbitzuak, inguruneak eta egiturak aztertzea eta hobetzea proposatu du OMEk.
Bermeoko Udalak aditzera eman duenez, diagnostikoan “zortzi arlo” ebaluatuko dituzte: hala nola, aire zabaleko guneak eta eraikinak; garraioa; etxebizitza; sareak eta gizarte-laguntza; partaidetza; errespetua eta gizarteratzea; komunikazioa eta informazioa; eta gizarte eta osasun zerbitzuak.
Bestalde, gaineratu du herritarren ekarpenak jasotzeko batzarrak antolatuko direla: “Topaketa horietan, herriko arlo desberdinei buruzko iritziak eta bizipenak partekatuko dira, baita egungo egoeraren alderdi positiboak, hautemandako oztopoak eta hobekuntzarako proposamenak ere. Adineko pertsonen parte-hartzea bereziki garrantzitsua izango da diagnostikoa osatzeko”.
Batzarrak
Gauzak horrela, bost hitzordu finkatu ditu udalak, eta azaldu du taldeak “gehienez 12 pertsonakoak” izango direla, horrela “parte hartzaile guztiek euren iritzia emateko aukera izan dezaten”.
Adin tarteka banatuko dituzte bilerak. Hala nola, 80 urtetik gorako pertsonek batzarretara bertaratzeko bi aukera izango dituzte. Alde batetik, bihar [azaroak 13], 10:30etan, Gizarte eta Kultura Etxeko Nagusien Txokoan; bestetik, datorren eguenan [azaroak 19], 16:00etan, Gizarte eta Kultura Etxeko 2.3 batzar gelan. 65 eta 79 urte bitarteko herritarrek ere beste horrenbeste izango dute aukeran: datorren eguaztenean [azaroak 18], 16:00etan, Gizarte eta Kultura Etxeko 2.3 batzar gelan, edota azaroaren 26an, toki berean. Azkenik, zaintzaileentzat ere bilera bat antolatu dute, azaroaren 25ean, 17:45ean, Gizarte eta Kultura Etxeko 2.5 gelan.
Bermeoko Udalak, oro har, herritarrak gonbidatu ditu batzar horietan parte hartzera, “haien iritziak eta ekarpenak diagnostikoaren oinarri izan daitezen”. Informazio gehiago jasotzeko edo parte hartzeko 675 916 856 edo 94 617 91 60 telefonoetara deitu daitekeela azpimarratu dute.
