Bermeoko kiroldegiak instalazioak eta zerbitzuak hobetu ditu
Skate pista, ikasgela eta batzar-gela bat sortzea, gimnasio eremua handitzea, eta bizikletak konpontzeko gune bat ahalbidetzea izan dira Bermeoko Udalak Areneko Kiroldegian egindako lanetako batzuk. Kirol-ikasturte berria urrian hasiko dela jakinarazi dute, bide batez.
Besteak beste, skate pista txiki bat ahalbidetu dute kiroldegian. Argazkia: Bermeoko Udala. Areneko kiroldegiak instalazioak berritu eta hainbat espazio egokitzeko lanak egin ditu iraileko itxialdian, Bermeoko Udalak jakinarazi duenez. Kiroldegia irailaren 1etik 16ra egon da itxita, alegia, eta irailaren 17an ekin dio berriz ohiko jarduerari, Bermeoko Udalak onartutako egutegiari jarraituz.
Itxita egon bitartean, besteak beste, igerilekuko mantentze-lanak egin, argindar-sistema osoa berritu eta gimnasio-eremua handitu dute. “Igerilekuan, ura hustu eta zirkuitu guztiak garbitzeaz gain, legionellaren aurkako tratamenduak eta DDD tratamendua egin dira, baita garbiketa sakona eta beharrezko errejunte-lanak ere”, azaldu dute. Gainera, aurten martxan jarri den igerilekuko ura berrerabiltzeko sistema ere nabarmendu nahi izan du Udalak, sistemaren bidez, igerilekuko ura kale-garbiketara bideratzen delako, “baliabide hidrikoen erabilera optimizatzeko”.
Areneko Kiroldegiak hainbat espazio berri ere izango ditu aurrerantzean, bestalde. Biking gela gimnasioaren ondoko eremura lekualdatu ondoren, lehen erabiltzen zen espazioan skate pista txiki bat egokitu dute. Aurreratu dutenez, pista osoa erabiltzeko tarifa 14 eurokoa izango da orduko, eta erabilera partekaturako prezioa euro batekoa izango da orduko. Zerbitzua laster jarriko da martxan.
Horrez gain, bigarren solairuan “ikasgela berri bat” prestatu dute. Kiroldegiaren ohiko ordutegian egongo da erabilgarri, eta 16 urtetik gorako erabiltzaileek ikasteko edo lan akademikoak egiteko erabili ahal izango dute: “Kirola egin nahi duten baina ikasi edo lan egin behar duten herritarrei bidea errazteko helburuz ahalbidetu dugu ikasgela berria”.
Gimnasio-eremua ere handitu egin da, “herritarren eskaera anitzak” kontuan izanik. Hala, ohiko gimnasioak 800 metro koadro inguru izango ditu eta, beheko gimnasioa gehituta, kiroldegiak “1.000 metro koadrotik gorako gimnasio-eremua” izango du. Hasiera batean, dagoen makineria espazio berrian berrantolatuko dutela nabarmendu dute, makineria berria datorren urtean txertatzea aurreikusi baitute. Udalaren arabera, handitze horrek “eskaera historiko bati erantzuteko” aukera emango du, eta, besteak beste, udan eguerdian gimnasioa zabalik mantentzeko aukera aztertuko dela gaineratu dute.
Horrez gain, batzar-gela berri bat sortuko da goiko gimnasioaren ondoan, eta bizikleten mantentze-lanetarako gune bat ere egokitzen ari dira kiroldegiaren atzealdean. Sarreran eta fatxadan ere margotze-lanak egin dituzte, oro har.
Bermeoko Udalak erabiltzaileei eskerrak eman dizkie instalazioak itxita egon diren egunetan erakutsitako ulermenagatik, eta azaldu du itxiera “beharrezkoa” izan dela lan guztiak behar bezala egiteko. Udalaren arabera, egindako hobekuntzek erabiltzaileen beharrei erantzutea eta Areneko kiroldegiaren eguneroko erabilera eta esperientzia hobetzea dute helburu.
Kirol ikasturtea, hastear
Instalazioen berrirekierarekin batera, 2026-2027 kirol ikasturtea ere abiatuko da. Jarduerak urriaren 1ean hasiko dira, eta adin eta behar desberdinetara egokitutako eskaintza prestatu dute, beste urte batez. Besteak beste, 60+ taldearentzat, Biking, OKI (oreka, koordinazioa eta indarra), Pilates eta Yoga eskainiko dira. Lurra ikastaroen barruan, berriz, Aeroyoga, Pilates, Bizkar osasuntsua, Fit Balance, Yoga, Indarfit 45+ eta Gaztefit izango dira.
Urari lotutako eskaintzak Matro-igeriketa, 3 eta 14 urte bitartekoentzako igeriketa eskola, seniorren igeriketa, akuafit, akuarunning eta kardioaletak jasotzen ditu. Azkenik, eskalada tailerra ere antolatu dutela adierazi dute, 8 urtetik gorakoentzat. 20 saioko tailerra izango da eta azaroaren 5ean hasiko da.
Eskaladako tailerra izan ezik, gainerako ikastaroak urrian hasiko dira, udalaren berbetan. Dagoeneko ahalbidetu dute izena emateko bidea salmenta-makinetan, udalaren webgunean eta Bermeo Kirolak App aplikazioan.
