Jaurlaritzak ia 100 amarraleku berri jarriko ditu Bermeoko portuan, hura "Bizkaiko erreferente gisa" sendotzeko
Euskadiko Kirol Portuak-ek asteon lizitatuko ditu Artzako pantalanen eremu berriko lanak. 2,67 milioi euroko inbertsioagaz, udarako ia 530 amarraleku izango ditu portuak. Frantxuako kaia ere berrantolatu gura dute eta, horretarako, Kortazar ontziola zaharraren eraikina eraitsiko dute.
Euskadiko Kirol Portuak entiatea Bermeoko portuko Artzako pantalanen eremu berria eraikitzeko obren lizitazioa biribiltzeko puntuan dago. Hain zuzen, 2.672.648,81 euroko inbertsioagaz, asteon lizitatuko ditu lanok, ia 100 amarraleku berri sortzeko asmoz. Ez hori bakarrik: igarobideko ontzientzako bederatzi plaza berri prestatuko dituzte, egun dauden seirei gehituko zaizkienak. Lanak datorren udarako amaituta egotea aurreikusten dute. Orduan, Bermeoko portuak 53o amarraleku inguru edukiko ditu, eta Bizkaiko “kirol eta aidialdiko” itsas nabigazioaren “erreferentziazko portu” modura sendotuko da.
Eusko Jaurlaritzako Elikadura, Landa Garapen, Nekazaritza eta Arrantzako sailburu Amaia Barredok nabarmendu du portuak “modernizatzen” segitzeko beharra ikusi dutela: “Zerbitzu hobeak eskaintzeko, dagoen eskariari erantzuna emateko eta euskal kostaldearen erakargarritasuna indartzeko, kirol eta aisialdiko nabizazioari begira; lan horiei esker, Bermeoko portuaren gaitasuna nabarmen haziko da, eta erabiltzaile guztiek kalitate hobedun instalazioez gozatzeko aukera izango dute”.
Pantalanen eramu berriak portuak hartzen dituen atrakalekuen berrantolatzea ahalbidetuko duela azaldu dute, egun Portuzarrean eta ainguraleku eremuan dauden tamaina handieneko ontziak bertara tokialdatuta. Amarraleku berrien erdiak 8 eta 10 metro bitarteko luzeradun ontzientzat izango direla aurreratu dute; 16 amarraleku egongo dira 10 eta 12 metro bitarteko ontzientzat; beste 12 amarraleku, 12 eta 15 metro arteko ontzientzat. Hala, Bermeoko portua “egungo eskariei” egokituko zaie.
Etortzeko direnak.
Ekimen hori, azaldu dutenez, portua eraldatzeko “prozesu zabalago baten barruan” kokaturik dao. Hain zuzen, datozen hilabeteetan, EKPk kapitaintza berria eta bisitarientzako aldagela zein komunak jartzea aurreikusten du, baita izotz fabrika zaharraren aldameneko ainguralekua egokitzea ere, urte osoko ainguraleku bihur dadin. Ekintza horiek denek “milioi bat euro inguruko” inbertsioa edukiko dute.
Kapitaintza berriak EKPren administrazio instalazioak “portuaren hazkundera egokitzea” ahalbidetuko du, eta erabiltzaileei ematen zaien “arreta hobetzea” ere bai. Ainguralekua handitzeak, ostera, portuaren edukiera “600 amarralekutik gertu” jarriko du. Gainera, pantalanetako hornidura dorreen berritzea ere azpimarratu dute: ekipamendu telekontrolatu berriak jarriko dituzte, uraren eta elektrizitatearen kontsumoa “hobetu” asmoz. Instalazio “eraginkorragoak eta jasangarriagoak” lortuta, Bermeoren “eginkizuna indartuko” dute, EKPk kudeatzen dituen portuen arteko “erreferente” gisa.
Kapitaintza berriak Euskadiko Kirol Portuak entitatearen administrazio-instalazioak portuaren hazkundera egokitzea eta erabiltzaileei ematen zaien arreta hobetzea ahalbidetuko du. Bestalde, ainguralekua handitzeak portuaren edukiera 600 amarralekutik gertu jarriko du.
Urte amaiera orduko, bestalde, Eusko Jaurlaritzak Frantxuako kaian kokatutako Kortazar ontziola zaharra eraisteko lanak hasiko ditu. Lan horiek 415.061,72 eurotan lizitatu dituzte, “2017tik abandonaturik eta egu narriadura egoera oso aurreratuan” dagoen eraikina kentzeko asmoz. Hain zuzen, bere egituran dauka eraikinak kalterik esanguratsuena, “erortzeko edota kolapsatzeko arriskuan” dago. Gainera, bertako jarduera eten zenez geroztik, “bandalismo ekintzak eta okupazioak” jasan izan ditu.
Eraispen horrek “12 asteko exekuzio epea” izango du, eta “ezinbesteko jarduketa” izango da, Frantxuako kaia “funtzionalki berrantolatzeko” bidean. Egun indarrean dagoen Bermeoko Portuko Plan Bereziaren arabera, antolaenduz kanpo deklaraturiko azpiegitura hiru kentzeak portuko jarduerari lotutako erabilera berriak garatzeko espazio estrategikoa berreskuratzea ahalbidetuko du.
