Elkartasunak eta kirolak bat egiten dutenean
Serrats Aldapa Xtream lasterketa bizikletazaleen egutegietan egonkortzen ari da. Lasterketaren laugarren aldiaren baitan, horrela, 290 parte hartzaile bildu ziren Bermeon. Alejandro Fidalgo gailendu zen ibilbide luzean; Josu Barturen, berriz, laburrean.
Bermeo txirrindularitzaren epizentro bihurtu zen zapatuan, beste behin. Izan ere, Serrats Aldapa Xtrem Bike Marathon lasterketaren laugarren aldia hartu zuen herriak, 290 txirrindulariren abagune bihurtuz. Egun borobila izan zela nabarmendu dute Matxitxako Txirrindulari Kirol Taldeko kideek: “Gure aldetik balorazio positiboa egin dugu, guztiz. Eta parte hartzaileek ere horrela egin dute, esan zigutenez. Bereziki aipatu zuten mendiaren eta bide desberdinen egoera bikaina, eta guk ere bolondres guztien lana eskertu nahi dugu”.
Bike Luzea eta Bike Laburra aukeran izan zituzten parte hartzaileek. Lehenengo aukerarekin ausartu zirenek 61 kilometro eta 2.000 metroko desnibel metatuari egin behar izan zieten aurre; Bike Laburraz gozatu zutenek, ordea, 41 kilometro eta 1.325 metroko desnibeldun ibilbidea osatu zuten.
Bike Luzearen podiumaren lidergoa Alejandro Fidalgok gidatu zuen 03:21:00ko denboragaz; bigarren postua Esteban Sanchezentzat izan zen, eta hirugarrena Jon Arrastiak eskuratu zuen. Laburrean, aldiz, Josu Bartuenek partikaratu zuen lehen postua, 02:18:43ko denboragaz, eta atzetik Julen Rementeria eta Antxon Idarraga izan zituen.
Aurten, gainera, berritasunekin heldu da lasterketa. Hain zuzen ere, estreinakoz lasterketan bikoteka izena emateko aukera izan dute parte hartzaileek, eta antolatzaileak “pozik” agertu dira berritasunaren erantzun onagaz. 23 bikotek parte hartu zuten guztira; horietako 10 ibilbide laburrera animatu ziren, eta gainontzeko 13ak, berriz, luzera. “Bikoteek esan zutenagatik, sentsazio onak izan zituzten eta gustora aritu ziren bikoteka lehiatzen, beraz, datorren urtera begira printzipioz mantendu egingo dugu aurtengo berrikuntza hau”, azaldu dute.
Matxitxako Txirrindulari Kirol Taldetik, baina, lasterketaren kustu solidarioa azpimarratu dute, beraientzat “oinarrizkoa” delako: “Klubetik beti saiatzen gara egiten dugun guztiaren atzean elkartasuna oinarri izaten, eta elkarteren bati zein besteri laguntzen”. Hala nola, beste behin, Aspanovas, minbizia duten haur eta nerabeen gurasoen Bizkaiko elkartea babestea erabaki dute antolatzaileek, izen-emateekin jasotako diru kopuruaren zati bat elkarteari zuzenduz: 3.125 euro bideratu dizkio Matxitxako TKTk Aspanovasi: “Iaz ere eurei bideratu genien dirua, eta aurten ere berdina egitea erabaki genuen. Aspanovas elkarteko ordezkariek jaso zuten dirua, eta esan zuten Gurutzetako Ospitalearen aurrean duten familientzako etxean hobetze lanak egiteko baliatuko dutela dirua”.
Antolatzaileak, Aspanovas elkarteko kideekin.
Elkartasunagaz jarraituz, antolatzaileek buruan zein ahoan izen bat izan zuten uneoro zapatuan: Julen Zubero Aldekoa. Iaz Euskadiko Txapelketa Bermeon bertan irabazi zuen Zuberok, eta azken urteotan asko lagundu izan die antolatzaileei. Trafiko istripu oso larria jasan zuen ekainean, entrenamendu saio batean ari zela. Gauzak horrela, antolatzaileak zein parte hartzaileak hartaz gogoratu, eta omenalditxoa egin zioten.
Parte hartzaile guztiek sinatu zuten antolatzaileek prestatutako bandera.
“Istripu larria izan zuen, eta gure esker ona adierazteko omenalditxo bat egin nahi izan diogu berari, eta bere familiari. Beste hainbat lasterketa irabaztearen alde borrokatu duen bezala, badakigu honetarako ere borrokatzen ari dela, eta hau ere irabaziko duela, noski”, adierazi dute.
Apurka-apurka, mendi bizikletaren egutegian “egonkortzen” ari da Serrats Aldapa Xtrem lasterketa, esan dutenez. Geroz eta gehiago dira hura beren lasterketa programazioan letra gorriz gordetzen dutenak, eta bermeotar taldea “harro eta pozik” agertu da horrekiko.
