Etxeetako suteen kalteak murrizteko plan pilotu bat abiatuko dute Busturialdean
Busturialdeko 2.450 etxetan baino gehiagotan ke-detektagailuak jarriko ditu Bizkaiko Foru Aldundiak, Gizarte Zerbitzuen Mankomunitatearen, Busturialdeko Udalen eta Gurutze Gorriaren laguntzagaz. Kortezubin aurkeztu dute kanpaina, gaur, eta horren helburua adinekoak eta arrisku-egoeran dauden pertsonak babestea dela zehaztu dute.
Bizkaiko Foru Aldundiak, Gizarte Zerbitzuen Mankomunitateak eta Busturialdeko Udalek elkarlanean jardun dute, eta Gurutze Gorriaren laguntzagaz Busturialdeko adineko pertsona kalteberen etxeetan suteen ondoriozko kalteak murriztuko dituen plan pilotu bat gauzatzen hasi dira. Horren baitan, ke-detektagailuak instalatuko dira eskualdeko milaka etxetan. Kortezubin egin dute plan pilotuaren aurkezpena, gaur.
Ekimenak etxeko suteetatik eratorritako arriskuak murriztu nahi dituela nabarmendu dute, horrela arrisku-egoeran daudenak babestuz; batik bat, keak eta gas toxikoek eragindako arriskuetan jarri dute fokua. Ana Hormaetxe Busturialdeko Gizarte Zerbitzuen Mankomunitateko lehendakariak proiektuaren indarguneak aipatu ditu: “Proiektuaren indarguneetako bat erakundeen arteko elkarlana da, horrela eskualdeko bizilagunen ongizatea bermatzeko eta bizi kalitatea hobetzeko lanean jarraituz”.
2.450 etxebizitza ingurutan jarriko dituzte ke-detektagailuak, aurreikusi dutenez. Hala baina, irizpide batzuen arabera banatuko direla esan dute Bizkaiko Foru Aldunditik: “Alde batetik, etxeko arreta-zerbitzuaren erabiltzaileen edo familia-giroan zaintzeko prestazio ekonomikoaren onuraduren 1.250 etxetan jarriko dira ke-detektagailuak. Bestalde, bakarrik bizi diren eta 70 urtetik gora duten pertsonen 620 etxetan, eta bakarrik bizi diren baina 70 urtetik behera duten 600 etxetan ere jarriko dira”.
Azken horien kasuan, zehaztu dute bakoitzaren udalaren menpe egongo dela instalazioa, ze, udalerri batzuetan etxebizitza guztietan instalatuko dira suteak prebenitzeko gailuak, “adina edo egoera kontuan izan gabe”. Besteak beste, Ereñon, Arratzun, Ibarrangelun, Kortezubin, Murueta eta Ajangizen. Etxeko arreta-zerbitzua hartzen duten pertsonak edo prestazio ekomonikoen kasuan, berriz,
Bizkaiko Foru Aldundiak ordainduko die gailua, baina erabiltzaileek kokatu beharko dute. Hala ere, gaineratu dute erabiltzaileek ezin badute, Gurutze Gorriko boluntarioek instalatuko dituztela.
Patxi Berreteaga Bizkaiko Foru Aldundiko Suhiltzaile Zerbitzuko Prebentzio eta Babes Zibileko Ataleko buruak “oso erraz kokatzeko gailua” dela esan du: “Etxeko sabaian kokatu behar da, kea hortik pasatzen baita. Itsaski bat du, zeinek instalazioa errazten duen. Behin jarrita dagoenean, gutxieneko kearen presentzia nabaritzen du, eta soinu oso gogor baten bidez horren berri ematen du, sutea oraindik hasi berri dagoenean. Horrela, sutea handitu baino lehen neurriak hartzea eta bakoitzaren burua zaintzea ahalbidetzen du, oraindik arrisku handirik ez dagoenean. Sute bati garaiz aurre egiteko tresna da, alegia”.
Aldunditik gogoratu dute Busturialdeko udalentzat “borondatezkoa” izango dela kanpaina; eurek erosi eta instalatu behar dituztelako gailuak 70 urtetik gorako pertsonen kasuan. Gailu guztiak homologatuta daudela esan dute; oro har, 10 urteko bateriak dituzte, eta zinta itsaskorrak ere badituzte, horrela “sabaian ondo itsasteko”.
Ke-detektagailuen eraginkortasuna beste herrialde batzuetan frogatu dela azpimarratu dute, beregain, aurkezpenean. Alemania jarri dute adibidetzat, hain zuzen ere. “Alemanian %27 murriztu da urtean suteek eragindako heriotza kopurua; hau da, 345 kasutik 253 kasura. Horrez gain, milioi biztanleko heriotzak ere 4,7tik 3,3ra jaitsi dira eraikin berrietan; aurretiaz eraikitakoetan, aldiz, 5,2tik 3,4ra”, azaldu dute.
Aurkezpena Kortezubiko Oma auzoan egin dute, Javier Legarzaren etxean. Legarzak 85 urte ditu, eta alboko etxean bere alaba bizi den arren, bakarrik bizi da. Orain arte “lasai” bizi da, baina begi onez jo du kanpaina: “Ongizatea eta prebentzioa sustatzen duten teknologiaren aurrerapen oro ongi etorria da beti. Ez dakit funtzionatuko duen ala ez, baina nik neuk ondo ikusten dut”.
Komunikazioa eta parte hartzea.
Herritarrekiko komunikazioa eta parte hartzeari aipamen berezia egin dio Bizkaiko Foru Aldundiak, horrez gain: zenbait ekintza aurreikusi ditutuzte kanpaina berria onuradun guztiengana helarazteko eta gailu horiek “ondo erabiltzen” ikasteko. Hala nola, gutun pertsonalizatuak, informazio-saioak, triptikoak, tutorialak eta gidak aipatu dituzte. Kanpaina bukaeran, gainera, asebetetze inkesta baten bidez, horrekiko emaitzak aztertuko dituzte. Bizkaiko Foru Aldundiak jakinarazi duenez, emaitzak positiboak badira, Busturialdeko probaldiaren ostean Bizkaiko Lurralde Historikoko beste eskualde batzuetara zabalduko dute kanpaina.
Gauzak horrela, Bizkaiko Foru Aldundiak bere esker ona adierazi die Busturialdeko Mankomunitateari eta Gurutze Gorriari, “eskainitako laguntzagatik, eta proiektuaren zabalkuntzan laguntzeagatik”. Bide batez, gogoratu du prebentzioarekin eta adineko pertsonen segurtasunarekin “indarrez konprometituta” jarritzen duela, eta horretarako “neurri zehatz eta ebaluatuen alde” egiten duela.
