Atzo hartu, gaur bizi, bihar amestu
Hogei urte igaro dira herritarrek arma fabrika zen Astra okupatu eta fabrika espazio kolektibo batean bihurtu zutenetik. Bi hamarkadetan, belaunaldi eta ahots desberdinak lotu ditu Astrak, eta egindako lan hori ospatu zuten abenduan. Orain, kilometro berri bat egiteko hausnarketa prozesua martxan jarriko dute.
Astrako 20. urteurrena.Astra Ezinezkoa okupatu eta iraultzak egi bihur daitezkeela erakutsi zuten Astra okupatu zutenek duela 20 urte. Ordutik, bi hamarkada igaro dira, eta 2005ean abiatutako bide hark bizirik eta indartsu dirau. Horren erakusle izan da abendu osoan zehar antolatutako Astraren 20. urteurreneko egitarau zabala. Mahai-inguruak, hitzaldiak, kultur ikuskizunak, kontzertuak eta umeentzako zein adin guztientzako jarduerak izan dira kulturarako fabrika sozialaren baitan. Helburua argia izan da: elkar ikustea, oraina ezagutzea eta etorkizuna elkarrekin eraikitzeko uneak sortzea.
20 urtetan zehar herri eta eskualdeak egindako lana goraipatu dute, ospatu. Izan ere, kultur fabrika sozial horrek bihotza eta indarra herrian dauzka. Astra Gernikentzako zela aldarrikatu zuten duela bi hamarkada, eta Gernike Astra da, Astra Gernike da esan dute orain. Urteurrenak agerian utzi du Astra herritik sortutako proiektua dela, eta herriari estu lotuta dagoela. Izan ere, asko eta asko izan dira urteurren ospakizunetara gerturatu diren eskualdeko herritarrak zein hortik haragokoak.
Astrako 20. urteurrena.Astra
Hala, orokorrean, antolatzaileak «oso gustura» geratu dira urteurrenak emandakoagaz: «Jende asko gerturatu da ospakizunetara, eta horrek balio izan du okupazioaren hasierako garaietan parte hartu zuen jendea berriro elkartzeko, baita denborarekin pixka bat urrundu diren belaunaldiak berriz Astrara hurbiltzeko ere. Gainera, ospakizunak balio izan du proiektuak aurrera segitzen duela ikusteko ere». Izan ere, Astrako komunitateko jendea elkartu duten pila bat ekintza egon dira: «Hasieratik Astraren parte izan den jende guzti hori elkartzeko eta elkarregaz gozatzeko momentuak ere egon dira, eta oso polita izan da».
Gernika bezalako herri batean hilabete oso batez horrenbeste ekimen antolatzea ez da ohikoa. Eta, azpimarratzekoa da askotarikoak izan direla prestatu dituztenak: kontzertuak, ekintza kulturalak, mahai-inguru sozialak edota proposamen artistikoak. Ondorioz, egitarau anitzak adin desberdinetako jendea erakartzea ahalbidetu du. «Asmoa hasieratik izan da denetariko proposamenak eskaintzea, herriko edonork bere lekua aurkitu ahal izateko Astran. Izan ere, Astra edonorentzako espazio zabala eta irekia da, eta urteurrenean ere izaera hori islatu nahi izan dugu», adierazi dute Astrako kideek. Eta esperotako erantzuna jaso dute, nahiz eta jakin duten gauza batzuetara beste batzuetara baino jende gehiago gerturatuko zela. Hala ere, aitortu dute gazte belaunaldien presentzia txikia izan dela «juergatik harago». Baina, orokorrean, belaunaldi artekoen presentzia nabaria izan da, Astratxikikoetatik hasita eta sektore nagusiagoetara bitarteko parte hartzea ona izan baita. Dena den, autokritikarako tartea ere ireki dute: «Badira hobetzeko gauzak».
Astrako 20. urteurrena.Astra
Hausnarketarako tartea
Urteurrena ez da ospakizun hutsa izan. Hausnarketarako espazioa ere eskaini du, Astrak egindako ibilbidea, izan duen eta oraindik daukan presentzia nabarmendu eta etorkizuneko erronkak mahai gainean jartzeko. Izan ere, agerikoa da Astrak aurrera jarraitu behar duela, baina horretarako proiektuak herritarren inplikazioa izan behar du: «Astrak herritar guztiei beraien ekarpenak egiteko aukera eskaintzen die, eta horrelako espazioak izatea beharrezkoa da Gernika-Lumorentzako. Herriak behar du horrelako espazioa, eta Astrak behar ditu herritarrak aurrera egiteko».
Astrako 20. urteurrena.Astra
Astran, eragileez harago, norbanakoek ere parte hartze handia dute, eta herrigintzatik sortutako espazio horiek «beharrezkoak» direla azpimarratu dute Astrako kideek: ume, gazte eta adinekoentzako babesleku da Astra, baina adierazpenerako gune eta topaleku ere bai. «Belaunaldi guztiak zeharkatzen dituen proiektua da». Eta, komunitate horren parte izan den eta herriaren alde lan egin duen Dabid Zelaia gogoan izan zuten urteurrenean, hari omenaldi berezia eginez, eta bere berba eta indarrari jarraikortasuna emanez; izan ere, Eingu eta eingogu aldarria etorkizunera begirako konpromiso gisa hartu dute.
Kilometro berri bat
Urteurrenak, ospakizunaz gain, etorkizunerako galderak ere mahai gainean jarri ditu. «Urteurrenak Astraren oraina eta etorkizunari buruzko zenbait galdera eragin ditu, eta hortik ateratako ondorioetako bat izan da beste hausnarketa prozesu bat martxan jartzeko beharrizana dagoela», azaldu dute. Kilometroz kilometro egiten du bere bidea Astrak, eta hurrengo kilometroaren oinarriak komunitatean zehazteko beharraz jakitun, martxoaren 14rako bilera irekia deitu dute, prozesu horri buruzko lehenengo pausoak ematen hasteko.
Astrako 20. urteurrena.Astra
Izan ere, etorkizunera begira ere erronkak badaude, eta horrek herritarren inplikazioa ere eskatuko du, herrigintza aktibo bat izatea: «Herriari bizia ematen dio Astrak, eta ahalik eta eragile edo norbanako gehien martxan jartzea garrantzitsua da, horrek aukera asko ematen dituelako ekintza esanguratsuak egiteko». Hala, gogoratu dute edonor bertaratu daitekeela Astrara, espazio zabala dela, eta horrek bizitasuna eman diola eta emango diola Astrari eta herriari: «Belaunaldi berrien beharra ere badago, ze Astra mantentzen jarraitu nahi badugu, belaunaldi berriak behar dira. Inork ez balu parte hartuko eta bere ekarpena egingo, ez zen Astrarik egongo. Beraz, hurbildu zaitezte, ekarpen oro ongietorria baita».
