Nortasuna baino zerbait gehiago behar da Euroligako txapeldunordeari irabazteko
Lointek Gernika Bizkaiak Perfumerias Avenidaren kontra galdu zuen atzo, 56-62, Endesa Emakumezkoen Ligako 19. jardunaldiko Malosteko norgehiagokan.
Argazkia: Gernika KESB Malostek bere garra atera zuen atzo, baina Perfumerias Avenidaren aurka gailentzeko hori baino askoz gehiago behar da. Salamancako taldeak 56-62 irabazi zion Lointek Gernika Bizkaiari, Silvia Dominguezen gidaritza bikainagaz. Etxekoetatik onena, ostera, Paula Ginzo izan zen, 10 puntu eta 4 errebote erdietsita. Partiduaren hasieratik argi zegoen testuinguru oso bestelakoetan dauden talde bi direla Lointek Gernika Bizkaia eta Perfumerias Avenida: lehenengoak erreskadan jasotako bost porrotetik zetozen; bigarrenak, aldiz, erreskadan lortutako hamar garaipenetatik. Tinara Mooren agerraldiren bat edo bestegatik ezin ezean, etxekoek ez zuten egin beste hainbestetan egin ohi duten saio hasiera bortitza; arerioaren mailak ere dezente zailtzen du hasieratik presio maila altuan jardutea. Talde bisitariak 0-10eko partziala lortu zuen, tartean hiruko jaurtiketa bi saskiratuta, eta Mario Lopezek lehendabiziko hutsartea eskatu behar izan zuen.
Roberto Iñiguezen jokalariak, berriz, zuzeneko blokeoaren bitartez dinamikak sortzen hasi ziren, Gernikaren defentsaren ahuleziaren erakusle; defentsa hori, hain zuzen ere, erdibitu egiten zuen kanpokoen alde batetik besterako jokoak, hausteko oso zaila zen presio lerro bat sortuz. Gauzak horrela, lehenengo laurdena 11-22 bukatu zen. Zuzeneko nahiz zeharkako blokeoetatik abiatuz, Perfumerias Avenidak nahieran gorpuztu zuen bere jokoa bigarren laurdenean ere. Lointekeko jokalariak, aldiz, baloiaren atzetik lasterka egitera mugatu zituzten. Bisitariek, gainera, frogatu zuten hiruko jaurtiketetan ere maila handiko taldea direla: kanpoaldetik jokatzerakoan asmatu egin zuten, eta hainbat saskiratze eskuratu.
Lointek Gernika Bizkaiak, berriz, ez zuen saskirako bideagaz jotzen, Perfumerias Avenidak ehundutako defentsa lerroa tarteko. Angie Bjorklund hurre-hurretik markatu zuten, arriskurik sortu ez zezan. Presioa presio, etxeko taldeak asmatu zuen partiduan bizirik jarraitzeko. Salamancakoek, horrez gain, lehen taldeko zazpi jokalari eta harrobiko gazte bana eroan zituzten Malostera, eta faktore horrek, hain zuzen, errotazioetan fin ibiltzera behar zuen Iñiguez. Bigarren laurdenaren amaieran, 28-35 markagailuan.
Bigarren zatian, Perfumerias Avenidak puntu bat gehiago igo zuen partiduaren erritmoa, batez ere, bere defentsari zegokionez. Erasoan ere muga-mugara eroaten zuten baloiaren jabetza, azken txanpan saskiratzeak lortzeko. Bigarren zati horretan Lointek Gernika Bizkaiakoak hauspotu zituztenak Malosteko ikusleak izan ziren. Nekea partiduaren eskemetan eragiten hasi zen, Perfumerias Avenida ez baitzen lehen laurdeneko talde sendo eta mintzen hain zaila. Lopezek aldaketa batzuk egin zituen defentsan, sistema osoa berregituratzeko, eta fuitua eman zuen horrek: Salamancako taldearen zuzeneko blokeoa eteteko bidea ezagutu zuen. Halaber, hirugarren laurdena amaitu orduko, Belen Arrojok saskiratze bat egin zuen, ikusleak are gehiago piztu zituena, eta 41-49aren aurrean esperantzak bizirik mantendu zituena.
Markagailuak kanpokoekiko aldea hamar puntutik gorakoa zela erakutsi arren, Gernikaren sentsazioak oso bestelakoak ziren. Kanpoaldetik jaurtiketak egiterakoan abilezia puntu bat falta zitzaien Lopezen neskei, baina Paula Ginzok konpondu zuen hori: Iñiguez hutsartea eskatzera behartu zuen, Lointek sei puntura jarrita. Hori bai, Perfumerias Avenidaren jokalari zutabea Espainiako selekzioan ere jokatzen duen Silvia Dominguez izan zen, maila oso-oso handia duena. Era berean, Maite Cazorlak ez zion ahalbidetu Bjorklundi jaurtiketak ganoraz egitea, aurrez aurreko defentsa lan bikainagatik. Beste behin, ñabardura txikiek partiduaren noranzkoa zehaztu zuten, eta esparru horretan Perfumerias Avenida, egun, goi mailako taldea da. Partiduaren bukaeran, 56-62koa erakusten zuen markagailuak, eta, zalantza barik, zartako gogorra da Lointek Gernika Bizkaiarentzat eta Malosterentzat, den-dena eman zuten partidu batean.
