Aranguren eta Onaindia, Bizkaiko harri-jasotze txapelketako sailkapen saioan garaile
Bizkaiko gizonezkoen harri-jasotze txapelketako sailkapen jardunaldiak lehiatu zituzten, domekan. Kategoria absolutuan Haritz Aranguren sailkatu zen lehen postuan; 80 kilotik beherako kategorian, berriz, Arkupe Sustabiz Kirol Taldeko Jon Onaindia.
Gernika-Lumoko Santanape kiroldegiak Bizkaiko gizonezkoen harri-jasotze txapelketako sailkapen jardunaldiak hartu zituen igandean, Bizkaiko Herri Kirol Federazioak antolatuta. Bi kategoriatako probak jokatu zituzten: 80 kilotik beherakoena eta absolutua. Arkupe Sustabiz Kirol Taldeko kirolariak ere izan ziren han, batik bat.
Sailkapen saioetan, parte-hartzaileek hiru minutuko lana egin behar izan zuten harri bakarra erabilita. 80 kilotik beherako kategorian, 100 kiloko kubikoarekin lehiatu ziren; kategoria absolutuan, berriz, 112 kiloko harria erabili zuten, bi kategorien artean hamabi kiloko aldea egonda.
Kategoria absolutuan bost harri-jasotzaile aurkeztu ziren, eta lauk lortu zuten finalerako sailkapena. Haritz Aranguren izan zen onena, 17 jasoaldigaz. Bigarren postuan sailkatu zen Gari Elorriaga, Arkupe Sustabiz Kirol Elkarteko kidea, 16 jasoaldigaz. Eneko Bilbaok eta Julen Zengoitiak ere finalerako txartela eskuratu zuten, halaber, hamabosna jasoaldigaz.
Patxi Bilbaok, Arkupe Sustabiz Kirol Taldeko kideak, ordea, ez zuen sailkapena lortu, 11 jasoaldi egin baitzituen. Sustabizko ordezkariaren hitzetan, “ez zen bere egunik onena izan”. Hala ere, nabarmendu du kontuan hartu behar dela bai Bilbaorentzat bai Elorriagarentzat lehen aldia izan zela lehiaketa ofizial batean parte hartzen.
80 kilotik beherako kategorian zazpi harri-jasotzaile lehiatu ziren, eta lehenengo bostek lortu zuten finalerako sailkapena. Jon Onaindiak, Arkupe Sustabiz taldeko kirolariak, lehen postua eskuratu zuen, 15 jasoaldi eginda. Unai Osa iazko txapelduna ere sailkatu zen 13 jasoaldigaz, baita Petre Bulgarea ere, 12 jasoaldigaz. Jon Landaluzek 10 jasoaldi egin, eta sailkatu egin zen. Bosgarren sailkatua, azkenik, Unai Ardeo izan zen, 9 jasoaldigaz.
Sustabizko ordezkarien arabera, Onaindia izan daiteke aurtengo txapelketako faboritoetako bat 80 kilotik beherako kategorian. Finala abenduaren 15ean jokatuko dute Arratzun. Kategoria absolutuko finala, berriz, azaroaren 28an izango da, Zierbenan. Beraz, Arkupe Sustabiz taldeko ordezkariek bi hitzordu garrantzitsu izango dituzte datozen asteetan, Bizkaiko txapelketako azken saioetan.