Santa Katalina, poesiaren eta elkartasunaren aterpe
Oretania Taldearen III. Poesia Senidetzean elkartu dira Gaztela-Mantxako eta Euskal Herriko zenbait olerkari eta musikari. Mundakako Santa Katalian baselizan bilduta, poesia askatasun tresna gisa aldarrikatu dute.
Hitza tresna indartsua da. Hitza ahotsa da, eta hitza ekintza bihur daiteke. Poesiak bildu ditzake hitzak zein ekintzak, eta bildu ditzake hango eta hemengo pertsonak eta errealitateak. Horren testigu izan berri da Mundakako Santa Katalina Baseliza. Oretania Taldearen III. Poesia Senidetzean elkartu dira Gaztela-Mantxako eta Euskal Herriko zenbait olerkari eta musikari.
Irailaren 19an Arrigorriagan eta biharamunean Mundakan egon ziren, errezitaldiak euskaraz, gazteleraz, katalanez zein italieraz osatuz. Arduradunen hitzetan, “batasun espirituaren” eredua izan da poesia eta elkartasuna batu dituen topaketa. Busturialdeko hitzordua Musutruk Mundaka elkartearen elkarlanarekin prestatu zuten, eta bertako kide diren Txabo Aragues eta Arantza Gondrak euren helburu eta lanaren berri eman zieten. Gainera, Gondrak Jose Manuel Etxeita mundakar idazle eta marinelak XIX. mendean egindako Santa Katalinari buruzko bertsoak errezitatu zituen.
Bestalde, Florencio Moneo koordinatzaileak bere ametsak hitzaren inguruan lotzeko gai den kolektiboaren “kemena” nabarmendu zuen, eta sorkuntza prozesuei eta memoriari buruzko errezitaldia osatu zuen: “Orduan, bertsoek itsasadarraren gainean flotatzen zuten bitartean, publikoa txalo zaparrada itxi batean lehertu zen, Mantxako adobearen eta Bizkaiko harriaren arteko lotura antzeztuz”.
Jardunaldia biribiltzeko, Vicente Castellanos kantautoreak biribildu zuen jardunaldia, horrelako topaketak etorkizunean errepikatzeko “poza eta esperantza” agertuz. Amaieran, parte hartzaileek harrotasunez defendatu zuten poesia, “norberaren zentsura gaitzesteko gai den” askatasun-tresna gisa. Horrekin batera, herrien senidetasuna aldarrikatuta, elkarrekin bizitako esperientziak “arrasto ezabaezina eta lotura kultural suntsiezina” utzi dien ziurtasunez agurtu ziren.
