Gorefest jaialdiak hamahiru film labur eta Deabru Beltzen ikuskizuna dakartza Bermeora
Beldurrezko zinemaren epizentro bihurtuko da bihar [uztailak 10] Bermeo. Spookypheria Productions elkarteak hamahiru film labur proiektatuko ditu 20:00etan Nestor Basterretxea aretoan, eta 23:00etan Deabru Beltzen piroteknia eta musika ikuskizuna egongo da herriko kaleetan zehar.
Terroreak, goreak eta suspenseak badute toki bat eskualdean: Bermeoko Gorefest Fantasiazko eta Beldurrezko Zinemaldia. Iaz jaialdiaren 25. urteurrena ospatuta, jaialdiaren 26. aldiak urteroko osagaiak dakartza herrira. Hala, Spookypheria Productions elkarteko kideek bihar [uztailak 10] 20:00etan ipini dute hitzordua Nestor Basterretxea aretoan; sarrerak 6 euroren truke eskuratzeko aukera egongo da.
Hutsik egiten ez duenez, urteroko eskemena jarraitu dute aurtengo jaialdia antolatzeko ere. Lehenengo, film laburren txanda izango da, eta guztira hamahiru izango dira proiektatuko dituzten film laburrak. Gaztelaniazko beste hainbat filmen artean, euskarazko Azpian film laburra ikusteko aukera egongo da, Danel Garai eta Laura Barquin zuzendariena.
Film laburren ostean film luzearen txanda izan ohi den arren, iaz eguraldiaren ondorioz bertan behera geratu zen Deabru Beltzak taldearen emanaldiaz gozatzeko aukera egongo da: “Deabru Beltzen ikuskizuna iazko 25. urteurreneko ekitaldi modura geneukan aurreikusita, baina euria egin zuenez ezin izan genuen egin. Horregatik, aurten berriro ekartzea pentsatu dugu”. Hala, 23:00etan hasiko dute ibilbidea Nestor Basterretxea aretotik, eta Lamerarantz abiatuko dira su eta musika artean. 20 urte baino gehiagoko ibilbidea duen Les Tambours de Feu ikuskizuna eskainiko dute: “Zuzeneko musika, piroteknia eta izugarrizko efektu espezialez osatutako ikuskizuna da”.
Hori gutxi balitz, aretoaren kanpoaldean Gorefest jaialdiko photocall-a ere jarriko dute: “Iaz, 25. urteurrena zela eta, zinemaren sarreran jarri genuen photocall-a, eta aurten ere bertan jarriko dugu”. Gainera, umeek ere edukiko dute goreaz gozatzeko aukera: “Gorekids gunea ere iaz sortu genuen, eta aurten ere jartzea erabaki dugu. Umeentzako ekintza batzuk izango dira, eta Lameran egongo da”. Umeek aurpegia margotzeko, marrazkiak egiteko nahiz puxikekin jolasteko aukera edukiko dute.
Iaz ipinitako photocall-a.Spookypheria Productions
Aurreiritziak, alde batera. Antolatzaileek 26 urte daramatzate Gorefest jaialdia antolatzen, eta gero eta errotuago dagoen arren, gorearen eta antzeko generoen inguruko aurreiritziek hor jarraitzen dutela uste dute. Horregatik, aurreiritziak ahaztu, eta jaialdiaz gozatzera animatzeko deia egin diete herritar nahiz inguruko zinema zaleei: “Askotan gertatu izan zaigu herriko norbaitekin jaialdiari buruz hitz egiten ari garela beldurrezko zinema edo gorea asko ez zaiela gustatzen entzutea, baina gero zinemara etortzera animatzen dira eta beti esaten digute ez dela espero zutena eta oso ondo pasatu dutela. Horregatik, beldurrik eduki gabe etortzera animatu nahi diogu jendeari: ezustekoak egongo dira, bai, baina baita barreak eta emozioak ere. Ez badute inoiz halako zerbait ikusi edo bizi izan, etorri eta gozatzera animatu nahiko genieke”.
Aurreiritziak badauden arren, herrian nahiz inguruan beldurrezko zinemarekiko afizioa badagoela uste dute Spookypheria Productions taldeko kideek: “Bermeon, eskualdean nahiz Bizkaian bertan ere afizioa badagoela uste dut. Ez da gehien kontsumitzen den generoa, baina uste dugu badagoela afizioa. Bilbon esaterako badaukagu jaialdi bat, eta Donostian ere egiten da beste bat. Gainera, dagoen publikoa nahiko fidela da”.
Hala, beldurrezko zinema gustuko dutenen artean jaialdi entzutetsua da Bermeokoa, eta urteroko erantzun ona espero dute aurtengoan ere: “Genero hau gustatzen zaionak badaki jaialdi antolatzen dugula, eta Bermeotik kanpo ere ezagutzen gaituzte, Bartzelonan eta Mexikon, esaterako. Herrian bertan ziurrenik badago jendea ez gaituena ezagutzen, baina hala ere, afizionatuen artean jaialdi ezaguna da eta jende nahikotxo elkartzen da. Urte batzuetan zineman kabitzen diren 123 sarrerak saldu izan ditugu. Normalean, 100-115 sarrera inguruan saltzen ditugu, eta pozik gaude horrekin. Aurten ere, antzeko erantzuna espero dugu”.
Film laburren zerrenda:
-
Amira (Javier Yañez Sanz)
-
Ahora Vuelvo (Lucas Paulino eta Gabe Ibañez)
-
Tenéis Que Verlo (Nacho Solana)
-
Culpable (Ariana Andrade Castro)
-
Azpian (Danel Garai eta Laura Barquin)
-
KillJote (Angel Villahermosa)
-
893 Km. (Ruben Guindo Nova)
-
El Revisor (Jandro)
-
La Elegida (Sergio Morcillo)
-
Historia de un Chico Triste (Carlos Blazquez)
-
Te Debo Una (Santi Capuz eta Diego Jimenez)
-
Killergotchi (Carlos Cobos)
-
Tragedium (Gaston Haag)
