Surfaren bidez, ozeanoen babesari buruzko ingurumen kontzientziazioa bultzatuz
Surfing With Me proiektua Mundakara ailegatu da gaur (ekainak 25), zigarrokinek itsas ingurunean duten eraginari buruz sentsibilizatzeko. Hala, hondartzen eta ozeanoen kontserbazioa sustatzeko hainbat ekintza egingo dituzte gaurkoan.
Zigarrokinek itsas ingurunean duten eraginari buruz sentsibilizatzeko eta hondartzen eta ozeanoen kontserbazioa sustatzeko helburu duen Surfing With Me proiektua Mundakara ailegatu da gaur (ekainak 25). Moving The Planet Fundazioak bultzatu du nazioarteko egitasmoa, eta hainbat herrialde zeharkatzen ari den espedizioak Mundakan geldialdia egitea erabaki du gaurkoan, herria Europako surfaren gune esanguratsuenetako bat baita. Hala, Surfing With Me programaren bidez, Moving The Planet Fundazioak “kirola gizartea eraldatzeko tresna” bihur daitekeela erakutsi gura du, “kostaldeei eragiten dieten ingurumen arazoei buruzko kontzientzia sortzeko gai dena”.
Ekimenak surfa erabiltzen du ingurumen hezkuntzarako tresna gisa, hondartzetan bildutako milaka zigarrokinekin egindako bi surf taula baititu sinbolo nagusitzat. “Taulak hondartzetan egindako garbiketa-ekintzetan bildutako zigarrokinetatik sortu dira, eta oso kutsagarria den hondakin bat ingurumen-sentsibilizazioaren sinbolo bihurtu dugu”, azaldu dute antolatzaileek. Izan ere, taula horiek itsasertzean dagoen hondakin “ugarienetako eta kutsatzaileenetako” horrek eragin dezakeen arazoa ikusaraztea dute helburu. Eta, esan dutenez, ekimenak dagoeneko piztu du hainbat herrialdetako surflari-komunitateen interesa.
Mundakara ailegatzea espedizioaren “etapa garrantzitsuenetako bat” dela onartu dute, “erreferentziazko kokapena” baita. Eta, ondorioz, ingurumen dibulgazioko hainbat ekintza egingo dituzte gaurkoan, tartean proiektuaren dokumental serierako grabazioak egitea eta ozeanoen babesagaz konprometitutako tokiko surflarin topaketa. Hala, Iker Trigueros eta Markel Bizkar egongo dira Mundakan, “itsas kontserbazioaren eta ingurune naturalarekiko errespetuaren mezua indartzeko asmoz”, baita Mundaka Barra Surf eskolako kideak ere.
Espedizioa Galizatik eta Kantabriatik iritsi da Bizkaira, eta bide horretan surf eskolekin, kirolariekin zein jasangarritasunagaz konprometitutako kolektiboekin sare bat ehun du. Eta horretan jarraitu gura dute, ze, hurrengo jardunaldietan Frantzian, Portugalen eta Erresuma Batuan izango dira, “ozeanoak babesteko nazioarteko lankidetza sare bat ezarriz”.
