"Tabu diren gaiak mahai gainean jartzeko gonbidapena da diskoa"
‘Biziraun’ diskoa esku artean, kontzertu biran murgilduta daude Ziraun taldeko kideak. Besteak beste, barikuan Errigoitin eta zapatuan Busturian egongo dira, tabuak aireratzen eta bizirautea aldarrikatzen.
Ziraun taldeko kideak, Aitor Gorosalebelegaz.Ziraun Maiatzaren 7an kaleratu zuten Biziraun diskoa Ziraun taldeko kideek. Jaione Arizmendi Iriarte (ahotsa), Asier Moralen Gregorio (gitarra), Oier Irazabal Urrutia (gitarra), Mikel Conde Duran (baxua) eta Pello Arriola Campillo (bateria) birarako «ilusioz eta energiaz» beteta daude.
Zerengatik edota norengatik bizirauteko mezua zabaltzen duzue zuen bigarren lan honetan?
Ziraunen bigarren diskoa da, eta batetik horri egiten dio erreferentzia. Bestetik, bederatzi abestiko diskoa da, eta horietan jorratzen diren gaiak gutxi aipatzen dira edo tabu dira batzuetan. Ideia da abestietako gai horiek bizirautea denboran. Adibidez, kristalezko belaunaldiaren kontzeptua lantzen da. Batzuetan ematen du belaunaldi horretakoek dena oso garbi daukatela, eta horri erantzun bat ere badago. Emakumeen presentzia, emakumeek egiten zuten lana ere aipatzen da. Askotan, ezin zituzten beraien lanak sinatu izen-abizenekin, eta beste izen batzuk erabili behar izan zituzten, anonimatua gordetzeko. Mezu independenteak dira, ez dago bata bestearen gainetik, baizik eta orokorki gonbidapena egiten du diskoak: tabu diren gaiak mahai gainean jartzeko gonbidapena da. Eta bakoitzak independenteki ere bizirautea izango litzateke mezu nagusia.
Bigarren diskoagaz beste pauso bat ematea bilatu duzue ala lanari jarraipena ematea zen helburua?
Agian, biak batera. Hurrengo pauso bat izan da; beti zabiltza hurrengo datorren horren bila, baina apur bat naturalki etorri da. Taldeak beti gaude sortze prozesu horretan; disko bat sortu, eta hurrengoari begira. Baina uste dugu ez dela izan batere artifiziala; abestiak irteten joan dira, apurka-apurka lantzen joan gara, eta azkenean, forma hori hartu du. Letren partetik ere mezuak batzen joan dira, eta nahikoa organikoa atera den zerbait izan da. Estilo aldetik, berriz, rock euskalduna da estilo nagusia, euskaraz, eta puntu ilun batzuekin, baina ahots melodiko batekin.
Sorkuntza prozesuari dagokionez, zenbat denboran ondu duzue ‘Biziraun’?
Urtebete pasatxo iraun du sorkuntza prozesuak. Egia da ideia batzuk bageneuzkala aurretik; ideia zaharragoak zirenei forma eman eta abesti bihurtu ditugu. Aurreko urtean zehar biran geunden, baina entseguetan ideia berriak atera ziren, eta ideia horiek landu ditugu parte instrumentaletik. Gehienetan, hori lantzen dugu lehendabizi, eta gero ahotsaren melodia eta letra sartu. Normalean, letrak dira azken heltzen direnak.
Noiz hasi zenuten estudioko lana?
Abenduan sartu ginen estudiora. Arratzun, Jon Urriolabeitiagaz grabatu dugu diskoa; aurrekoa ere berarekin egin genuen, eta oso pozik geratu ginen. Presa handi barik, baina pausa barik egin dugun zerbait izan da. Abendu osoa egon ginen grabatzen, baita urtarrilaren parte handi bat ere. Behin grabaketa amaituta, nahasketa prozesua Jon Badiolagaz egin genuen Ondarroan, eta beragaz ere oso gustura egon ginen. Berak ere bere sormen puntua eman die kantei. Azken ukitua, masterizazioa, Kataluniako estudio baten egin dugu, Victor Garciagaz. Beraz, diskoa hiru estudiotatik pasatu da, eta bakoitzak bere ekarpenak egin ditu.
‘Floema’ abestia Aitor Gorosabelegaz egin duzu eta ‘Zure ispilu bakarra’, Vittersweet-egaz. Nola sortu zitzaizkizuen aukera horiek?
Floema nahikoa rockeroa da, eta Zure ispilu bakarra rockaren barruan, baina blueseroagoa da, eta bai Aitor Gorosabelek, bai Vittersweek oso ondo enkajatzen zuten estilo horietan. Atea jo genien, eta parte hartzeko oso prest agertu ziren, beraien ideiak ekarriz, gainera. Bai Aitorrekin, bai Bertarekin oso ondo bat egin genuen. Guretzat plazera izan da. Profesionalki ezagutzen genituen, eta pertsonalki ere ezagutu ditugu. Biak oso umilak dira, eta oso prest egon dira ideiak jasotzeko eta ideiak proposatzeko. Oso ondo pasatu dugu, eta hori da inportanteena, eta emaitza politak geratu dira.
Argazkia: Ziraun
Besteak beste, zuen lan berria Gernika-Lumon erakusteko aukera eduki duzue. Oro har, zelako harrera eduki du diskoak?
Harrera oso-oso ona eduki du, eta oso pozik gaude. Diskoa ateratzeaz gain, Aitor Gorosabelekin daukagun Floema kolaborazioaren bideoa ere atera genuen, eta bai diskoak, bai bideoak harrera oso ona eduki dute. Orokorrean, oso ondo doa dena. Aurreko biran ere, konposizio fase horretan geundenez, abestiren bat edo beste jo genuen, publikoaren feedback-a zein zen jakitearren. Baina Deustuko jaietako kontzertua izan zen Biziraun biraren lehenengo kontzertua, martxoan. Jende asko etorri zen, eta ikusi genuen ezagutzen ez genituenak ere oso gustura zeudela. Maiatzaren 22ko Gernikako aurkezpenean, ingurukoak, gertuagokoak egon ziren, eta aukera eduki genuen diskoa gehiago azaltzeko, abesti bakoitzaren berezitasunetan sakontzeko.
Beste ikus-entzunezkoren bat kaleratzeko asmoa al daukazue?
Iaz Gernika-Lumoko Auditorioan jo genuenean, set osoa akustikorako moldatu genuen. Akustikoan, ideia originala defendatuta, kantak moldatu, eta beste kutsu bat ematen diegu. Eta lan hori aldarrikatzeko edo zabaltzeko, aurreko urtean zuzeneko bat grabatu genuen Auditorioan. Disko honetan argitaratu den kanta bat da, baina bertsio akustikoan, eta hori ere zabaltzeko asmoa daukagu. Gure alderdi hori ere aurkeztu gura dugu. Prest daukagu, baina oraindik diskoa bere formatu originalean zabaltzen gaude.
“Beti konposatzen dugu zuzenekoetan pentsatzen”
Barikuan Errigoitin eta etzi Busturian egongo zarete. Zer eskaini nahi duzue?
Lehenengo eta behin, jendea diskoa entzutera gonbidatu nahi dugu. Beti konposatzen dugu zuzenekoetan pentsatzen. Plataforma digitaletan entzuten duten hori eta gero zuzenean entzungo dutena oso antzekoa izango da, baina zuzeneko energia hori gehituta. Gure musika gustuko dutenek zuzenekoak disfrutatuko dituzte. Gainera, inguruko kontzertuetan gure ingurukoen babesa edukitzen dugu, eta giro polita ziurtatzen da. Diskoa atera berri da, eta zuzenekoetan defenditzea dagokigu. Data batzuk badauzkagu, eta bide horretatik jarraitu gura dugu, diskoa jendearekin partekatzeko. Orain zuzenekoetan disfrutatzea tokatzen zaigu, eta aurrera joateko ilusioa eta energia dauzkagu. Kontzertuak jotzeko eta Euskal Herria ezagutzeko oso prest gaude.
Gernika-Lumoko Arbolapean zikloan ere egongo zarete beste behin. Zer suposatzen du zuontzat horren parte izateak?
Aurreko urtean buelta bat ematea erabaki, eta akustikoa eskaintzea erabaki genuen, uste dugulako arratsaldez izanda, edozein entzulerentzat erakargarriagoa eta entzuteko errazagoa izan litekeela. Iaz feedback oso-oso ona eduki genuen. Auditorioa beteta egon zen, eta txalo zaparra itzela jaso genuen. Jendearen komentarioak ere oso onak izan ziren. Aurten ere ilusio bera daukagu. Disko berria formatu horretara egokitzea ere erronka polita izango da, prestatu beharko dugu.
Horrelako zikloak garrantzitsuak dira zuontzat. Herrietan horrelako espazioak beharrezkoak dira?
Guretzat ia-ia dena da hori. Eszena handietan oraindik ez daukagu lekurik, eta beraz, gaztetxeetan eta oro har herrietan sortzen diren horrelako mugimenduetan jotzeko aukera edukitzea garrantzitsua da. Horiek dira gehienbat dauzkagun aukerak. Talde asko gaude egoera horretan, eta nahi ez arren, zure lekua egiteko lehia dago. Gauza txikiak egiten ditugu, baina zortea ere eduki dugu, eta leku handietan jo dugu: aurreko urtean ZEID Fest Gaztea lehiaketa irabazi, eta jaialdian jotzeko aukera eduki genuen, Bilboko Metroko lehiaketan ere parte hartu eta jo genuen, BBK Bilbao Music Legends jaialdian ere bai… Jende berriak entzun gaitu, kontaktuak egin ditugu, eta horrek ere lagundu digu. Alde horretatik, ateak ireki zaizkigu. Gauza txikiak egiten goaz, baina gero eta gauza handiagoak ere bai, eta bietatik egiteko prest gaude.
