Ondarroa, Isuntza, Bermeo eta Mundaka, garaile
Ondarroak Bizkaiko Trainerilla Ligako bosgarren eta seigarren estropadak hartu ditu iragan asteburuan. Asteon, Bizkaiko Trainerilla Txapelketa lehiatuko dute, agertoki berean.
Batel sasoiaren ondoren, arraun taldeak trainerilla denboraldian bete-beten murgilduta daude. Iragan asteburuan, Ondarroak Bizkaiko Trainerilla Ligaren bosgarren eta seigarren jardunaldiak hartu zituen, eta datorren asteburuan, berriz, Bizkaiko Trainerilla Txapelketa lehiatuko dute bertan.
Zapatuko bosgarren jardunaldian, Ondarroak garaipen handia lortu zuen etxeko jarraitzaileen aurrean, emakumezkoen absolutu mailan; etxeko arraun klubak 16.29,10eko erregistroa sinatu zuen. Isuntza hirugarrena izan zen; 16.54,72koagaz. Gizonezkoen artean, berriz, Bermeo A nahieran azaldu zen (14.15,63), eta bigarren sailkatu Zierbena baino ez zen gai izan harengana hurreratzeko. Bermeotarrek, garaipenaz gain, hirugarren postua lortu zuten C taldeagaz (14.38,16) eta laugarrena, berriz, B taldeagaz (14.50,43). Ondarroa B eta A, hurrenez hurren, zazpigarren (15.12,43) eta zortzigarren (15.17,55) izan zen. Elantxobe (15.52,63) eta Mundaka (16.05,07) sailkatu ziren ostean.
Emakumezko gazteen kategorian, etxekoek erabateko nagusitasunez (16.54,12) lortu zuten garaipena, Isuntzaren (17.31,63) eta Mundakaren (17.41,92) aurretik; lehia hartako sailkapena Elantxobek (18.36,73) osatu zuen. Gizonezkoen artean, laugarren baino ezin izan ziren sailkatu ondarrutarrak (15.36,18), Itsasoko Ama garailearengandik urrun samar. Are urrutiago helmugaratu ziren, sailkapeneko azken postu bietan, Isuntza (16.11,48) eta Mundaka (16.12,24).
Emakumezko kadete mailan, baina dinamikak errotik aldatu ziren: Isuntzak garaipen argia lortu zuen (08.13,41), euren artean lehia estua eduki zuten Elantxobe (08.30,42) eta Ondarroa (08.31,12) menpean hartuta. Mundakak urrunagotik (08.39,35) ikusi behar izan zuen lehen postuetarako borroka hura. Gizonezkoen estropadan, hala hirugarren sailkatutako Isuntza (07.32,82), nola seigarren amaitu zuen Mundaka (07.46,17) Deustu irabazlearengandik aldenduta aritu ziren.
Bigarren lehia eguna.
Bezperan egin modura, Bermeo Ak eta Zierbena Ak lehia borrokatua eduki zuten domekako seigarren liga estropadan, eta berriro ere bermeotarrak garaile suertatu ziren (13.58,34). Bi klub haien ondoren, gainontzekoen arteko aldean apalagoak izan ziren. Bermeo C-k hirugarren postua (14.23,53) errepikatu zuen, eta ia hogei segundo beranduago (14.42,91), bosgarren, helmugaratu zen Ondarroa B. Bai Elantxobe, bai Mundaka sailkapenaren beheko postuetatik urrundu ezinik ibili ziren. Emakumezko absolutuen estropada Kaikuk irabazi zuen, eta Ondarroa bigarrena (17.05,71) izan zen.
Emakumezkoen gazte mailan, Busturialdeko klubak baino ez ziren aritu: Mundaka eta Elantxobe. Lehenengoek erraz (17.13,59) poltsikoratu zuten estropada, aurkariari minutu bitik gorako aldea (19.28,56) urratuz. Gizonezkoen artean ere, laugarren sailkatutako Mundaka (15.24,54) izan zen Zierbena garailearengana gehien hurbildu zen kluba, Ondarroaren (15.28,41) aurretik.
Kadete mailan, Isuntzak egundoko maila uretaratu zuen berriro, eta kategoria horretako emakumezko eskifaiarik sendoena dutela frogatu zuten lekeitiarrek. 08.23,05ean lanak biribilduta, hiru segundoko aldea (08.26,18) atera zieten ondarrutarrei, eta hamabostetik gorakoa laugarren sailkatu ziren elantxobetarrei (08.39,04). Gizonezkoen estropadan, Deustu nagusitu zen berriro, baina bezperako estropada postu batekin hobetu zuen: bigarren sailkatu zen (07.27,98). Mundaka hirugarren postutik hiru segundotara (07.36,19) geratu zen lehia hartan.
