'Gernikako Txoria', itxaropenerako mezua Gazaraino iritsi dadin
Eskuahaldunak Eskultoreen Elkartearen 'Gernikako txoria' obra erraldoia Gernika-Lumora ekarri du Gernika-Palestina Herri Ekimenak, eta apirilaren 27a [astelehena] bitartean Jose Labauria plazan egongo da ikusgai.
Gernikako bonbardaketaren 89. urteurrenaren testuinguruan, Eskuahaldunak Eskultoreen Elkarteak sustatutako Gernikako txoria eskultura erraldoia Gernika-Lumora ekarri du Gernika-Palestina Herri Ekimenak. Gernikan artearen balio politikoa eta salaketarako, konpromisorako, elkartasunerako eta ahotsa altxatzeko duen indarra “inon baino gehiago” ulertzen direla uste dute antolatzaileek, eta horregatik, “zentsu guztia” duela udalerriarentzat zein gernika-lumotarrentzat berezia den efemeride batean hegazti erraldoia Gernikan egoteak. Atzo iluntzean egin zuten aurkezpen ekitaldia Jose Labauria plazan, eta bertan egongo da eskultura ikusgai, apirilaren 27a bitartean [astelehena].
Eskultura Palestinarekin duten konpromisoa berretsi eta elkartasuna adierazi asmoz egin dute Eskuahaldunak Eskultoreen Elkartekoak eta horregatik, Gaza gara mezua txertatu dute eskulturan, arabieraz idatzita. Guillermo Olmo elkarteko presidente eta Gernikako txoriaren egileetako batek atzo azaldu zuenez, “esperantzazko mezua” transmititzea izan dute helburu: “Picassok Guernica margolanean hainbat elementu txertatu zituen baina, elementu guztien artean, hegaztia da esperantza adierazten duen bakarra”. Hegaztia maiz uso gisa izendatu bada ere, etxeko hegaztia dela argitu zuen Olmok, Gernikako merkatuan ikus zitezkeen hegaztiak direlako: “Hegazti horrek basakeria osteko esperantza irudikatzen du, bere hegoekin ihes egiteko aukera duen animalia delako”, azaldu zuen egileak.
Euskal Herriak Palestinarekiko duen elkartasuna beste hainbat herrialdetara zabaldu beharra dagoela ere aldarrikatu zuen eskultureak, Isralgo estatua Palestinako herrian egiten ari den genozidioa Iranen eta Libanon ere ikusi daitekeelako: “Israel ez da konformatzen; ez du nahikoa Gaza suntsitzearekin, Zisjordania erasotzen jarraitzen du. Gu ez gara geldituko hiltzaile horiek guztiak egiten ari den genozidioarengatik epaituak izan arte”.
Aurkezpen ekitaldiak Preso Politikoen Nazioarteko Egunagaz bat etorri zela baliatuta, Ibon Meñika Gernika-Palestina Herri Ekimeneko bozeramaileak Euskal Herriko zein Palestinako preso politikoak gogoratu zituen. Izan ere, gaur gaurkoz “100 euskal preso politiko” daude gatibu espetxeetan, eta 10.000tik gora, Palestinar herrian: “Horrez gain, 3.500 pertsona atxilotze administratiboan daude, Israelek asko aplikatzen duen metodoa baita: inongo arrazoi juridiko gabe atxilotu eta espetxeratzen dituzte, eta sine die —datarik edo eperik gabe— espetxeratuta mantendu. Hainbat egoeratan auziak urte pila bat luzatu dira, epaituak izan barik eta arrazoi juridikorik gabe, errepresiorako bide bihurtuz”. Israeleko espetxeetan gatibu dauden 300 ume palestinar daude.
Francesa Albanese giza eskubideen aldeko ekintzaile eta Palestinara begirako errelatore garrantzitsuenetakoak torturaren inguruan egindako azken txostena ere gogora ekarri zuen Meñikak, Israelek nagusiki preso politikoei aplikatu dizkien “tortura sistematikoa” jaso duelako: “Gure mugikorretan ere ikusi ahal izan dugu Israelgo armadak erabiltzen dituzten tortura metodoen apologia egiten duela, sare sozialetan zabaltzen dituztelako: hori da estatu genozida izatearen arrazoietako bat”.
Arabieraz idatzitako ‘Gaza gara’ mezua irakur daiteke eskulturan.
Politikoki Mediatikoki “bigarren mailako agendan” gelditu dela sentitu arren, Gazako gaur gaurkoz “genozidio baten dimentsio guztiak bere horretan dirautela” aldarrikatu zuten Gernika-Palestina Herri Ekimenetik, Israelek “genozidioa zabaltzeko anbizioz” jarraitzen duela salatzeagaz batera: “Genozidioak bere horretan dirau, duen garrantzia eta lazgarrikeria guztiarekin; gainera, genozidioaren metodo guztiak hedatzeko anbizioz jarraitzen dute. Ez diogu guk, Netanyahu berak aipatu izan du azken asteetan Gazan aplikatutako metodo guztiak hedatzeko asmoa duela, eta bereziki Libanoko hegoaldean aplikatuko dituela. Horrek esan nahi du herri oso baten desagerpena bultzatzeko edozer egiteko gai dela”.
Nazioarteko arautegia betearazten ez dela ere salatu zuten, indarraren eta genozidioaren logika mantentzen bada “alternatiba bakarra Oihanaren legea” delako: “Indar gehien duenak bere nahi guztiak ezartzea. gaur egun Israel egiten ari den bezala, eta herri xume guztiek hori pairatu eta desagertzeko zorian egotea”. Horregatik, Nazioarteko arautegiak betetzearen aldeko apustua egiteak une honetan “garrantzi berezia” duela aldarrikatu zuten, genozidioaren erantzuleek gerra krimenengatik eta gizadiaren aurkako krimenengatik dagokien instantzian epaituak izan daitezen.
Hala, gaur egun Gernikatik erantzukizunez ahotsa altxatzeak inoiz baino garrantzia bereziagoa du, “historiaren zein aldetan gauden erakusteko”: “Gu herrien alde gaude; elkartasunaren alde gaude, justiziaren alde eta askatasunaren alde; horregatik, gure txoriak adierazi du ez dugula Gernika gehiagorik nahi, ez hemen, ez inon”.
