Berbak, euskararen inguruan herritarrak aktibatzeko zubi
“Bizkaian bagara. Berbak zubi” egitasmoaren lehen urteak 20 herritako askotariko herritarrak aktibatu ditu euskararen inguruan, tartean Gernika-Lumokoak eta Ondarrukoak.
Euskararen erabilera handitzea, hizkuntzaren biziberritze prozesuan pauso berriak ematea eta biztanleria sektore berrietara normaltasunez hurbiltzea dira Bizkaian Bagara. Berbak zubi egitasmoaren ardatz nagusiak, eta, urtebeteko lanaren ostean, euskararen erabileraren inguruan askotariko bizkaitar euskaltzaleak aktibatzea eta antolatzea lortu dutela adierazi dute Bizkaiko Foru Aldundiko ordezkariek. Izan ere, iazko martxoan jarri zuten egitasmoa martxan, eta dagoeneko Bizkaiko zortzi eskualdetako 20 herritara iritsi da proiektua, tartean Gernika-Lumora eta Ondarroara.
Egitasmoa aurrera eroaten ari den Taupa Mugimenduko Jaione Mendizabalek azaldu duenez, eremu bakoitzeko hizkuntza errealitatearen arabera “modu eta adin oso desberdinetako” biztanle taldeetan lan egin dute euskara aktibatzeko eta gizarte osoa euskarara hurbiltzeko. Eta mota desberdinetako proiektu horiek lurraldearen euskararen saretzearen eta aktibazioaren araberako diagnosian oinarrituta eroan dituzte aurrera. Ze, erabileran eragiteko hiru lan ildo eta esku-hartze sorta bat irudikatu dituzte. Hurrengoak dira lan ardatzak: gazteen eta familien arteko euskararen erabilera sustatzea; tokian tokiko euskaltzaleen aktibazioa eta saretzea; eta, aniztasunaren kudeaketa.
Esaterako, bai Gernika-Lumon, bai Ondarroan elkarrizketa musikatuak egin dituzte, gazteen eta familien arteko euskararen erabilera sustatzeko lan ildoaren baitan. Musika aitzaki hartuta, gazteen euskararekiko lotura indartu eta sentsibilizazioan eragin gura izan dute elkarrizketa musikatuekin, kulturgile erreferenteek euren hizkuntza bizipenak partekatu baitzituzten DBHko 12 eta 16 urte bitarteko 2.074 gazterekin, iazko urriaren eta azaroaren bitartean.
Bestalde, familia transmisioa lantzeko, Euskararen Kriseilua ekimena garatu dute Enkarterriko 9 herritan. Hamabi ikastetxek eta 298 familiak hartu dute parte eremu intimoan euskararen erabileraren inguruko gogoeta sustatzen duen ekimenean. Saio horietan, familiak euskara gehiago erabiltzeko konpromiso zehatzak hartzera gonbidatu zituzten.
Tokian tokiko euskaltzaleen aktibazioa eta saretzea bultzatzeko bi motatako prozesu parte-hartzaileak egin dituzte: Gogoeta saioak eta Batera jauzi prozesua. Euskaltzaleen sarea zabaldu eta aberasteko izan dira Gogoeta Saioak, eta, horietan, tokiko hainbat eragile eta herritarrek elkarlanean jardun dute euren herriko errealitatea euskaldunagoa izan dadin zer egin gogoetatzen. Batera Jauzi prozesuak, berriz, hamarraldi batez herria euskaldunagoa izatea bilatzen du, tarte horretan adostutako baldintzetatik abiatuta eta horiek lortzera begira, Herri ituna aurkezteko.
Eta, hirugarren lan ildoan, elkarrizketan oinarritutako herri dinamikak egin dituzte, hizkuntza eta kultura aniztasuna bistaratzeko eta balioan jartzeko. Euskaratik urrun bizi diren herritarrak gertuago daudenekin euskarari buruz elkarrizketan jartzea bilatzen dute.
Leixuri Arrizabalaga Euskara, Kultura eta Kirol diputatuak ekimenak bizkaitarren aldetik izan duen “harrera ona” azpimarratu du, eta euskararen aldeko indarrak batzen segitzeko deia egin zien herritarrei. Izan ere, egitasmoa Bizkaiko 12 eskualdeetara zabaltzen jarraituko dute, 30 udalerritan proiektu desberdinak garatzeko. Esan dutenez, 49 esku hartze dinamizatuko dituzte, urtean hiru.
