Zaintza oinarri duen sukaldaritza tailerra eskainiko dute
'Zaintzarako-sukaldaritza' tailerra Bermeoko gizonei zuzenduta dago. Otsailaren 26an [eguena] eta martxoaren 5ean [eguena] egingo dituzte saioak, eta izen ematea dagoeneko zabalik dago.
Sukaldearen bidez ume zein edadetuen zaintzarekin lotutako eguneroko erronkez hausnartzeko aukera eskainiko duen Zaintzarako sukaldaritza tailerra antolatu du Bermeoko Udalak. Gizonei zuzendutako ekimenak sukaldaritza izango du abiapuntu, eta Bermeoko Gizarte eta Kultura Etxean egingo da, bi saiotan banatuta. Otsailaren 26an [eguena] eta martxoaren 5ean [eguena] jarri dituzte hitzorduak, 18:00etatik 20:00etara bitartean biak. Interesa dutenek dagoeneko zabalik dute izena-emateko aukera, Berdintasun Sailaren bitartez: berdintasuna@bermeo.eus helbide elektronikora idatzi edo 688 63 84 49 telefono zenbakira deituta egin daiteke.
Udaletik zehaztu dutenez, tailer praktikoa izango da, eta errezetak ikasteaz harago, zaintzari loturiko erronkak ere jorratuko dituzte, parte hartzaileei “elikadura osasungarria modu erraz, azkar eta errealistan” antolatzeko tresnak eskainiz. Hala, saioetan plater osasuntsuaren oinarriak bereganatu eta etxean erraz kopiatu ahal izango dituzten errezetak prestatuko dituzte, Samurrak Elkarteko kide diren Aritz Resinez Ruizen eta Onekin Nutrizioko Andres Larrea Garcia eta Nahia Zeziaga Bengoa nutrizionisten eskutik.
Diziplina osagarrietatik abiatuta, profesionalek nutrizioari, zaintzari eta eguneroko bizitzari lotutako ikuspegi praktikoa eskaintzea bilatuko dute, teoria eta sukaldaritza-lan praktikaoa eskainiz. Horregatik, elikagai nagusiak, proteinak eta barazkiak “modu orekatu eta praktikoan” uztartzeko moduak ezagutzeaz gain, erosketa eta eguneroko antolaketa uztartzeko moduak ere landuko dituzte tailerrean, “denbora aurreztu eta elikadura-ohitura osasungarriak sendotzeko” helburuagaz.
Sukaldaritza-lanarekin batera, Zaintzarako sukaldaritza tailerrak elkarrizketarako eta esperientzia pertsonalak partekatzeko aukera ere eskainiko du, “elkar-entzunerako gune modura” pentsatuta baitago: “Parte hartzaileek esperientziak partekatu, ikasi eta elkarrekin hausnartzeko aukera izango dute: nola bizi da aitatasuna egunerokoan, zer gertatzen da zaintza gure gain hartzen dugunean,e ta nola eraldatzen diren harremanak ardura horiei lekua egiten diegunean”.
Arantza Ormaza Tarantino Bermeoko Udalako Berdintasun zinegotziak Bermeoko gizonak animatu ditu ikastaroan parte hartzera, zaintza “egunerokoan egiten diren keinu txikietan” hasten delako, elikadura keinu horietako bat izanik: “Tailer honek gizonezkoentzako espazio atsegine eta segurua eskaintzen du, sukaldean trebatzeaz gain, zaintzari buruz pentsatzeko eta elkar entzuteko. Bermeoko gizonak animatu nahi ditugu pausoa ematera”. Halaber, izena-ematen dutenek amantala eta tupperak eraman beharko dituztela gogoratu du, tailerrean prestatutako jakiak etxera eman ahal izateko.
