Emakume bat atxilotu dute Gernika-Lumon, senarra hiltzea egotzita
Autopsiak ondorioztatu du 62 urteko gizonaren heriotzak "jatorri bortitza eta etiologia hiltzailea" zuela. Emakumea polizia egoitzara eraman dute eta izapideak amaitzean, agintari judizialen esku geratuko da.
Eusko Jaurlaritzako Segurtasun Sailak jakinarazi duenez, Ertzaintzako Bizkaiko Ikerketa Kriminaleko Lurralde Zerbitzuko agenteek 54 urteko emakume bat atxilotu dute gaur [otsailak 11] Gernika-Lumon, 2025eko azaroaren 22an bikotekidea hiltzea leporatuta.
Zehaztu dutenez, Larrialdietako Zerbitzuak dei bat jaso zuen orduan, bizilagun bat senarra ohetik erori eta estimuluiei erantzuten ez ziola eta, laguntza eske zegoenaz ohartarazteko. Polizia eta osasun larrialdiak bertaratu ziren, baina heriotza baieztatu besterik ezin izan zuten egin; orduan, biktimaren gorpua Auzitegi Medikuntzako Euskal Institutura eraman zuten, autopsia egitera.
Hala, autopsia izan da biktimaren heriotzak “jatorri bortitza eta etiologia hiltzailea” zuela egiaztatu duena. Izan ere, gorpuak kolpeen ondorioak ziren “hainbat kontusio eta haustura” zituen bai gorputzean, bai buruan. Informazio hori jasotzean Ertzaintzak ikerketa abiatu zuen, eta orduan jakin zuen erasotzailea hildakoaren emaztea zela.
Gaur atxilotu dute emakumea, eta segituan polizia-egoitzara eraman dute, dagozkion eginbideak hasteko. Horiek bukatzean, agintari judizialaren esku jarriko dutela zehaztu dute.
