Artez eta disidentziaz bete dute Astra
Euskal ArtQueer topaketak Gernika-Lumoko Astra hartu zuen, eta emakumeek dragean duten presentzia erakustea bilatu zuten. Gernika-Luma eta Errementa Armaidxuek taldeko kideek Busturialdeko komunitatearen "saretze ekimen bezala" hartu zuten jaialdia.
Astra gorputzez, artez eta disidentziaz bete zuten zapatuan (urtarrilak 24). Euskal ArtQueer topaketak Gernika-Lumoko espazioak hartu zituen, eta komunitateko kideek gorputzekin oihukatu zuten. Izan ere, erakutsi zuten queer-ak ez duela tokirik eskatzen, tokia sortu egiten duela.
Euskal ArtQueer topaketa da, sarea da, erantzun politikoa da, bazterrera bultzatu dituztenen ikusgarritasuna da. “Disidentziatik sortutako kultura da Euskal ArtQueer: luma, distira eta amorrua”, esan zuten Errekaldeko House of Basque Queers izeneko elkarteko antolatzaileek, artea politikoa dela gehituz. “Drag-a erresistentzia da, baina jaia ere bai”.
Hala, emakumeek dragean duten presentzia erakustea bilatu zuten drag showean, baina ez zen ekintza bakarra izan: 2994 erakusketa ikusgai egon zen Astran, eta, giroa berotzeko asmoz, Gernika-Lumak eta Bermeoko Errementa Armaidxuek poteoa antolatu zuten elkarlanean. Eta, egitarauagaz amaitzeko, Dj-a eta jolasak antolatu zituzten.
Antolatzaileek arte queer.a bizirik dagoela ondorioztatu zuten jaialdiaren ondoren, elkarregaz “are indartsuago” dagoela gehituta: “Artistei, drag-eko emakumeei, sareari eta komunitateari: zuen indarrik gabe hau ez litzateke existituko”.
Gernika-Luma eta Errementa Armaidxuek taldeko kideek Busturialdeko komunitatearen “saretze ekimen bezala” hartu zuten jaialdia, eta elkar ezagutzeko eta eskualde mailan babesleku bat izateko lehenengo pausoak emateko baliatu zuten: “Gure arteko sarea ehuntzeko balio izan zuen. Ze, Bermeon talde modura hasten gabiltza, eta Gernikan denbora daramaten arren indarra galtzen ibili dira. Beraz, oso garrantzitsua eta oso interesgarria izan da batzea eta elkar zaintzea, elkar ezagutzea”. Diotenez, bi taldeen arteko proiektu “berri” asko bururatu zitzaizkien zapatuko jaialdian, indarrak batzeko unea izan zela aprobetxatuta.
“Elkarrekin batzea izaten da garrantzitsuena. Alboan gauden herri bi gara, baina komunitateko kideok elkar ezagutu ere ez ginen egiten, eta zapatuan ikus genuen denok ditugula istorio berdin-antzekoak. Polita izan zen batzea eta elkar ezagutzea”, gehitu dute kideek.
Eta, Euskal ArtQueer jaialdia bezalako espazioak sortzeak “garrantzia handia” daukala onartu dute. “Ze, horrelakoak sortzen ditugun bakoitzean ikusten dugu gero eta jende gehiago batzen dela taldera. Orain arte babestuta sentitzeko edo gozatzeko horrelako espaziorik izan ez dutenak hurbiltzen dira, ilusioz, eta hori ederra da, babestuta sentitzen direlako. Horrek horrelako espazioak sortzen jarraitzeko gogoa ematen digu”, azaldu dute. Izan ere, horrelako espazioen beharra dagoela sentitzen dute, batez ere herri txikietan, horietatik kolektiboko jende asko hiriburuetara joaten delako: “Hiriburuetatik kanpo horrelakoak antoaltzea ezinbestekoa da. Ze, orain arte, bai Gernika-Lumon, bai Bermeon sexilioa deitzen diogu hori gertatu izan da. Alegia, kolektiboko herritarrek hiriburura jo behar izan dute horrelako giroak edo babesguneak topatzeko. Eta, norbere herrian gustura egon ahal izatea, musika entzun, dantzan egin eta kolektiboko jende gehiago ezagutzeko aukera izatea ederra da”.
Orain arte ez direla horrelako topagune asko egon diote, baina mugimendua nabaritzen hasiak dira, geroz eta topaketa edo talde gehiago sortzen direla ikusten baitute: “Eta hori behar da. Herrietan ere horrelako giroak lortu behar dira”.
Jaialdiari dagokionez, “jende pilo bat” batu zela esan dute, herri desberdinetakoa, eta “giro oso polita” sortu zutela denen artean: “Asko gozatu genuen. Erakusketa ere ondo egon zen, baliteke labur geratu izana, artista gehiago ekartzea interesgarriagoa izango litzatekeelako, badaudelako kolektiboko artista asko. Drag-en ikuskizuna ikusgarria izan zen”.
