Txapelak, lehengo lepotik burua: Xabier Barandika, garaile
Xabier Barandika gernika-lumotarrak eta Imanol Lopez zumaiarrak bigarren urtez jarraian poltsikoratu dute Jai Alai Ligaren gizonezkoen Lauko Finala. Emakumezkoen finalean, Elaia Gogenola eta Maia Goikoetxea bikote berriatuarra nagusitu da.
Argazkia: Eraman Jai Alai. Esaerak argi dio: birritan datorrena, hirugarrenez ere aurki. Lezio hori sobera ikasia dute Xabier Barandikak eta Imanol Lopezek. Jai Alai Ligaren iazko garaileek ez zuten beraien besaulkitik jaisteko inongo asmorik, eta ez zuten inolaz ere egin. Gernika-lumotarrak eta zumaiarrak beraien hautagaitza berretsi zuten atzo [irailak 29] Donostiako Carmelo Balda pilotalekuan, eta bigarren urtez jarraian poltsikoratu zuten ligaren Lauko Finala. Eñaut Urreisti mutrikuarraren eta Thibault Basque bidartarraren gaztetasuna eta energia ez ziren nahikoa izan beteranoen joaren aurrean, eta merezimendu osoz lortu zuten txapela. Emakumezkoen lehia estuagoa izan zen, hiru setetara, eta azkenean Elaia Gogenola eta Maia Goikoetxea berriatuarrak izan ziren estreinako Lauko Finalaren irabazleak, Arai Lejardi markina-xemeindarraren eta Oihana Sorozabal miarriztarra menpean hartu ondoren.
Argazkia: Eraman Jai Alai.
Aritz Erkiaga ispastertarraren eta Gorka Sorozabal miarriztarraren aurkako finalaurrekoan, Barandikak eta Lopezek txapeldunei darien usaina kantxaratu zuten, eta inongo pitzadurarik gabeko garaipena lortu zuten. Elkarren arteko konexio apartarekin, beraien koroa bigarrenez berresteko hautagai zirela frogatu zuten. Finala, baina, Urreistiren eta Basqueren alde abiatu zen, bikote beilegiak jokoaren exijentzia koska bat igo zuten arte. Horien egitekoa argia zen: Barandikak aurrealdeko koadroetan jokaldiak errematatu behar zituen; Lopezek, aldiz, pilota errebote hormaren behealdera bidali zuen. Zumaiarrak pilota kantxaren hainbat eremutara bidali zuen; hala, Urreistiri errebotera sartzea galaraztea baina Basquek gogotik sufritzea lortu zuen. Ez errematerik, ez dominantziarik. Estrategiak fruitua eman zien, lehen seta 6 eta 15eko markagailu argi eta garbiarekin eskuratu baitzuten. Urreistik eta Basquek argi-ilunak tartetako zituzten, eta beraien arerioak, berriz, ezelako arrakala barik aritu ziren.
Xabier Barandika: “Lauko Finalera ozta-ozta sailkatu arren, Imanol Lopezekin jokatzea erabateko bermea da”
Lehen seta gorabehera, bikote moreak partiduan oso sartuta eta erabateko kontzentrazioz jarraituzuen bigarrena hastean. Lan mental hari esker, uneoro setaren lehian murgilduta aritu ziren, eta horiek lanak izan zituzten, lehen jokoan bezala, markagailuan aldeak zabaltzeko. Basquek aldeak egin zituen errebeskadaz; tarteka-marteka, bidartarra izan zen moreen sostengua. Launa, seina, zortzina edota hamarna berdindu zuen bere jokaldiei esker. Aurrean, Urreistik eta Barandikak erremateak txandakatu zituzten. Setaren azken zatian, horiek berriro aurrea hartu zuten, eta gernika-lumotarra, ebaki eder bat tarteko, arduratu zen seta zarratzeaz eta txapelek dagozkien buruetara egingo zutela ziurtatzea: 12 eta 15ekoa, Barandikaren eta Lopezen alde. Lauko Finalera doi-doi sailkatu arren, Lopezekin jokatzea “erabateko bermea” dela adierazi zuen aurrelariak: “Txapelketa bikaina jokatu dugu. Lehen setean, markagailuan aldeak ezarri ditugun arren, gogotik lan egitea tokatu zaigu. Behar horrek denak isla bigarren set amaiera fisikoki gaitza izatea ekarri du”.
Argazkia: Eraman Jai Alai.
Aitzindariak.
Emakumezkoen lehendabiziko Lauko Finalari dagokionez, Gogenolak eta Goikoetxeak hiru set behar izan zituzten, Lejardi eta Sorozabalen aurka gailentzeko. Berriatuar bikoteak partidua irauli egin zuen, lehen setean Lejardiren dominantziaren menpe egon ondoren. Markina-xemeindarrak eskumaz min handia egitea lortu zuen, eta, gainera, Sorozabal miarriztarraren laguntza ere eduki zuen, aurten aurrerapausorik handienak eman dituen aurrelarietako bat dela frogatuz. Berriatuko bikoteak ez zuen kantxan bere tokia aurkitu, eta markagailuaren gerizpeak ez zuen inondik inora barkatu: 15 eta 9koa, Lejardiren eta Sorozabalen alde.
Argazkia: Eraman Jai Alai.
Bigarren seteko lehen pilotakadetan, alabaina, berriatuarren jokoa bestelakoa zela igarri zuten frontoiaren harmailak lepo bete zituzten jarraitzaileek. Lau puntistek kalitate handiko eta batez ere indar azpimarragarriko —aurrelarien pilotakadak atzeko paretaraino heltzen ziren— seta lehiatu zuten. Aipagarria izan zen Goikoetxearen partidua: 14 urteko berriatuarrak, eutsi ez ezik, min handia egin zuen jokaldiz jokaldi; errebeskadaz jokoa atzeratu zuen, presiopean pilotakada zailak eroan zituen, eta eskumaz tantoak biribildu ere bai. Aurrean, bere herrikideak alboz min handia egin zuen, sobera menperatzen duen estiloari leial. Esfortzuak saria eduki zuen, eta Gogenola-Goikoetxea bikoteak amore emateko inongo intentziorik ez zuela argitu zien aurkariei: 13 eta 15, berriatuarren alde.
Maia Goikoetxea: “Oso urduri kantxaratu gara, eta horrek lehen set osoan markatu egin gaitu; bigarrenari lasaiago ekin diogu, eta emaitzek hori bistaratu dute”
Berdinketa haustean, moreak lehen segundotik aldea egiten saiatu ziren. 0 eta 3 aurreratzea giltzarri izan zen, Lejardik eta Sorozabalek ez baitzuten nahikoa lanabes eduki, egoera hari buelta eman ahal izateko. Goikoetxearen hrugarren tantoak zaleak jesarlekuetatik altxatu eragin zituen. Azkenean 2 eta 5 gailenduta lortu zuten historiako lehen liga garaipena. Beraz, Gogenola-Goikoetxea eta Barandika-Lopez bikoteek hurrengo denboraldian liga txapeldunei dagozkien gerriko horiak eroango dituzte soinean.
Elaia Gogenola: “Finalerdietan joko ona egin genuen; finalaren bigarren nahiz hirugarren setetan, beste hainbeste. Beraz, pozarren egon gaitezke eduki dugun goranzko bilakaerarekin”
Goikoetxeak partidu hasieran pairatutako urduritasuna gako izan zela azaldu zuen: “Oso urduri kantxaratu gara, eta horrek lehen set osoan markatu egin gaitu; bigarrenari lasaiago ekin diogu, eta emaitzek hori bistaratu dute”. Gogenolak, minutuen joanarekin, konfiantzaren gorakada nabarmena eduki zuen: “Maia lasaiago eta eraginkor jokatzen ikusita, bigarren setaren amaieran interesatzen zitzaidan jokoa egin ahal izan dut aurrealdean, eta erosoago aritu naiz”. Berdinketa haustean “materiala aldatzea” ere mugarri izan zen berriatuarrentzat: “Bigarren seteko jokoaren konfiantzarekin, norgehiagoka hutsetik hasiko bagenu legez jokatu dugu azken seta, eta azkenean markagailuak geure alde egin du”. Liga garaipena “urte osoko lanaren emaitza” dela aditzera eman zuen Gogenolak: “Une batzuetan irregular samar ibilita ere, finalerdietan joko ona egin genuen; finalaren bigarren nahiz hirugarren setetan, beste hainbeste. Beraz, pozarren egon gaitezke eduki dugun goranzko bilakaerarekin”.
Jai Alai Ligaren aurtengo ekitaldiak bereak eman ditu, baina ez, ostera, goi mailako zesta-puntak. Izan ere, San Fausto jaiak bertaratu ahala, Durangoko Ezkurdi frontoira lekualdatuko da fokua. Durangokoa 2025/2026 denboraldiko lehen Master Series puntuagarria izango da. Eguenean bertan [urriak 2], aurkeztuko dute.
