74.010 euroko dirulaguntza, Busturialdean lehiakortasuna bultzatzeko
Lanbide Ekimenak jaso duen dirulaguntzak Busturialdeko enpresen lehiakortasuna hobetzea du helburu, eta horretan jarduten duten hiru proiektu garatzeko erabiliko da: Enpresa Berdea, Salbide eta Suspertze Digitala
Lanbide-Ekimenak, Gernika-Lumoko Udalaren erakunde autonomoak, 74.010,04 euroko diru-laguntza lortu du Bizkaiko Foru Aldundiak bultzatutako Bizkaia Orekan Sakonduz programaren barruan. Finantzaketa hori Busturialdeko enpresen lehiakortasuna hobetzea helburu duten hiru proiektu garatzeko erabiliko da, Garapen Ekonomikorako Plan Estrategikoarekin bat eginez. Ekimenek trantsizio ekologikotik digitalizaziora arteko bidea egiten dute, tokiko enpresei laguntzeko eta, batez ere, haien hazkunde ekonomikoa sustatzeko.
Jon Lejarraga Lanbide-Ekimenak erakundeko presidenteak diru-laguntza honen garrantzia nabarmendu du eskualdearen bultzada ekonomikorako: “Bizkaiko Foru Aldundiaren laguntza funtsezkoa da gure enpresa-sarea indartzen jarraitzeko. Proiektu horien bidez, epe laburreko lehiakortasuna hobetzea ez ezik, garapen ekonomiko jasangarri eta merkatuaren eskakizun berrietara egokitzeko oinarriak ezartzea ere lortu nahi dugu. Gure enpresei bide horretan laguntzeko konpromisoa dugu, jasangarritasunerako, merkatuen dibertsifikaziorako eta digitalizaziorako trantsizioa erraztuz”.
Hiru proiektu.
Aipatutako hiru proiektuetatik lehena, Enpresa Berdea proiektua da: 19.626 euroko aurrekontuarekin, trantsizio ekologikoa sustatu nahi du Gernikaldeko enpresen hazkunderako motor gisa. Bonu Berdea programaren bidez, hiru enpresari lagunduko zaie jasangarritasuneko mikroproiektuak ezartzen. Gainera, lau prestakuntza-tailer eta saio bat antolatuko dira ACLIMArekin lankidetzan, enpresa-eremuan aplika daitezkeen irtenbide ekologikoak hedatzeko. Beste ekintza batzuen artean, hamar garapen agentzietako teknikariak iraunkortasunean eta ingurumen metriketan trebatuko dituzte, baita praktika iraunkorrak hartzea erraztuko duten laguntza publikoak identifikatzen ere.
Bestalde, Salbide proiektuak 28.738,36 euroko aurrekontuarekin bat egiten du, eta bere helburu nagusia eskualdeko enpresek bezero kopuru mugatu batekiko duten menpekotasuna murriztea da. Ekimen honen bidez, merkataritza-aktibazioa sustatuko da, salmenta-metodologia eta -tresna berrien bidez, merkatu-kuota handitzeko berariazko prozedurak ezarriz. Prestakuntza-ikastaroak emango dira eta bezero potentzialekin harremanetan jartzea erraztuko da.
Hirugarren, eta azken proiektua Suspertze Digitala da; 25.646,04 euroko aurrekontua du. Busturialdeko enpresen digitalizazioa sustatzea du jomuga. Teknologia berriei buruzko tailerrak, jardunaldi tematikoak eta beren eragiketak arrakastaz digitalizatzea lortu duten enpresetara bisitak izango dituzte ekintzek. Gainera, enpresei digitalizaziorako diru-laguntzak eskatzen lagunduko zaie, prozesuan zehar laguntza integrala ziurtatuz. Proiektu honetan Bizkaiko 11 garapen-agentziek parte hartzen dute, tokiko enpresa-sare zabal bati mesede eginez, prestakuntzatik finantzaketaraino doan ikuspegi integral batekin.
