Heldutasunera heldu da Astra
Heldutasunera ailegatu da Astra, eta antolatzeko leku bila dabiltzan gazte eragileen topaleku izaten jarraitzen du. Duela hemezortzi urteko zutabeek sendo jarraitzen dute, eta urteurrena ospatzeko egitarau zabala prestatu dute Astrakideek. Abenduaren 16tik 31ra bitartean, ekimenez beteko dute kulturarako fabrika soziala.
Hemezortzi urte beteko ditu Astrak abenduaren 24an. Heldutasunera “inoizko bizien” helduko da. 2005eko abenduan okupatu zuten herritarrek udalerrian horren esanguratsua zen arma fabrika, eta ordutik, antolatzeko leku bila dabiltzan gazte eragileen topaleku izan da, eta izango da. Duela hemezortzi urte ezarritako estatutuetako zutabeek gaurkotasuna izaten jarraitzen dute: hau da, Astra irabazi asmorik gabekoa, feminista, antiarrazista eta antimilitarista da. “Euskara militante eta kultur erreferente zen, izan da eta izango da”, argi adierazi dute kulturarako fabrika sozialeko antolatzaileek.
Hori horrela, urteurrena ospatzeko egitarau zabala prestatu dute: “Bizitzako guztia omentzeko, ez zaigu egitarau zabal bat baino urtebetetze festa hoberik bururatu”. Ondorioz, abenduan orotariko ekitaldiek hartuko dute Astra, “eta egun berezi horiek umorez, musikaz eta gozamenez” beteko dituzte.
Urteekin, gazte esparrutik harago joan dira Astrako kideak, eta eremua zabaldu dute, arma fabrika zena Gernikako zein inguruko herrientzako saretze leku bihurtu arte: “Kultur eragile, kolektibo, talde politiko eta aberren etxe izateaz gain, ikastaro eta kirol diziplina anitzen aterpe da Astra”.
Parte hartze prozesuen balioan sinetsi dute urte luzez, eta “oztopoak oztopo”, gauzak egiteko “eredu alternatibo baten” bidea urratu dute. “Ezer ez dela berez sortzen ulertu dute gure kide zein erabiltzaileek; zeozer eskuratu nahi izanez gero, autogestioaren norabiderantz joz egin behar zaiola aurre ulertu dute”, azaldu dute Astrako kideek. Hori oinarri hartuta prestatu dituzte urteurren ekitaldi “bereziak”, eta herritarrei horietan parte hartzeko gonbidapena egin diete.
Hamaika aukera.
18. urteurrena ospatzeko hamaika aukera jarri dituzte mahaigainean. Abenduaren 16an hasi eta 31ra bitartean, adin eta interes guztientzako ekintzak prestatu dituzte, eta horietan parte hartzeko sarrerak astelehenetik aurrera egongo dira eskuragarri.
Abenduaren 16an emango diote hasiera urteurren ekitaldiei, Arima eta Orbel taldeen kontzertuekin. Hilaren 23an, berriz, etxeko txikien gozamenerako txanda izango da, izan ere, AstraTxikik antolatuta, magia emanaldi batek hartuko du kulturarako fabrika.
Hurrengo egunean, duela hemezortzi urteko okupazioaren eguna gogoratuko dute Merkurion, brindis bat eginda, eta kantuz eta kontuz girotuko dute egonaldia. Eñaut Elorrieta eta Amorante ere Astrara bertaratuko dira abenduaren 26an, emanaldi “oso berezi bat” eskuetan dutela. Eta horien lekukoa hartuko dute Ithakak, Nikotinak eta Dj Fulanak hilaren 29an. Kontzertuen aurretik, baina, Gernikako Ross dantza eskolak “sorpresa eder bat” prestatuko du, eta ikuskizun bat eskainiko du.
Urteko azken egunean eta hurrengo urteko lehenengo goizaldean agurtuko dituzte urteurren ekitaldiak. Izan ere, Astra Gau “izugarri” bategaz agurtuko dituzte hamazortzigarren urteurreneko ekintzak: “Zenbait DJren gidaritzapean barrenak askatzeko urteko azken saiakeran elkartuko gara”.
Heltzen eta heldu izaten jarraituko du Astrak, baina, horretarako, etorkizuneko kideen beharra “ezinbestekoa” dela azpimarratu dute: “Balio dezala urteurren ospakizun honek belaunaldi berriei gurera hurbil daitezen mezua zabaltzeko. Inoizko bizien gaude baina are biziago egon gaitezke”.
Urteurreneko egitaraua
Abenduak 16, zapatua.
21:00. Arima eta Orbel taldeen kontzertua Astran.
Abenduak 23, zapatua.
Astratxikik prestatuta, magia ikuskizuna, Astran.
Abenduak 24, domeka.
Okupazioaren 18. urteurrena gogoratzeko ekitaldia edo brindisa egingo dute Merkurion iturriaren inguruan.
Abenduak 26, martitzena.
21:00. Eñaut Elorrieta eta Amoranteren kontzertua, Astran.
Abenduak 29, barikua.
19:30. Ross Dantza Eskola.
Gero. Ithaka, Nikotina eta DJ La Fulanaren kontzertuak, Astran.
Abenduak 31, domeka.
00:30. Astra Gaua.
