Pablo Gonzalez askatzeko eskariagaz bat egin du Jardun Koordinadorak
Poloniako eta Espainiako zerbitzu sekretuek lankidetzan atxilotu dutela Gonzalez zehaztu dute. Era berean, NATOk Ukrainan orain dela zortzi urte hasitako gerraren aurrean, mendebaldean eta gaur egungo sistemarekin "alienatuta dauden komunikabidetan dagoen hipokrisia" agerian utzi gura izan dute.
Astelehenean Polonian atxilotu zuten Pablo Gonzalez kazetari elantxobetarraren atxiloketa “arbitrarioa” salatu eta bera askatzeko eskatu dute Jardun Koordinadorako kideek. Horrekin batera, NATOk Ukrainan orain dela zortzi urte hasitako gerraren aurrean, “mendebaldean eta gaur egungo sistemarekin alienatuta dauden komunikabidetan dagoen hipokrisia” salatu eta horrekin amaitzeko eskatu dute: “Espainiar zerbitzuen parte hartzea, komunikabideen jarduera zuritzailea eta gerra abiarazi duten interes inperialistak ere salatzen ditugu. Gure ustez, NATO erakunde kriminala kondenatu gabe gerrari ezetz esaten dioten guztiek hegoak ematen dizkie honen neurri inperialistei, non langile klasea beti irtengo den galtzaile”.
Jardun Koordinadorako kideen esanetan, Poloniako eta Espainiako zerbitzu sekretuek lankidetzan atxilotu zuten Gonzalez: “Gure eskualdeko kazetaria errusiazalea izatea egotzita atxilotu dute. Gonzalez 36ko kolpe faxistaren ondorioz, Errusian jaio zen, eta gaur egun, Elantxoben bizi da. Poloniako eta Espainiako zerbitzu sekretuekin lankidetzan egin zuten atxiloketa astelehenean”. Ukrainan etsaitzat hartzeko Gonzalezi leporatu zaizkion arrazoietako bat “euskal jatorria eta Laboral Kutxaren kreditu-txartel”a soinean eroatea izan direla diote.
2014an “NATOk Ukrainan hasitako gerrak Donbassen 14.000 bat hildako” eragin dituela zehaztu dute. Koordinadoraren kideen arabera, Donbassen milizia ukrainarrek “beren lurraldean garbiketa etniko baten alde egiten dute, garbiketa hau errusiarrei zuzenduta doalarik”. Euren hitzetan, Odessan dozenaka sindikalista “bizirik erre” zituzten. Krimen horiek komunikabideentzat “oharkabean” pasatzen direla deritzote, eta komunikabide horiek egunero “bultzatzen” dutela “gerra inperialista” hau, Ukrainara armak bidaltzea “txalotuz”. Hedabide horiek NATOk mundu osoan burutzen duen esku hartze militarra zilegiztatzen dutela salatu dute, “neurri berean, Ameriketako Estatu Batuetako krimenen aurrean isiltzen direlarik”.
