Aitor Etxebarriazarraga da bigarren finalista
Aitor Etxebarriazarraga Mikel Retolazagaz batera ariko da martxoaren 5ean Astran jokatuko den Busturialdeko Bertsolari Txapelketaren finalean. Hirugarren eta azken kanporaketa Muxikako Ariatza txokoan lehiatuko da, barikuan 21:00etan. Saioak doakoak badira ere, afaltzeko aurretiaz izena eman behar da.
Busturialdeko Bertsolari Txapelketako bigarren kanporaketan parte hartu zuten bertsolariak eta gai jartzailea. Argazkia: Lilibertso. Busturialdeko Bertsolari Txapelketaren bigarren kanporaketa lehiatu zuten barikuan, Busturiko Aingerubide kultur etxean, eta denen artean puntuaziorik onena lortu zuen Aitor Etxebarriazarraga bertsolari gernikarrak. Kanporaketa irabazita, martxoaren 5ean Astran lehiatuko den finalean egongo da, Mikel Retolazagaz batera.
Saio bikaina egin zuen Etxebarriazarragak, guztira 172,5 puntu lortu baitzituen bertsolari gernikarrak. Haren atzetik sailkatu zen Lurdes Ondaro, 155 puntu eskuratuta.
Berdintasuna nagusi izan zen hirugarren postua eskuratzeko, izan ere, 150,5 puntutan berdindu zuten Julen Ibarguengoitiak, Xabier Enbeitak eta Eneko Aldanak; hirugarren, laugarren eta bosgarren sailkatu ziren hurrenez hurren. 143 puntu bilduta, seigarren postuan geratu zen Nagore Beitia.
Txapelketa ofizialek duten lehiakortasunetik aldendu eta lagun artean ondo pasatzeko asmoz bultzatu zuen Lilibertsok eskualdeko bertsolari txapelketa, eta helburua bete zuten Busturian ere. Giro ona nagusitu zen bigarren kanporaketan, eta familiarteko giro horretan jarraitzeko asmoa dute hurrengoan ere.
Izan ere, bariku honetan (otsailak 25) jokatuko dute hirugarren eta azken kanporaketa, eta orduan ezagutuko dira zeintzuk izango diren Retolazagaz eta Etxebarriazarragagaz batera Astran ariko direnak. 21:00etan Muxikako Ariatza txokoan jarri dute hitzordua. Bertan ariko dira Onintza Enbeita, Jokin Ansotegi, Ibai Amillategi, Koldo Gezuraga, Asier Galarza eta Iker Uriarte; estreinakoz parte hartuko du txapelketan Ansotegik. Horien artean zuzenean aterako da hirugarren finalista, eta Astran egongo diren beste bostak puntuazioaren arabera sailkatuko dira.
Saioak doakoak badira ere, afaltzeko aurretiaz izena eman behar da; horretarako, Ariatzako txokora edota 688 62 65 04 telefono zenbakira deitu beharko da.
Sailkapena gaur gaurkoz
1. Aitor Etxebarriazarraga: 172,5 (Bigarren saioa irabazita, finalean dago)
2. Mikel Retolaza: 166,5 (Lehenengo saioa irabazita, finalean dago)
3. Beñat Bilbao: 159
4. Enare Muniategi: 155
5. Lurdes Ondaro: 155
6. Koldo Muniz: 154
7. Ander Elortegi: 152
8. Julen Ibarguengoitia: 150,5
9. Xabier Enbeita: 150,5
10. Eneko Aldana: 150,5
11. Janire Arrizabalaga: 146
12. Nagore Beitia: 143
