Beaskoetxeak eta Zabalak irabazi dute Hondarribiako lehen jardunaldia
Arberi eta Lopezi bi setetan irabazi diete Beaskoetxeak eta Zabalak. Goikoetxea-Aimar eta Erkiaga-Etcheto bikoteen artekoa Goikoetxearentzat eta Aimarrentzat izan da.
Hondarribiako Grand Slamaren lehen jardunaldia. Argazkia: Jai Alai Alive Barikuan hasi zen Hondarribiako Grand Slama, eta lehenengo jardunaldian garaipena eskuratu zuten Beaskoetxeak eta Zabalak eta Goikoetxeak eta Aimarrek. Beaskoetxeak eta Zabalak Arberi eta Lopezi 13-15 eta 6-15 irabazi zieten Hondarribiako Jostaldi pilotalekuan, eta Goikoetxeak eta Aimarrek 2 set eta 1 irabazi zieten Erkiagari eta Etchetori (8-15 eta 15-13 eta 5-4).
Arbe eta Lopez ziren norgehiagokako faboritoak, baina 55 minutuko lehia eta gero, Beaskoetxea eta Zabala nagusitu ziren. Tantoak txandakatuz, partidua estu hasi zuten, 8ra berdindu zuten arte. Arbek eta Lopezek erritmo bizia ezarri zuten orduan, eta bost tanto aldea ezarri zuten markagailuan (13-8). Beaskoetxeak eta Zabalak ez zuten amore eman, eta euren jokoa berreskuratu eta markagailua irauli zuten (13-15). Bigarren seta ere bikain hasi zuten gernikarrak eta markina-xemeindarrak, seta 21 minututan irabaziz.
Erkiaga-Etcheto eta Goikoetxea-Aimar bikoteen arteko lehia Hondarribiako Grand Slameko lehen jardunaldian. Argazkia: Jai Alai Alive
Goikoetxea-Aimar eta Erkiaga-Etchetoren arteko norgehiagoka oso estua izan zen, partidua hiru setetan erabakiz. Goikoetxea eta Erkiaga aurrelarien arteko lehiak ikusleen arreta berenganatu zuen, eta partidu bikaina jokatu zuten. Lehenengo setean Goikoetxeak eta Aimarrek osatutako bikoteak ezin izan zuen Erkiagaren eta Etchetoren jokoa berdindu, eta markagailuan 8-15ekoa ezarriz gailendu ziren Ispasterkoa eta Bidartekoa. Bigarren setean Goikoetxea eta Aimar nagusitu ziren, Aimarren bi paretako tantoari esker. Lau pilotariek erakustaldi bikaina eskaini zuten, markagailua behin eta berriz berdinduz. Partidua erabakitzeko tantoa Goikoetxeak egin zuen. Pilota bi aurkarien artera jaurti zuen, eta Erkiagak eta Etchetok ezin izan zioten erantzun (5-4).
Barikuan Hormaetxea-Manci eta Olharan-Del Rio lehiatuko dira.
Bi multzotan banatuta ari dira hamabi pilotariak, eta ligaxkako beste bi jardunaldiak irailaren 24an eta urriaren 2an jokatuko dituzte. Multzo bakoitzeko lehenengo bi bikote sailkatuek urriaren 9an jokatuko dituzte finalerdiak, eta finala, berriz, urriaren 15ean lehiatuko dute.
