280 bat txirrindulari batu ditu Jabi Amorrortu martxa zikloturistak
Pello Bilbao Lopez de Armentia txirrindulari gernikarra omendu dute Aixerrotape taldekoek. Ohorezko aurreskua dantzatu eta txapela zein lore sorta bat oparitu diote.
Argazkia: Basati Bike 280 parte hartzaile bildu ziren Jabi Amorrortu martxa zikloturistan, zapatuan [ekainaren 15a]. Txirrindulariek hiru ibilbide izan zituzten aukeran, baina pedalei eragiten jarri aurretik Italiako Girotik bi garaipenekin bueltatu den Pello Bilbao Lopez de Armentiari omenaldia egin zioten. 08:00etan, Astana taldeko txirrindulariari eskainitako aurreskuak eman zion hasiera martxa zikloturistari. Ostean, 14:00etan, txapel eta lora sorta bat ere oparitu zizkioten gernikarrari.
Primerako eguraldia izan zuten parte hartzaileek bizikletan aritzeko. Antolatzaileek azaldu dutenez, “goizean ez zuen bero handiegirik egin, eta zentzu horretan ez dugu kexarik jaso. Gainera, ibilbide luzea aukeratu zutenek 14 gradutako tenperatura izan zuten Oiz gainean”. Kronoigoeran hartutako denborak Aixerrotape taldearen webgunean eta sare sozialetan ( facebook eta Twitter ) daude ikusgai. Julen Uranga Letamendiak egin zuen denborarik onena (34 minutu eta 20 segundo) eta zazpi segundoko aldeagaz heldu zen Ekaitz Lejarzegi Urizar.
Argazkia: Basati Bike
Martxaren ostean, antolatzaileek babesleek oparitutako kirol materialaren zozketa egin zuten, besteak beste, “Basati Bike taldeak eta RK informatika dendak emandako arropak, Ramon Bilbao eta Campos enpresek oparitutako materiala…”
Aixerrotape Txirrindulari Elkarteko kideek 300 parte hartzaile espero zituzten martxa zikloturistan, hala ere, probaren balorazio orokorra ona izan zela adierazi dute: “Ez zen istripurik gertatu eta horrek asko pozten gaitu. Pixkanaka-pixkanaka gorantz bagoaz ere, etorkizunera begira proiektu hau aurrera eramateko lan egiten jarraitu behar dugu. “.
Argazkia: Basati Bike
