Bermibusak arratsaldeetan be zerbitzua eskainiko du otsailetik aurrera

Otsailaren erdialdetik aurrera Bermibusa arratsaldeetan be martxan izango dela jakinarazi du Bermeoko alkate Xabier Legarretak. Goizeko zerbitzua bere horretan jarraitzeaz gain, arratsaldeetan 16:45eatik 20:15era ibiliko da. Gainera, geraleku bat gehiago izango du arratsaldez, Hizkuntza Eskolara arte iritsiko baita.

2011/02/02

Bermeoko Hitza

Herritarren eskaerei erantzuna emanez, 2010. urteko apirilean ipini zuen Udalak martxan Bermibus zerbitzua. «Kontuan izanik zerbitzuaren datuak eta herritarrek horretaz egiten duten balorazioa zerbitzua handitzea erabaki dugu», azaldu du Legarretak.

Hortaz, Bermibusak goizean orain arte moduan jarraituko du. 07:45ean hasiko da 14:15era arte, baina otsailaren erdialdetik aurrera arratsaldez, 16:45eatik hasita 20:15eara arte ibiliko da. Arratsaldeko zerbitzu hori, zehazki, martxan noiz ipiniko duten oraindik ez dakite.

2011. urterako aurkeztutako aurrekontuetan Bermibus zerbitzurako partida handitzen zuten, 100.000 eurokoa, hain zuzen be. Iazkoa, aldiz, 70.000 eurokoa zen. «Zerbitzuak izan duen harrera ikusita, uste dugu iritsi dela momentua arratsaldeko ibilbidea zelan doan probatzeko».

Arratsaldeko zerbitzuak, gainera, berritasun bat izango du. Goizeko geraluak mantendu ez ezik, bat gehituko zaio.

Bermibus zerbitzuak orain arteko prezioa mantenduko duela jakinarazi du Bermeoko alkateak, 20 zentimo, hain zuzen be.