Eguneroko erabaki txikiek uzten duten arrastoa nabarmenduz dator Asteklima
Bihar hasiko dute Asteklimaren zortzigarren aldia, 'Zure arrastoa keinu bakoitzean hasten da' lelopean. Eguneroko erabaki txikiek planetaren etorkizunean eragin zuzena daukatela adierazten du aurtengo leloak. Ajangizko eta Muxikako udalek eta BBK Klima eta Ekoetxea Urdaibai zentroek jarduerak antolatu dituzte.
Asteklima-Euskadiko Klimaren eta Energiaren Astearen zortzigarren aldiak askotariko proposamenak bilduko ditu bihar hasi [urriak 16] eta urriaren 25a bitartean. Zure arrastoa keinu bakoitzean hasten da leloagaz dator oraingo honetan; eguneroko erabaki txikiek planetaren etorkizunean eragin zuzena dutela erakustea da aurtengo helburua: “Euskadi klima aldaketari aurre egiteko topagune, ikaskuntza eta ekintza gune handi bihurtuko da, trantsizio energetikoak eta klimatikoak daukaten garrantziari buruz herritarrak kontzientziatuz”.
Energiaren Euskal Erakundearen eta Ihobe ingurumen-kudeaketarako sozietate publikoaren lankidetzagaz, Eusko Jaurlaritzako Industria, Trantsizio Energetiko eta Jasangarritasun Sailak bultzatzen du Asteklima, eta programak dibulgazioa, sentsibilizazioa eta esperientzia praktikoak batzen ditu. Asteklimaren helburu nagusietako da administrazio publikoek, ikastetxeek, unibertsitateek, erakunde sozialek, enpresek eta beste eragile batzuek klima aldaketaren aurkako borrokan eta trantsizio ekologikoaren alde egiten duten lana ikusaraztea. Herritarrak “informatuago, parte hartzaileago eta konprometituago” egoteko horiek egiten duten lana aitortzen du Asteklimak: “Baldintzak betetzen dituzten eta baliozkotzen diren ekintza guztiek aitortza ofiziala jasoko dute aurten, Asteklimari eta herritarrak klima aldaketari buruz sentsibilizatzeari egindako ekarpenagatik”.
Aurreko aldietan bezala, Busturialdean bat egin dute Asteklimagaz. Ajangizko eta Muxikako udalek eta BBK Klima eta Ekoetxea Urdaibai zentroek jarduerak antolatu dituzte.
Muxikako Udalak bigarren eskuko azoka antolatu du beste urte batez. Goizean Hiru Herri Udalerri Bat esku pilota txapelketaren finalak jokatuko dituzte frontoian, eta azoka-gunean postuez gain, food-track-a eta Ehunzangoren eskutik, umeentzako birziklapen tailerra, zirkuitu puzgarria eta margoketa txokoa egongo dira, 12:00etatik aurrera.
17:00etan, berriz, Txitatokiko eskolakoek zirku tailerra emango dute eta Irrikazu disko festak girotuko du aparkalekua, 19:00etan hasita. Eguna amaitzeko, Muxik-Eroak rock taldeak kontzertua eskainiko du 21:00etan.
Ajangizen, berriz, bi hitzaldi emango dituzte; bihar [urriak 16] energia kontsumoari buruzko saioan bilduko dira, eta bertan, herritarrek hartu ditzaketen neurri eraginkorrak azaldu eta ekiteko gomendioak eta adibideak emango dituzte. Urriaren 22an, ostera, gasolioa eta gasa ordezkatzeko dauden “alternatiba berriztagarriei” buruz berba egingo dute. Horiek erabiltzeagatik dauden diru laguntzen berri ere emango dute, baita horiek erabiltzeak suposatzen duen aurrezpenaz ere. Horrekin batera, Ajan-Argi energia komunitateari buruz ere ariko dira, egindako ibilbidea errepasatuta, egungo egoera azaldu eta aurreikuspena zehaztuz.
Bestalde, Ekoetxea Urdaibain adin guztietarako doako esperientzien “agenda betea” diseinatu dute: “Programazioak herritarren zientzia, kultura eta tokiko gastronomia uztartzen ditu, gure aztarna ekologikoa murrizten lagunduko duten tresna praktikoak eskaintzeko”. Asteburu honetan bi tailer eskainiko dituzte klimari eta energiari buruzko astearen azkenengo egunean, berriz, lau jarduera egongo dira aukeran. Doako ekintzak badira ere, aurretiaz izena eman behar da Ekoetxea Sarearen webgunean.
BBK Kliman ere bi asteburutarako eskaintza prestatu dute: “Bi asteburuko jarduerarekin, BBK Klimak herritarren parte hartzea dinamizatzen du, eta sentsibilizazio klimatikoa topaketa bizi eta hurbil bihurtzen du. Urdaibain, ikaskuntza topaketa bihurtzen da, eta topaketa, berriz, konpromiso: pertsonek beren ohituren eragina ulertzeaz gain, etorkizun jasangarriago baten parte izan daitezkeela deskubritzen duten espazioa”.
Ainhoa Elortegi BBKko Ingurumen eta Garapen Iraunkorreko arduradunaren berbetan, zentroan bisita bakoitzak arrastoa utz dezan lan egiten dute, eta aurten aztarna hori “inoiz baino ikusgarriagoa” izatea nahi dute: “Ekintza klimatikoa emoziotik, jolasetik eta esperientzia partekatutik ere bizi daitekeela erakusteko aukera bat da Asteklima”.
Herriz herri:
AJANGIZ:
- Urriak 16, barikua: Nola kontsumitu energia gutxiago hitzaldia bihar, 19:00etan, kultur etxean.
- Urriak 22, eguena: Gasoila eta gasa ordezkatzeko alternatibak hitzaldia, 19:00etan, kultur etxean. Jarraian, Ajan-argi komunitatearen jarraipena eta sustapena izango dituzte mintzagai.
BUSTURIA:
- Urriak 17, zapatua: Escape Room Urdaibaiko Biosferan, 10:00etatik aurrera, BBK Kliman.
- Urriak 17, zapatua: Gemen bila, 10:30ean, BBK Kliman.
- Urriak 17, zapatua: Moda jasangarria: ecoprint bundle dye tailerra, 6 urtetik aurrerakoentzako, 10:30etik 13:00etara, Ekoetxea Urdaibain.
- Urriak 17, zapatua: Orbela tailerra, 16:30etik 18:00etara, 3 urtetik aurrerakoentzako, Ekoetxea Urdaibain.
- Urriak 18, domeka: Escape Room Urdaibaiko Biosferan, 10:00etatik aurrera, BBK Kliman.
- Urriak 18, domeka: Gemen bila, 10:30ean, BBK Kliman.
- Urriak 24, zapatua: Gemen bila, 10:30ean, BBK Kliman.
- Urriak 25, domeka: Escape Room Urdaibaiko Biosferan, 10:00etatik aurrera, BBK Kliman.
- Urriak 25, domeka: AZTERTU: Ezagutu ura, babestu bizitza tailerra, 6 urtetik aurrerakoentzako, 10:00etatik 14:00etara, Ekoetxea Urdaibain.
- Urriak 25, domeka: Gemen bila, 10:30ean, BBK Kliman.
- Urriak 25, domeka: Ezabatu zure aztarna, garaiz gaude! esperientzia parte hartzailea, 11:00etatik 12:30era, Ekoetxea Urdaibain.
- Urriak 25, domeka: Egurrezko jolas erraldoiak, 11:00etatik 14:00etara Ekoetxea Urdaibain.
- Urriak 25, domeka: Odisea planetan antzezlana, 4 urtetik aurrerakoentzako, 17:00etatik 18:00etara, Ekoetxea Urdaibain.
MUXIKA:
- Urriak 17, zapatua: Bigarren eskuko azoka, 10:30etik 22:00etara, Kurtzeron.
- 12:00. Ehunzangoren eskutik, umeentzako birziklapen tailerra, zirkuitu puzgarria eta margoketa txokoa.
- 17:00. Txitatoki zirku tailerra.
- 19:00. Irrikazu disko festa.
- 21:00. Muxik-Eroak rock kontzertua.
- 12:00. Ehunzangoren eskutik, umeentzako birziklapen tailerra, zirkuitu puzgarria eta margoketa txokoa.
