"Gure eskuetan", ondarea babesteko kolektiboki jarduteko beharrizana azpimarratuz
Euskal Museoan egin dute aurkezpena.Bizkaiko Foru Aldundia Bizkaiko Ondarearen Europako Jardunaldien 26. aldiaren programazioa aurkeztu dute gaur [irailak 15], Bilboko Euskal Museoan.
Gure eskuetan lelopean, doako 270 kultur proposamen baino gehiago eskainiko dituzte urrian, Bizkaiko 77 udalerritan. Busturialdean, Bermeon, Busturian, Ean, Ereñon, Gautegiz Arteagan, Gernika-Lumon, Kortezubin, Mundakan eta Muxikan egingo dituzte.
Urtero gai baten inguruan antolatzen dituzte jarduerak, eta aurtengo gaia Europako Kontseiluak 2026ko Ondarearen Europako Jardunaldietarako ezarritako ikuspegiarekin lotuta dago, eta azpimarra jartzen du ondarean eragin dezaketen arrisku eta mehatxuetan eta ondarea babeste aldera kolektiboki jarduteko beharrizanean. Horrenbestez, kultur ondarearen kalteberatasunari buruz zein aurre egin beharreko erronkei gizarteak erantzuteko duen gaitasunari buruz gogoeta egitera bultzatu gura dituzte bizkaitarrak. Leixuri Arrizabalaga, Euskara, Kultura eta Kiroleko foru-diputatuaren berbetan, aldi honek ondarearen balioari eta bere zaintzan daukagun erantzukizun kolektiboari buruzko begirada “zabala eta partekatua” proposatzen du: “Ikuspegi hori lantzeko, kontuan hartu da Europak 2026ko ediziorako finkatu duen gaia. Mehatxuei erantzutea beharrezkoa dela azpimarratzen du, kultur ondareak etorkizuneko belaunaldientzat esanguratsua eta eskuragarria izaten jarrai dezan”.
Urtero modura, Bizkaiko Foru Aldundiak koordinatzen ditu jardunaldiak, eta 26. aldi honetan, 172 entitate antolatzailek parte hartuko dute, besteak beste, kultur elkarte eta entitateek, museoek eta udalek, eta horietako batzuen ordezkariak elkartu dira gaurko aurkezpen agerraldian. Bertan nabarmendu dutenez, kultur programa hori “guztiz kontsolidatuta” dago. Izan ere, Europan ondarea zabaltzeko “ekimen nagusietako bat” ez ezik, Bizkaian kultur ondareari eskainitako urteko hitzordurik “handiena” ere bada: “Kopuruotan ikusten dugu proiektu kolektibo hori ez dela nolanahikoa; hainbat eta hainbat kultur eragile eta erakunde mobilizatzen ditu urtero kultur ondarea herritarrei hurbiltzeko”.
Programazio osoa eta jardueren informazioa eta erreserbak kontsultagai daude www.ondareabizkaia.eus webgunean eta Instagram (@ondareabizkaia) eta Facebook (Ondarea Bizkaia) sare-sozialetako profiletan. Gainera, jardunaldiek WhatsAppeko kanala ere izango dute aurten, Ondarearen Europako Jardunaldiak, haien egunerokoa gertutik jarraitu nahi dutenentzat.
BUSTURIALDEKO PROPOSAMENAK
BERMEO
- Urriak 6: Bermeoko udaletxea, sutearen ondoren bisita gidatua.
- Urriak 15: Baxura: bilakaera, erresistentzia eta egungo egoera hitzaldia.
- Urriak 20: Bermeoko udaletxea, sutearen ondoren bisita gidatua.
- Urriak 29: Gogoeta: Bermeoko ondare garaikidearen etorkizuna mahai-ingurua.
BUSTURIA
- Urriak 30: Urte-sasoiak Busturian ikus-entzunezkoa.
EA
- Urriak 17: Ieko talaren eta gurutzbidearen barriztatzea hitzaldia eta bisita gidatua.
EREÑO
- Urriak 10: Gerandako denbora-kapsula murgiltze bisita.
GAUTEGIZ ARTEAGA
- Ereño gorriaren Andrabideko harrobiak bisita gidatua.
GERNIKA-LUMO
- Urriak 3: Organoa, babestu beharreko ondarea bisita gidatua.
- Urriak 10: Ezetz jaurti pilota zestarekin! bisita gidatua eta praktika.
- Urriak 17: Fosil gidaria. Gerra zibileko arkeologia ibilbide gidatua.
- Urriak 17: Organoa, babestu beharreko ondarea bisita gidatua.
- Urriak 17: Harria altxatu ezetz! erakustaldia eta praktika.
KORTEZUBI
- Urriak 3: Omako basoan irrintzia ezetz bota ikastaroa.
MUNDAKA
- Urriak 17: Mundakako portuko aztarnak bisita gidatua.
MUXIKA:
- Urriak 24: Baserrietako labaderoak Muxikako udalerrian bisita gidatua.
