Aner Alvarez boxeolari bermeotarra, Euskadiko txapeldun
65 kiloz azpiko Euskadiko Txapelketa irabazi du Aner Alvarez boxeolari bermeotarrak. Jon Ander Rafael gernikarragaz lehia estua eduki du, eta aitortu du “orain arte eduki duen borrokarik bizi eta gogorrena” izan dela. Rafaelek esan bezala, “giroa ikaragarria” izan zen zapatuko jaialdian, eta publikoaren babesa eta jarrera txalotzeaz gain, errespetua gailendu zela azpimarratu du.
Jonan Rafael gernika-lumotarra eta Aner Alvarez bermeotarra zapatu gauean, Gernika-Lumoko Jai Alai frontoian. Pantxoa Gandarias Erritmo altuko borrokaldi estuak utzi zituen zapatuko [ekainak 13] boxeo jaialdiak. Gernika-Lumoko Jai Alai frontoia lehia bizien gosez zeuden zaleekin bete zen, eta jardunaldiko dozena bat borrokaldiek horiek asetzea lortu zuten. Antolatzaileen arabera, “1.000 pertsona inguru” elkartu zituen jaialdiak.
Ahaztuko ez duen gaua izan zen Aner Alvarez boxeolari gaztearentzat. Bermeotarra ez zen faborito, baina Jon Ander Rafael gernika-lumotarra garaituta, 65 kiloz azpiko Euskadiko txapeldunaren gerrikoa jantzi zuen, eta lortutakoagatik “harro” dago. 14 urtegaz hasi zen boxeatzen, eta egun, 18 urtegaz, argi dauka zein bide jarraitu gura duen: “Umetatik daukadan ametsa da Munduko txapeldun izatea, eta espero dut hiruzpalau urte barru, profesionaletara pasatzeko aukera edukitzea. 18 urtegaz Euskadiko txapeldun izateak harrotasunez betetzen nau; hau hasiera baino ez da. Ahal dudan guztietan gerrikoa defendatzeko borrokatuko naiz, eta ahal bada, beste pisuren batean ere lehiatu nahiko nuke”. Gerrikoak aurrera jarraitzeko bultzada eman dio.
Eskualdeko boxeolari biek lehia bizia eta estua eduki zuten. Bi epailek Alvarezi eman zioten garaipena eta beste batek, berriz, Rafaeli. Lehenengo round-a espero modura igaro zen; Alvarezek erritmo bizia ezarri zuen, kolpe exijenteekin eta erabateko intentsitatearekin borrokatuz. Rafaelek aitortu du espero bazuen ere, ustekabean harrapatu zuela, “uste zuena baino gehiago atera zuelako aurkariak”. Bigarren roundean, erritmo altuari eutsi zioten bi boxeolariek. Hirugarrenean, etxeko boxeolaria hazi egin zen, eta parekatu egin ziren. Laugarrenean, berriz, Rafael nagusitasunez aritu zen.
Alvarezek adierazi du borrokaldi “zaila eta oso gogorra” izan zela: “Orain arte eduki dudan borrokarik bizi eta gogorrena izan da, intentsitatez betetakoa. Jon Ander aurkari oso-oso gogorra da, borroka oso serio hartzen duena”. Bermeotarrak prestakuntza zorrotza egin zuen txapelketarako, eta zapatuan “oso ondo” sentitu zen: “Entrenatzaileagaz prestakuntza ikaragarria egin dut, exijentzia maila altukoa eta oso serioa; astean sei egunetan entrenatu dut, egun bakoitzean bi saio eginez”. Aurretik egindako lana igarri zen zapatuan, eta borrokaldian zehar, “nagusitzen” ari zela sentitu zuen. Familiari, lagunei, gimnasioko kideei eta entrenatzaileari eskerrak eman dizkie: “Beti daukat euren babesa, eta behar dudan edozertarako hor daude”.
Bestalde, Gernika-Lumoko boxeolariaren hitzetan, denboraldia amaitzeko, aurkari zorrotzenetako baten aurka borrokatu du etxean, “maila handiko borrokaldia eginez eta dena ring-aren gainean utziz”. Jasotako babes eta maitasun mezuengatik eskertuta agertu da, eta gerrikoa lortu ez badu ere, egindako bideagatik, eman zuten ikuskizunagatik eta momentu oro hurbilekoen babesa edukitzeagatik, “irabazle sentitzen” da.
Gaueko borrokaldi nagusia bero hartu zuen publikoak. Rafaelek esan bezala, “giroa ikaragarria” izan zen, eta publikoaren babesa eta jarrera txalotzeaz gain, errespetua gailendu zela azpimarratu du: “Profesionalen Espainiako txapelketa bateko moduko giroa egon zen. Errespetua eta kidetza izan ziren jaialdiko irabazleak, eta hori igarri zen emaitzan zein borrokaldi ostean”. Halaber, harmailetako txaloek eta animoek «aparteko indarra» eman ziotela esan du Alvarezek.
Borroka estuaren adibide dira epaileen erabakiak; borrokaldi asko ez baitziren aho batez erabaki: “Jaialdia oso ondo atera zen, eta oso pozik eta oso eskertuta gaude. Aurrez aurrekoak lehiatuak izan ziren; azkenengo borrokaldian izan ezik, beste guztietan izkina gorriko boxeolariak nagusitu ziren”.
Alvarez eta Rafael borrokaldia amaitu ostean.Pantxoa Gandarias
Bertakoen garaipenak. Gernika-Lumoko Jai Alai frontoian antolatu duten hirugarren jaialdia izan da, eta Rafaelek adierazi du “zaletasuna” hazten doala. Gernika Royal Boxing boxeo eskola da horren adibide; izan ere, bertako lau boxeolari borrokatu ziren zapatuan, tartean, Rafael. Berak ez bezala, beste hirurek garaipena lortu zuten: Alex Vasile gernika-lumotarrak Anderson Gutierrez mendean hartu zuen 62koan, Mikel Moran kortezubitarrak Alex Salas debutaria garaitu zuen, 73 kiloko borrokan, eta Daniel Mendoza gernika-lumotarrak Angel de Backerri irabazi zion, 74 kilokoan. Era berean, 57 kiloko lehian, Ainhoa Zelaia errigoitiarrak nagusitasunez mendean hartu zuen Matxalen Zapirain: “Boxeo eskolan daudenak motibazioz betetzea eragiten du horrek, eta eurak ere borrokatzera animatzea eragin lezake. Zornotzako eskola eta gurea talde berekoak dira, eta guztira, bederatzi boxeolari lehiatu ginen, eta galdu zuen bakarra izan nintzen. Espero dugu urtez urte eta jaialdiz jaialdi boxeoa hemen hazten joatea”.
Matxalen Zapriain eta Ainhoa ZelaiaPantxoa Gandarias
