Ohorezko Mailarako txartelak ihes egin die basurdeei
Gernika Rugby Taldeak 19 eta 24 galdu du, CRC Pozuelo Rubgy taldearen kontra, Ohorezko Mailara igoera lortzeko finala. Urbietan porrota jasota, Gorka Argulek zuzendutako taldeak Ohorezko Elite Mailan jarraituko du datorren denboraldian.
Argazkia: Angel Grande Zerua ukitzear dagoela, Ohorezko Mailara igoerak eskuetatik ihes egin dio Gernika Rugby Taldeari. Beste behin, Gorka Argulek zuzendutako taldeak ezin izan du maila gorenerako txartela emango zien finala irabazi, eta CRC Pozuelo Rugby izango da 2026/2027 denboraldian Ohorezko Maila lehiatuko duena. Urbieta txiki gelditu zen atzo [maiatzak 25], asko izan zirelako finalaz gozatu eta basurdeak airean garaipenera eraman nahi izan zutenak. Nahi eta ezin. Talde madrildarra partidako hainbat fasetan nagusitu zen, eta, gernika-lumotarrak azken segundora arte ekinean aritu baziren ere, Pozuelo de Alarcongo taldea izan zen garaile: 19 eta 24.
Bost puntu. Alde txikia baina esanahi handia. Basurdeak Ohorezko Elite Mailako taldea izango dira, gutxienez, beste urte batez. Maila horri eutsi eta posible balitz, igoera kanporaketaren lehiara sailkatzeko helburuagaz ekin zioten denboraldiari berde-beltzek, eta, helburu hori “aspaldi” beteta, “oso ona” izan den urtea biribiltzeko ilusioz zelairatu ziren. Ez zen posible izan. Goraino beteta zeuden harmailek pozez eztanda egin zuten neurketaren lehen minutuetan, Beau Finnian Peart zeelandaberritarrak zigor ostiko bat zukutuz basurdeak markagailuan aurretik jarri baitzituen.
Argazkia: Angel Grande
Abantaila txiki hark ez zuen, baina, luze iraun. Jokoan zegoenaren jakitun ziren biak, eta berdegunean tentsioa zen nagusi. Lehen berrogei minutuetan ez gernika-lumotarrek, ez madrildarrek ez zuten entsegurik lortu, eta zigor ostikoak izan ziren protagonista. Pozueloko Wayne Gadner hegoafrikarrak segituan erantzun zion Pearti; Peartek, berriro Gadnerri. Oso orekatua izan zen lehen zatia, eta, tematu arren, ez batak, ez besteak ez zuen neurketa hautsi eta markagailuan alde egiterik lortu. Jose Luis Murillo Kataluniako Errugbi Federazioko epaileak lehen zatiaren bukaera adierazi zuenean, erabateko berdintasuna islatzen zuen markagailuak: bederatzina.
Bigarren zatian madrildarrek aurrerapausoa eman, eta abantaila hartuz joan ziren. Izan ere, Gadnerrek neurketako bere laugarren zigor ostikoa lortu zuen eta minutu gutxira, Pedro Arraizak partidako lehen entsegua lortu zuen, 9 eta 17koa ezarriz. Entsegu lerroa zeharkatu ezinik, Peart baliatu zuten basurdeek markagailuan hurbiltzeko, baina madrildarrek Jorge Garretaren entsegu batekin eraso egin zuten (12 eta 24), etxekoen akatsa igoera suposatu zezaketen puntu bihurtuz. Hamabost minuturen faltan, basurdeek lehian sartuko zituen entsegua behar zuten, baina ez ziren baloia entsegu lerroan lurreratzeko gai.
Basurdeen partiduko jokalaria izan zen Pearten eskutik iritsi zen Urbietako zaleak piztu zituen entsegu eta transformazioa. Zortzi minutu. Igoera sei puntura zuten; berdinketa, bostera. Entsegu batekin bizirik zeuden basurdeak, eta, transformazioagaz, Ohorezko Mailan. Harmailetatik babes eta animo oihuak besterik ez ziren entzuten. Argulenak gogotik saiatu ziren eta, entsegu lerrotik gertu mantendu baziren ere, epaileak neurketaren amaiera adierazi zuenerako aldeak bere horretan jarraitzen zuen. Harmailetan txaloak, Pozueloko jokalari eta zaleen artean zoramena, eta etxeko jokalariengan berdegunean dena utzi izanaren sentsazioa: porrotagaz minduta, baina egindakoaz “harro”.
Balorazioa, “oso positiboa”.
Gernika Rugby Taldeko zuzendaritza taldeak herritar eta zaletuek erakutsitako “izugarrizko” babesa eskertu nahi izan du, Urbietako edukiera bete baitzuten. Iaz Liceo Frances taldearen aurkako finala galdu eta Ohorezko Mailako txartela galdu zuten, Madrilen. Aurten finala etxean jokatu izanak zauria are mingarriagoa egin badu ere, zuzendaritzatik argi dute denboraldiaren balorazioa “oso positiboa” dela. Edonola ere, ilusioa, baikortasuna eta esperantza nagusi zirela eta, balorazio sakonago batek “denbora” eskatuko die, “perspektibaz” begiratu ahal izateko “denbora gutxiegi” igaro baita.
Argazkia: Angel Grande
Tyran Fagan, Xabier Albizua, Mauro Sarmiento… Hamaikatxo ezbehar tarteko, basurdeek hasierako hamabostekoan egon ohi diren jokalari batzuen falta izan zuen final handian, baina, aitzakiak jarri eta balizko kasuetan pentsatzen hastetik urrun, zuzendaritzatik berdegunera jauzi egin zuten jokalari guztien lana eta ekarpena balioan jarri gura izan dute.
Jokalariei, lantlde teknikoari zein zuzendaritzari atseden hartzea dagokio orain, laster 2026/2027 denboraldiaren plangintzari ekin beharko baitiote, beste behin, mailari eutsi, igoera kanporaketara sailkatu eta, orduan bai, Ohorezko Mailarako txartela lortzeko ilusio zein anbizioz.
