Sare sozialetan euskarazko edukiak sortzearen garrantzia islatuko du Euspot lehiaketak
Iazko sari banaketa ekitaldia.Euspot Gazteak sare sozialetan euskarazko edukiak sortu eta kontsumitzera bultzatzeko, gehienez 30 segundoko iragarki bat sortzea proposatzen du Euspot Euskarazko Spot Lehiaketaren 15. aldiak. 3.000 euro baino gehiago banatuko dituzte saritan, eta maiatzaren 25a bitartean aurkeztu ahalko dira iragarkiak. Horretarako, spotak Wetransfer bitartez bidali behar dira euspotlehiaketa@arteman.eus posta elektronikora. Mezuan zehaztu behar dira lanaren izenburua, taldeko parte-hartzaileen izen-abizenak eta kontakturako telefono bat. Artxiboek 2GB baino gutxiagoko tamaina izan beharko dute eta Mp4 formatua (H.264 kodekean): “Aurten ere formatua librea izango da, spota edozein formatutan grabatu daiteke, horizontalean zein bertikalean”. Horrez gain, lehiaketaren webgunean dagoen galdetegia bete behar da.
Irudimena eta sormena dira Euspot elikatzen duten iturri nagusiak, eta hortaz, “lehiaketa irekia da eta edozeinek parte hartu” dezake. “Zergatik sortu euskarazko edukiak sare sozialetan?” galderari erantzuten dioten proposamenak aurkeztu behar dira aurten, euskaraz sortzearen indarguneak jaso nahi dituzte, eta antolatzaileek esan bezala, lehiaketaren helburu nagusia da gazteak euskarazko publizitatera gerturatzea eta gazteen sormena sustatzea, “Euskal Herrian sortzen den publizitatearen oinarri izan dadin gure hizkuntza”. Euskarazko Spot Lehiaketa Euskal Herrian “erreferente” bilakatu dela eta “ondo errotutako” lehiaketa dela azpimarratu dute: “Euskarazko sormena sustatzeko helburuarekin sortu zen orain dela 15 urte, eta dagoeneko 1.000 spotetik gora aurkeztu dira, Euskal Herriko txoko guztietatik, Euskal Herriko mapa marraztuz”. Hain zuzen ere, iazko datuak gogoratu dituzte: guztira 115 spot baino gehiago aurkeztu ziren, horietatik 23, 18 urtetik gorakoenak eta 95, adin txikikoenak. Antolatzaileen hitzetan, iazko ekitaldia “oso arrakastatsua” izan zen.
Aurten, iaz bezala, Eusko Jaurlaritzaren laguntza daukate, eta sei sari banatuko dituzte. Sari nagusiei dagokienez, Spotik onena 1.000 eurogaz sarituko dute, Publikoaren sariaren irabazleak 500 euro eskuratuko ditu, eta Gazteen saria, 18 urtetik beherakoena, 500 eurokoa izango da. Musika sinkronizazio onenaren saria irabazten duenak, ostera, 300 euro jasoko ditu. Bi sari gehigarri ere zehaztu dituzte: Mondragon Unibertsitateko ikasleen spotik onena (500 euro) eta Arizmendiko ikasleen spotik onena (250 euro).
Lehiaketaren arduradunek azpimarratu dute euskarazko sorkuntza kalitate handikoa dela, eta indartzen ari dela, eduki-sortzaile berrien olatuari esker. Ondorioz, euskarazko edukiaren “bolumena hazten” ari da, eta gertuko edukiak kontsumitzeko joera “handitzen doa”. Azaldu dutenez, bideo formatuak, adibidez, sortzaile gazte asko animatu ditu beraien lanetan euskara erabiltzera, umorea eta egunerokotasuna ardatz hartuta: “Mundu digitala euskaraz margotzea ekintza sortzaile eta boteretsua da. Euskara da gure bereizgarri nagusia mundu globalizatu honetan, eta edukiak euskaraz igotzean, identitate digital propioa eraikitzen dugu. Ez gara kopia bat; begirada berezia eskaintzen diogu munduari. Erdarazko ozeanoan, euskara da gure balio erantsia. Algoritmo guztien gainetik, errazagoa da erreferente izatea euskal komunitatean, milioika lagunekin gaztelaniaz, frantsesez edo ingelesez lehiatzea baino”. Euspot ez da soilik gazteei zuzendutako lehiaketa, “askotarikoak dira urteetan parte hartu dutenen profilak, jatorriak eta interesak” eta, marka guztiak hautsiz, aurten lehiaketa Euskal Herri osora hedatzea espero dute.
Formakuntza. Bestalde, aurten ere antolakuntzak ikus-entzunezko publizitateari buruzko formazioak eskainiko ditu Euskal Herriko ikastetxeetan, “spot egileen harrobia indartzeko asmoz”. Formazio saioen helburua izango da gazteei sormenaren eta publizitatearen inguruan izan dezaketen “sena sustatzea” eta lehiaketan parte hartzera animatzea. Eman duten informazioaren arabera, azken urteetan “6.000 ikasle baino gehiagok” jaso dituzte Euspoteko formazio saioak.
