Busturialdeko txapela izango dute jokoan
Busturialdeko Bertsolari Txapelketaren finala lehiatuko dute zapatuan, 18:00etatik aurrera, Astran. Onintza Enbeita, Aitor Etxebarriazarraga, Lurdes Ondaro, Asier Galarza, Mikel Retolaza, Koldo Muñiz, Janire Arrizabalaga eta Beñat Bilbao ariko dira bertan.
Busturialdeko Bertsolari Txapelketak baditu zortzi finalistak: Onintza Enbeita, Aitor Etxebarriazarraga, Lurdes Ondaro, Asier Galarza, Mikel Retolaza, Koldo Muñiz, Janire Arrizabalaga eta Beñat Bilbao. Zapatuan (martxoak 14) Gernika-Lumoko Astran, 18:00etatik aurrera lehiatuko dute finala.
Errigoitiko txokoan finalerako pasea zuten jokoan joan den barikuan. Bertan, Ondaro, Koldo Gezuraga, Ibai Amillategi, Enare Muniategi, Iker Uriarte eta Ander Elortegi izan ziren protagonistak, eta saioko irabazle Ondaro izango da Errigoitiko saiotik Astrako finalean egongo den bakarra. Ondarok eta Gezuragak puntuazio bera lortu zuten saioan, 158 puntu, eta berdinketa hiru epaileen puntuazioak aztertuz apurtu zuten; horietako bik Ondarori Gezuragari baino puntuazio gehiago eman ziotelako sailkatu da finalera munitibartarra.
Puntuazioaren arabera, hirugarrena izan zen Amillategi, 153,5 puntugaz, eta laugarren postua lortu zuen Muniategik (153 puntu). Bosgarren eta seigarren geratu ziren, hurrenez hurren, Uriarte (147,5 puntu) eta Elortegi (145 puntu). Seriotasunez betetako saioa izan zen, finala baitzuten jokoan, eta ez zela “umore printza asko” egon onartu dute Lilibertsoko kideek. Hori bai, “giroa sekulakoa” izan zela ere azpimarratu dute, Errigoitiko txokokoen tratua “beti delako ona eta gertukoa”.
Hiru ariketa.
Finalean, giroa serioagoa izango da, afari osteko giroko saioetatik saio formal batera igaroko baitira. Finalean, lehenengoz ariko da Muñiz, eta beragaz batera ibiliko dira inoiz txapela jantzi duten Etxebarriazarraga eta Enbeita, Bizkaiko txapeldun eta txapeldunordea. Beste bostentzat ez da lehenengo aldia izango, eta buruz burukora ailegatzeko lanetan ibiliko dira batzuk zein besteak.
Horretarako, baina, egin beharreko ariketak ongi bete beharko dituzte. Hala, hiru ataletan banatu dute finala: lehenengoan, bertsolari guztiek ofizioka bota beharko dituzte bertsoak zortziko nagusian, zortziko txikian eta koplaka; ostean, puntu gehien lortu dituzten laurek puntua emanda bertso bi bota beharko dituzte, eta, gero, hamarreko txikian ere arituko dira; behin horiek eginda, buruz burukora ailegatzen diren biak puntuka ariko dira zortzi bertso osatu arte, eta ostean, ganbarako lana ere egingo dute: gaia emanda, doinu eta neurri librean.
Bertsolari onenari, Itziar Foruriak jantziko dio txapela. Bera da eskualdeko bertso saio askotara joaten den bertsozaleetako bat. “Txapelagaz gustatzen zaigu aitortza egitea, eta Foruriaren bitartez, bertsozaleari egingo zaio aitortza oraingoan”, azaldu dute Lilibertsokoek. Hala ere, txapelaz gain, buruz burukora ailegatzen diren biek Jokin Abaitua artistaren artelan original bana jasoko dute oroigarri modura, berak boluntarioki Lilibertsori eskaintzen dizkionak.
Astra bertsozaleen aterpea izango da zapatuan, eta aurrekoetan legez, bertsoa gustuko dutenek kulturarako fabrika sozialera bertaratzea espero dute Lilibertsokoek: “Helburu nagusia bertsoaren bitartez komunitatea egitea da guretzat, eta hori lortu dugu. Txokoak bertsoz eta bertsozalez bete ditugu, saio informal bezain lehiakorretan, eta hori polita da. Kuantitatiboki, bai jende eta berotasun aldetik, helburu guztiak bete ditugu”. Izan ere, bertso eskualdeko leku desberdinetara eroatea ere lortu dute, beste behin: “Gure apustua da, bai Busturialdeko Bertsolari Txapelketarekin, bai Argi Baltzarekin, sasoi batean herri txikietan egoten zen bertsoarekiko bizia berreskuratzea. Herri txikiei historikoki izan duten balioa eta lekua eman nahi diegu, baina baita beste bertso formatu batzuei ere. Horiek sustatu gura ditugu, merezi duten lekua eman nahi diegu. Gernikatik kanpora ere existitzen direlako lekuak, existitzen delako horrelako ekitaldiak antolatzeko prest dagoen jendea, badaudelako euskararen alde eta herriko biziaren alde lan egin gura duten herritarrak, eta hori oso positiboa da”.
