Zuriketaren aurrean, elkartasunerako "bide berriak" urratzen segitzeko aldarria
Gernika-Palestina Deialdi Herritarrak deituta, eskualdeko herritarrek genozidioaren "zuriketa" salatu dute, 'Gernika Palestinarekin BAT' lelopeko manifestazioan. Israelek genozidioagaz aurrera segitzen duen artean, bertako talde batek nazioarteko txapelketarik "jokatu beharko ez lukeela" salatu dute.
Ver esta publicación en Instagram
Lointek Gernika Bizkaiaren eta Elitzur Ramlaren arteko Eurocup Womeneko partiduak, Gernika-Lumon barik, Bulgarian jokatuko dituztela jakin ondoren, eskualdeko herritarrek neurri hori nahikoa ez dela aldarri egin dute, eta kirolaren atzean ostondutako genozidioaren “zuriketa” salatu dute gaur [azaroak 21] iluntzean, Gernika-Lumoko kaleetan. Gernika-Palestina Deialdi Herritarrak manifestazioa deitu du, Gernika Palestinarekin BAT lelopean; mobilizazio horretan, argi eta garbi utzi gura izan dute partiduak lekualdatzea “ez dela nahikoa”.
Hain zuzen ere, nabarmendu dute auziaren “gakoa” Elitzur Ramlak nazioarteko txapelketetan “ezin joka dezakeela” argitzea dela: “Herri baten suntsiketa
eta desagerrarazpena sustatzen duen estatu bateko kirol taldeak zigortu egin beharko lituzkete hori dagokien erakundeek, kasu honetan, FIBAk. Beraz, Elitzur Ramla talde israledarrak Eurocup Women lehiaketatik kanpo egon beharko luke”. Neurketa tokiz aldaketa “urratsa” dela adierazi dute, egiturazko aldaketa ez izanagatik ere. Edozelan ere, Gernika-Palestina Deialdi Herritarrak aurreratu du hilaren 27rako iragarritako manifestazioa bertan behera geratuko dela.
“Giza laguntza Gazara sartzea eragotziz gero, 55.000 haur hil daitezke, goseteagatik”
Partiduen inguruko testuinguru aldatuberria “konplexua” dela azalduta, Palestinari elkartasuna adierazteko “bide berriak” urratzen jarraitzeko konpromisoa mahaigaineratu dute, genozidioaren dimentsio guztiek “bere horretan” dirautelako: “Negua ate joka dago, eta, desplazamendu orokorraren ondorioz, palestinarrak kanpadendetan bizitzera kondenatuak daude, baldintza basatietan”. Bestalde, giza laguntzari —edo laguntza ezari— ere keinu egin diote: “UNRWAk eta UNICEFek adierazitakoaren arabera, palestinarrek giza laguntza jasotzea eragotziz gero, Gazan 55.000 haur hil daitezke, goseteagatik; horrenbestez, inoiz baino beharrezkoagoa da Palestinagaz bat egiten duen herria irudikatzea eta eraikitzea”.
Datu beldurgarriak.
Gaur-gaurkoz, genozidioak eragindako hildakoen zerrenda izugarria da: 70.000 inguru dira, horietatik 20.000 bat, umeak. 170.000 zauritutik gora zenbatu dituzte, baita 14.000 desagertu ere, tartean, 1.200 osasun behargin eta 250 kazetari inguru. Bortxaz desplazaturikoen kopurua are bortzitzagoa da: ia bi milioi dira.
“Memoriadun herria gara, eta, hortaz, ‘Gernika berririk ez’ oihukatzeko beharra dugu”
Triskantza horren aurrean, mobilizatzen segitzeko beharra plazaratu du Gernika-Palestina Deialdi Herritarrak, eta, alde horretatik, beraien manifestura bildutako 70 eragile, talde zein elkarteei “eskerrik beroenak” eman dizkie: “Memoriadun herria gara, lehen eskutik ezagun ditugu suntsipenaren ondorioak, eta, hortaz, Gernika berririk ez oihukatzeko beharra dugu”.
