Badator Rudelari Eguna, komunitatea aktibatzeko eta dantzan jartzeko eguna
XIII. Rudelari Egunean elkartuko dira rudelariak zapatuan (azaroak 22), Gernika-Lumon. Egun osoko egitaraua prestatu dute, eta herriko kaleak, Aterpe, Zeppelin eta Astra izango dira jaialdiko kontzertu eta jardueren agertokiak aurtengoan.
Urtaro aldaketagaz dator aurten XIII. Rudelari Eguna. Orain arte maiatzean egin izan duten topaketa azarora egunez aldatu dute, baina, udaberrian egin modura, oraingoan ere egitarau zabala prestatu dute reggae musikaz gozatzeko. Hala, eguerditik goizaldera arteko plana zehaztu dute, eta herritarrei bertaratzeko deia egin diete.
Gernika-Lumoko kaleak, Aterpe, Zeppelin eta Astra izango dira jaialdiko kontzertu eta jardueren agertokiak aurtengoan, eta kalean jaialdiak izango duen presentzia nabarmendu dute rudelariek: “Lehen poteoa eta kontzerturen bat egiten genituen kalean, baina oraingoan zarata apurbat egin gura dugu, gure musika herrira gerturatu gura dugu, azaroko zapatu triste bat gozamenerako aukera batekin pozteko”.
Egunez eta hilabetez aldatu dute Rudelari Eguna “beste proposamen batzuekin ez bateratzeko”, izan ere, askotan bat egin du Ibilaldiarekin, Arrain Azokarekin, Muxikako Gazte Egunarekin… “Iaz ez genuen irabazirik izan, sekulako zuloa egin genuen, eta taldekoei gure poltsikotik dirua jartzea tokatu zitzaigun. Hala, erabakiak hartu behar genituen, eta hala egin dugu. Ikusiko dugu nola funtzionatzen duen”, adierazi dute rudelariek. Hori bai, antolatu dituzten ekintza guztiak kontutan hartuta, bitan bakarrik gertatu zaiela hori gogoratu dute. Gainera, zozketarako tiketak saltzen dabiltza oraingoan, hortik ere diru gehiago lortzeko, soinu teknikariari edota talderen bati ordaintzeko. Hain zuzen ere, sariak Sasoiek eta Iparrek jarri dituzte, baita taldeek ere, euren merchandisinga egongo baita, eta horiei euren ekarpena eskertu diete Gerniska taldeko kideek.
Egunerako azken ukituak egiten dabiltza, izan ere, eguna indartsu abiatuko dute. Euskal Herriko reggae munduko 16 eragile desberdinek elkarlanean ateratako Sustraian Recordsen abestien bilduma berria aurkeztuko dute 13:00etan, Pasealekuan. Sustraian Records Iruñerrian orain 10 urte sortutako sorkuntza espazioa eta musikari zein musikazaleen topagunea izan da; besteak beste, musika jamaikarra sortzeko, grabatzeko, jaialdiak antolatzeko… gunea da. “Euskal Herrian erreferente izan dugun kolektiboa da, eta inoiz argitaratu gabeko kantu asko izan dituzte kaxoian sartuta, euskaraz. Hala, sare baten parte garen kolektibo ezbeerdinen artean LP bat kaleratzea erabaki dugu, eta hori da Pasealekuan aurkeztuko dutena”, azaldu dute rudelariek. Gehitu dute bilduma berri hori eskuragarri egongo dela bertan.
Eta, aurkezpenaren ostean, jaiak ez du etenik izango. Gernikako kaleetara zabalduko dute euren musika eta kultura, Sound System ibiltariarekin, herriko taberna eta kaleak giroz jantziz: “Herrira hurbildu gura dugu gure musika. Proiektua herriratu gura dugu, jendeak ikus gaitzan, eta zarata apur bat atera dezagun”.
Sound Systema Aterpe tabernan amaituko da, bertan egingo baitute urtero egiten duten indaba jan herrikoia, 15:00etan. Orain arte Astran egin izan dute bazkaria, baina aurten kalean egingo dute: “Janaria guk prestatu izan dugu, baina indar asko kentzen zigun, eta hori beste pertsona batek prestatzea erabaki genuen. Arroyo prest agertu da laguntzeko, eta berak prestatuko du jatekoa”. Hain zuzen ere, 60 lagundik gora elkartuko dira bazkarian, eta aurreikuspenak bete dituztela onartu dute rudelariek. Hala ere, bertaratu gura dutenek Gerniska Rudelari Taldekoei sare sozialetan idatzita izena eman dezakete.
Egonaldia luzatuko dute jan ostean, bertan izango baita arratsaldeko lehen kontzertua: Agoteak taldearen kontzertua ikusi ahalko dute bertaratzen direnek. Donostiako eskarmentu handiko musikariak sortutako talde berria da, Jamaikako roots reggae musika oinarri daukana.
Eta, gorputzak berotuta, Astrara lekualdatuko dira 22:00etarako, Arratians eta Smooth Beans musika taldeak igoko baitira ohotzara. Lehenengoak Arratiatik hurbilduko dira. Euren lehen kontzertua Rudelari Egun batez eman ostean, oraingoan lan berriarekin bertaratuko dira. “Etxeko taldea dira, MG Bandatik datozenak. Reggae goxoa eta itsaskorra ekarriko dituzte Arratiatik Astrara”, esan dute rudelariek.
Eta, Smooth Beans Kantabriako taldea, aldiz, ibilbide luze eta oparoduna da. Europatik ere ibili izan dira euren lanak aurkezten, baina zenbait “gorabehera” izan dituzte taldean, eta bederatzi urtez ezer kaleratu barik egon ostean, abesti berriak aurkeztuko dituzte Astran. “Aurreikuspen onak ditugu, oso harreman ona baitugu eurekin. Jende oso jatorra dira”, esan dute.
Eta, egunaz gozatzen segitzeko indarra eta gogoa duenaretzako ere horretarako aukera prestatu dute rudelariek: jaialdiari amaiera emateko ardura Reggae Soul Brotherrek izango du, Zeppe tabernan.
“Gozatzeko eguna”.
Rudelari Eguna beti izan da reggae eszenako eragile eta lagunen topaleku bat, erreferentziazko zita. “Hasierako helburua gozatzea eta ondo pasatzea zen, eta hala jarraitzen dugu. Gure musika zaindu eta horri ateak zabaldu nahi dizkiogu, beti ondo pasatuz”, esan dute.
Hala, beste asmo eta helburu batzuen artean, euren “komunitate txikia aktibatzeko” eguna dela ere azpimarratu dute, “harreman sareak sortaraztekoa” eta, ondorioz, “askotan” proiektu berri eta interesgarrien jatorria: “Polita da zelako sarea sortu dugun ikustea: Bilbo, Donostia, Iruña, Gasteiz, Durango, Kantabria… leku askotako jendea ezagutu dugu, eta, polita da sare horren parte izatea. Askotan, bazkalosteko tertulietan proiektuak ere sortu dira, eta horrek asko betetzen gaitu”.
Urtez urte ereindako sare horren parte direnetako batzuek, gainera, duela 15 urte ateratako kamiseta berriro kaleratzeko eskatu diete, eta hala egin dutela kontatu dute rudelariek, diseinua bere horretan mantenduz. Kamiseta horiek zein Sustraian Recordsen LPa Astran egongo dira eskuragarri. Eta, horrez aparte, Joana Carballoren lana eskertu dute, etxeko artista izan baita edizio honetarako kartelaren eta irudien sortzailea.
EGITARAUA.
13:00. Sustraians taldearen LP aurkezpena Pasealekuan.
13:30. Poteo Sound System Arranotik hasita.
15:00. Bazkaria Aterpen.
19:00. Kontzertua Aterpen: Agoteak.
22:00. Kontzertuak Astran: Arratians eta Smooth Beans.
01:00. Pintxada: Reggae Soul Brothers, Zeppen.
