San Kristobaleko biribilgunetik Altamirarako adarraren obren bigarren fasea, abian
Inguru horretako obren helburu nagusia da BI-3215 errepidearekiko bidegurutzea kentzea, ibilgailuak Altamirara biribilgunetik bakarrik sar daitezen. Enpresek hilaren 25era arteko epea dute, beren proposamenak aurkezteko.
Busturiko Udaletik aditzera eman dutenez, abian jarri dituzte San Kristobaleko biribilgunetik Altamirarako adarraren bigarren faseari dagozkion obrak. Enpresek azaroaren 25era bitarteko epea dute, lizitaziorako beren proposamenak telematikoki aurkezteko; horretarako, udalaren web orrialdera jo beharko dute, Kontratatzailearen Profila atalera. Lanen iraupena zazpi hilabete ingurukoa izatea aurreikusten dute, 1.484.593,78 euroko lizitazio prezioagaz. Udal ordezkariek “bide segurtasuna hobetzea” bilatuko dute lanekin, alde batetik; bestetik, herriguneko esparruen arteko “konektibitatea sendotzea”. Obren funtsa aipatutako biribilguneko adarra Altamirarako pasabide bakar bihurtzea da, BI-3215 errepidearekiko bidegurutzea kenduz.
Aitor Aretxaga: “San Kristobal auzoko eta biribilgune berriko hirigintza hobekuntzek trafiko bareagoa eta segurtasun handiagoa ematen dizkiete Altamirako eta San Kristobaleko sarbideei”
Aitor Aretxaga alkateak adierazi duenaren arabera, herritarren segurtasuna eta ongizatea dira obren “oinarria”, eta inbertsioaren funtsa “auzoen bideragarritasuna hobetzea”: “San Kristobal auzoko eta biribilgune berriko hirigintza hobekuntzek trafiko bareagoa eta segurtasun handiagoa ematen dizkiete Altamirako eta San Kristobaleko sarbideei. Orain, bide horren jarraitutasunari ekingo diogu, konektibitatea hobetuko duen adar bategaz”.
Jarduketari berari dagokionez, biribilgunea Altamiragaz erlazionatzen duen egungo bidea konpondu egingo dute, baita asfaltatu eta egokitu ere. Halaber, BI-3215 errepideareikiko bidegurutzea kendu egingo dute. Hala, ibilgailuei biribilguneko aukera baino ez zaie geratuko, Altamirara jotzeko. Bide horren inguruko oinezkoentzako eremua hobetzea ere aurreikuspenen artean dago. Ibilgailuak Náutica Busturia enpresara sartu ahal izateko bide berria ere egingo dute.
Bestalde, proiektuaren finantzaketa partekatua izango da, udalaren, Bilbao Bizkaia Ur Partzuergoaren eta Bizkaiko Foru Aldundiaren Azpiegitura eta Lurralde Garapen Sailaren artean. BBUPren parte hartzeari dagokionez, udalak lankidetza hitzarmena sinatu du erakunde horregaz, eremu horretan etorkizunean berriro obrekin “ez eragiteko”. Hain zuzen, partzuergoak epe ertainean San Kristobalen saneamendu nahiz hornidura beharrak egitea dauka aurreikusita.
