Garaipenak, azken hasperenean ihes
Lointek Gernika Bizkaiak 62 eta 60 galdu du NKA Universitas Pecs taldearen aurka, Eurocup Womeneko multzokako ligaxkaren bigarren jardunaldiko joanekoan. Domekan [urriak 19], ligako partidua jokatuko dute Malosten, 12:30ean, Casademont Zaragozaren kontra.
Argazkia: Gernika KESB. Lointek Gernika Bizkaiak Eurocup Women txapelketako multzokako ligaxka faseko bigarren jardunaldiaren joaneko partidua jokatu zuen atzo [urriak 15], NKA Universitas Pecs, taldearen aurka. Arerio eta erronka gogorrak zituzten jakitun, gernika-lumotarrei gogotik behar egitea tokatu zitzaien. Partidu lehiatuari aurpegia erakutsi arren, azkenean, markagailuak hungariarren aldera jo zuen: 62 eta 60. Azken segundoetara arte, Malostekoak bizirik mantendu ziren neurketan, defentsa lerro solidoa eraikita, baina ez zen garaipena poltsikoratzeko nahikoa izan.
Laura Westeriken lau puntuekin eta Ane Olaeta gernika-lumotarraren hiruko saskiratzeagaz ekin zioten norgehiagokari bisitariek, erritmo bortitza tarteko. Erlojuak minutu bi eta erdi bistaratzen zituenean, etxeko taldeak hutsartea eskatu behar izan zuen, eta geldialdi hark fruitua eman zien jarraian: Gernikaren akatsak eragin zituzten, defentsan agresibo azalduta; markagailua irauli zuten, eta jaurtiketa libreetan sendo agertu ziren. Esther Castedoren hirukoak Lointeken unean uneko blokeo egoera hautsi zuen. 14 eta 12koagaz burutu zuten lehen laurdena.
Julia Reisingerova izan zen Gernikaren amesgaiztoetako bat. Txekiarraren eta bere taldearen presioak Lucas Fernandez entrenatzailea hutsartea eskatzera derrigortu zuen. Ondoren, hirukoen hartu-emana hasi zen, eta lehia hartan giltzarri izan zen, berriro ere, Castedo. Atsedenaldirako munitu bakarra falta zenean, markagailuak 29 eta 26koa islatzen zuen, baina azkenean 30 eta 28koagaz joan ziren aldageletara.
Joy Adamsek konexio aparta eduki zuen Westerikegaz, jokoa berrezarri bezain pronto. Binomio hark 30eko berdinketara eroan zituen gernika-lumotarrak. Hori bai, hirugarren laurdenean zehar egindako galerek Agnes Stunderren iraultza probokatu zuten; hungariarrak, Reisingerovagaz batera, min handia egin zuen uztaipean eta jaurtiketa libreetan. Olaeta, Castedo eta Masa Jankovic serbiarra arduratu ziren bisitarien aukerak bizirik mantentzeaz, eta 41 eta 42 aurrea hartzeraino ere iritsi ziren. Hirugarren laurdenaren hondarrean, den-dena airean zegoen: 46 eta 46.
Ozta-ozta.
Itxaropentsu abiatu zuten azken txanpa, 0 eta 8ko partzial distiratsuagaz. Ia bost minutuko tartean, Gernika partiduaren ugazaba izan zen. Pecs presioa egitera mugatu zen, 53 eta 54koagaz kanpotarrei hutsartea eskatzera derrigortu arte. Ia hiru minutu eta erdi falta ziren amaierarako. Hungariarren partziala 12 eta 0koa izatera iritsi zen, bisitariak arazo larrietan sartuz. Adamsek 58ko berdinketa lortu zuen minutu eta erdi inguru falta zenean, eta Jankovicek erasoko errebote bat zukutu zuen: 59 eta 60.
Azken hutsartearen ondoren, Castedok jaurtiketa libre bitan huts egin zuen. Hutsik egin ez zuena, baina, Reisingerova izan zen: egundoko 2+1 jokaldia biribildu zuen, etxekoen garaipena azken hasperenean ziurtatuz. Pecs 62 eta 60 nagusitu zen; Lointekek porrot borrokatua baina gogorra jaso zuen.
Lucas Fernandez: “Egia da erasoan eraginkor azaltzeko trabak izan ditugula une jakin batzuetan, eta arerioei lehian sartuta jarraitzea ahalbidetu dien hutsegiteak eduki ditugula. Edozelan ere, egoerei buelta emateko gai izan gara uneoro”
Garaipenak esku artetik ihes egin arren, Fernandez entrenatzailea bere jokalariek egindakoaz “oso harro” azaldu zen: “Egundoko esfortzua egin dugu, eta lehiakorrak izan gara partiduak iraundako 40 minutuetan. Egia da erasoan eraginkor azaltzeko trabak izan ditugula une jakin batzuetan, eta arerioei lehian sartuta jarraitzea ahalbidetu dien hutsegiteak eduki ditugula. Edozelan ere, egoerei buelta emateko gai izan gara uneoro”.
Hungariarren erasoko errebotea “aurretiaz buruan zuten” indargunea zela aitortu du Fernandezek, eta jaurtiketa libreek partidu osoan edukitako esangura plazaratu: “Gaur-gaurkoz, garailea zoriontzea eta hutsetatik ikastea dagokigu; itzulerako partiduari begira, ate denak zabal-zabalik ditugu oraindik”. Partidu hori orduko, domekan [urriak 19], Casademont Zaragoza taldea edukiko dute aurrez aurre, 12:30ean hasita, Malosten.
