"Euskal Selezioaren eta Palestinaren aurkako neurketa bakea aldarrikatzeko eta defendatzeko partida izango da"
Euskal Selekzioak eta Palestinak futbol partida jokatuko dute San Mamesen, azaroaren 15ean. Gaur aurkeztu dute norgehiagoka Gernika-Lumoko Bakearen Museoan. Karga emozional eta politiko handiko aurkezpena izan da, eta partida bakea aldarrikatu eta defendatuko duen topaketa izango dela berretsi dute.
Euskal Selekzioak eta Palestinak azaroaren 15ean (zapatua), 20:30ean, jokatuko duten eta elkartasuna oinarri izango duen nazioarteko norgehiagoka aurkeztu dute gaur (urriak 4) Gernika-Lumoko Bakearen Museoan, Guernica koadroa atzean zutela. Eta, memoria historikoa eta konpromiso etikoa uztartzen dituen gune horretatik, jakinarazi dute, partiduko sarreretatik lortutako diru guztia Gazan “bizitzak salbatzeko lanean” ari diren erakunde humanitarioetara bideratuko dituztela.
Futbolak elkartasunerako bozgorailu modura balio dezakeela sinetsita antolatu dute partidua, bakea defendatzeko eta eskatzeko helburuagaz. Hala adierazi du Iker Goñi Euskadiko Futbol Federazioko presidenteak: “Hau ez da partida bat gehiago izango. Topaketa solidarioa izango da, bakea aldarrikatu eta defendatuko duena”.
Jibril Rajoub Palestinako Futbol Federakundeko Presidenteak ere, azaroaren 15eko partida ez dela lehia hutsa izango azpimarratu du: “Oroimenaren gune sakratu honetan hartzen du futbolak bere esanahirik handiena. Hau ez da trebetasun erakustaldi hutsa, futbolaren botere moralaren erakusgarria baizik. Futbolak itxaropena emateko, batzeko eta hitz egiteko duen gaitasunaren topagune izango da partida, beste batzuen isiltasunaren aurrean”.
36ko gerran zein ondorengo urteetan Euskal Selekzioa atzerrira joan zela gogoratu du Goñik, “euskaldunek bizirauteko behar zuten dirua lortzera”. Oraingoan, baina, 90 urte beranduago, “itzuliko partida” jokatzen ari dela dio: “Palestinari buruz hitz egiten dugunean, gertukoaren oihartzuna sentitzen dugu”. Palestinar herriak larritasun eta galera handiko egoera bizi du, beraz, mezua argia transmititu dute: “Futbolak zubiak eraiki ditzake, ahotsa eman dezake, munduari gogorarazi diezaioke herriek bakean eta askatasunean bizitzeko eskubidea dutela”.
Partida hori “historia” izango dela gehitu du Rajoubek, Euskal Selekzioaren aurkakoa izango baita Palestinak Europako selekzioen aurka jokatuko duen nazioarteko lehenengo partida. “Partida hori jokatzeak futbolaren benetako izaera erakutsiko du: joko garbiaren erakusle izango da neurketa, milaka pertsona poztuko dituen jokoa, edozen kantuk baino mezu indartsuagoa transmitituko duena: bidegabekerien aurkako mezua, arrazakeriaren aurkakoa, genozidioaren krimenen aurkakoa”. Hala, neurketa horrekin munduari gogorarazi gura diote kirolak ezin dituela “neurri bikoitzak” onartu, ezin duela “ankerkeriaren aurrean neutrala” izan.
Aurrez aurreko horrek bilduko duena esperantza izango dela uste du Rajoubk: “Eskerrak ematen dizkiot Euskadiko Futbol Federazioari, ez bakarrik zelaian jokatzeko aukera emateagatik, baita diru sarrerak erakunde humanitarioetara bideratzeagatik ere. Elkartasun keinu bikaina izango da, horrek sendagai bat haur baten eskuan jarriko duelako, ama bati itxaropena emango diolako, baita familiarentzako janari hondarren bila joatearren bere bizia arriskuan jartzen duen aitari ere”.
Gaurko aurkezpenean egon da Yaser Hamed Palestinako jokalari euskalduna, eta beretzat partida hori jokatzea “ohore handia” izango dela esan du, ez bakarrik kirol arloan duen garrantziagatik, baita zabalduko duen mezu ozenagatik ere: “Bi selekzioetan parte hartu dut, eta San Mamesen jolastea, helburu honekin, zerbait zoragarri eta ahaztezina izango da, nire bizitzako oroitzapenik hunkigarrienetako eta garrantzitsuenetako bat, seguru aski. Partiduaren helburua argia da: gizatasuna, elkartasuna eta bakea adieraztea, eta espero dut hori lortzea. Gu bakearen bozgorailu gara eta zerbait ahaztezina izango da”.
Bere kideentzako ere berezia izango dela onartu du, horietako batzuekin hitz egin duela esanda. “Pozik daude Europan jokatu ahal izateaz, baina bereziki partida San Mamesen izateaz. Euskal Selekzioak lehen mailako jokalariak dituela badakigu, baina gu ere indartzen ari gara, lehen mailako jokalariak ditugu, eta uste dut bai kirol arloan, bai elkartasun mezu modura, ederra izango dela”, gehitu du Hamedek.
Hala, espero du partidak balio izatea “palestinarrei ahotsa emateko”, munduak ikusteko Palestinan gertatzen ari dena, eta ondorioz, horrekin amaitzeko. “Ahal dugun guztia egiten saiatuko gara mudnu mailan ahotsa emateko palestinarrei, eta espero dugu San Mames beteta ikustea”.
Partidua antolatzea ez dela “inondik inora” erraza izan onartu du Goñik, eta eskerrak eman die horretan lanean aritu diren guztiei: “Trabak baino, horrelako partiduak antolatzeko onarpen asko behar dira, dokumentu horiek lortzeak bere denbora eta lanketa darama”. Jakinarazi du sarrerak oraindik ez dituztela salgai jarri, baina aurreikusi du sarrerak partida baino hilabete lehenago euren webgunean jarriko dituztela salgai. Kirol kontuei dagokienez, horiek bigarren mailan egon dira gaurko aurkezpenean, eta aurrerago sakonduko dutela horretan gehitu du.
Mezua, Gernikatik.
Gernikan egin dute aurkezpena, eta bertan egonda, 1937ko apirilaren 26ko bonbardaketa gogoratzea “ezinbestekoa” izan da Goñirentzat: “Basakeriak herria suntsitu zuen, eta 2.000 pertsona hil zituen. Gernikako tragedia indarkeriaren eta bidegabekeriaren aurkako sinbolo unibertsal bihurtu zen. Eta, gaur egun, ia 90 urte geroago, sinbolo horrek bizirik dira eta besteen sufrimenduaren aurrean interpelatzan gaitu”.
Goñik Francesca Albaneseren —Giza Eskubideen aldeko ekintzailea da— datuak aipatu ditu gaur, Gazan gertatzen ari denari erreferentzia egiteko. “Gazako heriotzak 680.000 pertsonatik gorakoak izan daitezke. Eta, hori errealitatera hurbiltzen dela suposatuz, urte bakar batean 340 Gernikaren pareko suntsipenaz hitz egiten ari gara. Eta hori ezin dugu alde batera utzi”.
Jibril Rajoub: “Erakutsi diguzue Palestina ez dagoela bakarrik, giza duintasunak oraindik defendatzaileak dituela, eta horrek indarra ematen digu”
Palestinako Futbol Federakundeko Presidenteak Gernikako tragedia ere gogoratu du, eta bonbek isilarazi zituzten ahotsek oraindik xuxurlatzen duela azpimarratu du. Hala, bertatik jaso duten besarkada eta elkartasuna nabarmendu ditu: “Elkartasuna sentitu dugu bai Gernikako, bai Bilboko kaleetan: banderak, ahotsak, besarkadak bildu gaituzte. Erakutsi diguzue Palestina ez dagoela bakarrik, giza duintasunak oraindik defendatzaileak dituela, eta horrek indarra ematen digu”. Eta, Gernikako hondakinetatik, Gazako hondakinetaraino, mezua berdina dela esan du: “Partidu honi esker futbolaren munduko erakunde nagusietako korridore isilek oroitu dezatela izugarrikeriaren aurrean ezin dela neutrala izan. Inoz gehiago ez. Gaur, baloi bat oinetan dugula, mezu hori zabalduko dugu”.
Hala, Donald Trump Estatu Batuetako preosdenteari ere zuzendu zaio presidentea. Esan dio “ulertu dezala behingoz” Israelen gainean presioa egin behar duela, eta “goseari zein genozidioari amaiera emateko unea” iritsi dela.
Rajoubek gogoratu du 34 urte bete zituenerako Israelgo espetxeetan eman zituen haietako hamazazpi. Baikor azaldu da, halere, Palestinaren aurkako erasoak eteteko aukerari buruzko azken albisteen harira, baina, haren ustez, “autodeterminaziorako eskubidea” da bake egonkor eta iraunkor baterako ezinbesteko baldintza. “Israelek ezin du egiten ari dena egiten jarraitu, eta era berean futbolean jokatzeko aukera izaten jarraitu. Ezinbestekoa da zigorrak ezartzea. Hori ezartzen dute FIFAko estatutuek eta oinarri olinpiarrek ere. Halako erabakiak hartzeko neurriak berbera izan behar luke guztientzat”.
Jose Mari Gorroño Gernika-Lumoko alkateak Gaza sutan dagoela berretsi du, “denon begien aurrean”, eta hori gelditzeko “inork ez duela ez egiten” gehitu du: “Gizateriaren basakeriarik larrienetako baten aurrean gaude. Gizateria mutu dago, etsita. Gaur egun ez dute estatuek eta demokrazia handiek agintzen, korporazio eta kapitalek handiek zehazten dute munduaren norabidea. Dirua da garrantzitsuena. Boteretsuek terrorismoaz hitz egiten dute eta terminoa manipulatzen dute. Ahulenen izua gaitzesten dute, baina normalizatu egiten dute beraiek darabiltena”.
Bide diplomatikoek porrot egiten badute, nazioak nagusitu egin behar direla uste du alkateak, “justizia gorteen legea betearazteko”. Krimen horiek eragotsi eta hori bultzatzen dituzten boteretsuak epaitu beharko litezkeela gehitu du, eta Gernikak justizia sozialaren bilaketan jarraituko duela esan du: “Gernika bonbardatu eta suntsitu egin zuten, eta bakearen eta adiskidetzearen aldeko aktibista bihurtu zen eta da. Eta justizia sozialaren bilaketan jarraituko du, bakearen alde borrokatzen”.
