'Alerta Gorria' amaitutzat eman du Guggenheim Urdaibai Stopek
Nazioarteko erakundeak Guggenheim Urdaibai proiektuak biosfera erreserbarentzat suposatzen duen "mehatxu larriaz" ohartarazteko sortu zuten kanpaina Mediterranean Alliance for Wetlandsekin batera, eta lau hilabete beranduago, helburua "betetzat" jo dute.
Guggenheim Urdaibai Stop plataformak amaitutzat eman du Mediterranean Alliance for Wetlandsekin (MAW) batera abiatutako nazioarteko Alerta Gorria kanpaina. Maiatzaren 19an hasitako ekimenagaz plataformak Guggenheim Urdaibai proiektuak biosfera erreserbarentzat suposatzen duen “mehatxu larriaz” ohartazi nahi zituen nazioarteko erakundeak, eta lau hilabete beranduago, helburua “betetzat” jo dute.
Kanpainaren bukaera iragartzeko prentsaurrekoa eskaini dute gaur goizean [irailak 18] bi eragileek EHUko Bizkaia Aretoan eta bertan, zientzia-munduak Urdaibaik beharrezkoa duen zaintzari emandako babesa “oso positiboki” baloratu dute Guggenheim Urdaibai Stopeko kide den David Hendersonek. Era berean, kanpainaren parte gisa, MAWk “natura ondarea babesteko funtsezkoak” diren hiru erakunderi gutun ofizialak bidali zizkiola nabarmendu du: Ramsar hezeguneak kontzerbatzen dituen nazioarteko erakundeari, UNESCOri eta Espainiako ingurumen politiken azken arduraduna den Trantsizio Ekologikorako eta Erronka Demografikorako Ministerioari (MITECO). Horrez gain, zientzialarien manifestu bat ere argitaratu zuen, “mundu akademikoaren eta ikertzaileen babesa bilatuz”.
Argazkia: Guggenheim Urdaibai Stop plataforma
Agerraldian, arriskuan dauden ekologia-, kultura- eta gizarte- balioak “garrantzitsuak” izan arren hiru erakundeetako batek ere ez diela erantzun azaldu dute: “Jakin badakigu MITECOri bidalitako gutuna Gobernuko Hirugarren lehendakariordea eta Trantsizio Ekologikorako eta Erronka Demografikorako Ministra denaren gabinetera helarazi zaiola; UNESCOren kasuan, jakinarazi digute MaB Programaren Espainiako Batzordeak ezarritako prozedurari jarraituz hasi dela gure eskaera izapidetzen, eta espero dugu gaur bertan egingo den MaB Batzordearen bilera ta gero, erantzuna izatea. Ramsarren kasuan, oraindik ez dugu inolako jakinarazpenik izan”. Erantzun falta horrek agerian uzten du ingurumena babesteko mekanismoen hauskortasuna, interes ekonomiko eta politikoei aurre egin behar dietenean”.
“Nazioarteko eta estatuko erakundeak isiltzen badira, ahotsa altxatzen jarraituko dugu”
Zientzialarien manifestuari dagokionez, “guztiz kontrakoa” gertatu dela adierazi du Hendersonek, jasotako erantzuna “oso positiboa” izan dela eta “kontraste deserosoa agerian” geratu dela zehaztuta: “Komunitate zientifikoak ahotsa altxatu eta UNESCOk aitortutako Biosfera Erreserba baten oreka arriskuan jarriko duen proiektu baten arriskuez ohartarazten duen bitartean, babes eta zaintzan lehenak izan beharko luketen erakundeak isilik daude, edo, behintzat, espero zitekeen sendotasunik ez dute erakutsi. Hutsune instituzional horrek mesfidantza soziala sortzeaz gain, interes ekonomikoak edo politikoak nazioarteko konpromisoen eta ingurumen-erantzukizunen gainetik jar daitezkeela ere adierazten du.”
Hala, plataformatik kanpainaren egitekoa bete dutela uste dute: “Gure partea bete dugu: Urdaibai babesteko ardura dutenei ohartaraztea, dokumentatzea eta laguntza eskatzea”. Orain, ekimena amaituta, Guggenheim Urdaibai Stopek “lurraldearen defentsaren alde lanean jarraitzeko konpromisoa” berretsi du, herritarrei “erne” egoteko eskatuz: “Erakundeek bultzatutako entzute-prozesuan aktiboki parte hartzen jarraitu behar dugu, eta proiektu honi kontra egiten jarraitu aukera dugun eremu guztietan”. Hala egingo dute irailaren 22tik 27ra bitartean UNESCOk Txinan egingu duen biltzarrean, plataformak gutun bat bidali baitu Busturialdea bezalako eskualde batean Urdaibai bezalako proiektu baten suposatzen duen mehatxua azaltzeko: “Nazioarteko eta estatuko erakundeak isiltzen badira, ahotsa altxatzen jarraituko dugu. Urdaibai ez dago salgai”.
Zientzialarien manifestua.
Urdaibaiko Biosfera Erreserbako estuarioan Guggenheim museoa jartzearen kontra eta bertako biodibertsitatea modu eraginkorrean zaintzearen aldeko zientzialarien manifestua koordinatu du MAWk. Guggenheim museoaren egoitza berriak izango lukeen “eragin larriaren” jakitun, guztira, biodibertsitatearen azterketarekin eta kontserbazioarekin konprometitutako 378 ikertzailek sinatu dute idatzia, Eusko Jaurlaritzari eta Bizkaiko Foru Aldundiari eskatzeko “ez dezatela Guggenheim Urdaibai proiektua burutu aipatutako lekuan, eta halaber, beharrezko ekintzak egin ditzatela lehortutako padura-azalera lehengoratzeko, marearteko eremu bihurtuz, Urdaibaiko erreserban uretako hegaztien kontsebazio eraginkorra aktiboki bultzatzeko”.
Aitor Galarza eta Arantza Aldezabal biologian doktoreek azaldu dutenez, sinatzaile gehienak Espainiako eta Euskal Herriko unibertsitateetan, ikerketa-zentroetan eta elkarte zientifikoetan lan egiten duten edota laguntzen duten doktoreak badira ere, Alemanian, Frantzian, Erresuma Batuan, Finlandian, Italian, Portugalen, Polonian, Herbehereetan, Danimarkan eta Ameriketako Estatu Batuetan lanean diharduten ikertzaileek ere bat egin dute idatziagaz. Era berean, “aipagarritzat” jo dute Euskal Herriko Unibertsitatean Klima Aldaketarako Euskal Zentroan (BC3) eta Zientzia eta Berrikuntza Ministerioko Ikerketa Zientifikoen Kontseilu Nagusian (CSIC) lan zientifikoa egiten duten doktore ikertzaileengandik jasotako babesa.
