Txirrinduaren festan, Zubero azkarrena
Serrats Aldapa Xtremek kirola eta elkartasuna uztartu ditu hirugarren urtez. 293 txirrindularik parte hartu dute Serrats Aldapa Xtrem maratoian, eta 75 kilometroko lasterketan Julen Zubero gailendu da. Lasterketa laburrean, aldiz, bermeotar bat: Aitor Ispizua. Hala ere, lehiaketa saio magistralekin eta ginkana batekin osatu dute, "giro ederrean".
Jolasteko, gozatzeko, lehiatzeko, ikasteko, irakasteko, kirola egiteko, elkartzeko, elkartasunerako… denetarako garraiobidea izan daiteke bizikleta. Eta hori erakutsi dute gaur Bermeon. Txirrinduek hartu dute Bermeoko Burujabetasun zelaia, Serrats Aldapa Xtremen lehiaketaren aitzakipean. Hirugarren urtez antolatu dute lasterketa, baina, aurten lehenengoz, Urdaibike azokan ere bildu dira zelaira bertaratu direnak, goiz-erguerdi osoko esperientzian elkartuz.
Guztira 295 txirrindularik parte hartu dute lehiaketan, bi ibilbidetan banatuta. Alde batetik, 75 kilometroko eta 2.700 metroko desnibeleko ibilbidea osatu dute batzuek, eta, beste alde batetik, 35 kilometroko eta 1.200 metroko desnibela duenari aurre egin diote beste batzuek. Hain zuzen ere, lasterketa luzea egin dutenetako batzuk Euskadiko Txapelketa lehiatu dute.
Hala, “Infernu berdea” izeneko zirkuitua osatu dute lasterketariek, kosta inguruko orografia berdea delako, baina zaila ere bai. Izan ere, Serrats Aldapa Xtremen lehenengo aldiko ibilbidera bueltatu dira, zirkuitu zirkular bat osatuz. Besteren artean, Sollube, Katillotxu, Garbola eta Burgoa zeharkatu dituzte.
Eta, lasterketa luzeko helmuga zeharkatzen lehena izan da Julen Zubero, lau ordu 8 minuto eta 59 segundoko denboragaz. Gainera, lasterketa irabazita, Euskadiko XCM Txapelketa ere bereganatu du txirrindulariak. Koldo Herrera izan da lasterketa luzean bigarrena, eta Iñaki Villalainek osatu du podiuma.
Hirugarren urtez antolatu dute lehiaketa, eta hirugarrenez parte hartu du Zuberok, lehenengoan bezala, garaikurra eskuratuz. Lasterketa “ederra” izan dela onartu du helmuga zeharkatu berritan: “Lasterketa polita izan da, mendia lehor egon da eta horrek lagundu du abiadura hartzen, azkarrago ibiltzen. Igoerak denetarikoak egon dira, gogorrak zein azkar joatekoak, eta jaitsierak nahiko teknikoak ziren.Hala ere, jendeak gozatu du”.
Lehiaketa abiatu aurretik ez zuen sprintean amaitu gura, eta, ondorioz, azken 10 kilometro falta zirenean erasotu du: “Hasiera batean denon artean ibili gara lehiatzen, baina kilometroek aurrera egin ahala, Sollubera ailegatzean, banatzen hasi gara, eta lau korrikalari inguru geratu gara azken tarteari aurre egiteko. Azkenean lortu dut azkarrena izatea”.
Lasterketa irabazi du, baina baita Euskadiko XCM Txapelketa ere. “Badirudi erraza dela Euskadiko XCM Txapelketak irabazteak, baina oso zaila da eta helburu polita izan da. Lasterketak irabaztea zaila bada, are gehiago txapelketa bat eskuratzea. Niretzat berezia da oso, ze urteak daramatzat saiatzen, ia-ia lortzen, eta azkenean lortu dut. Aurten niri tokatu zait, eta ospatzeko gogotsu nago”, onartu du txirrindulariak.
Profesionala izandakoa da, baina dioenez, ez da lasterketa asko irabaztekoa. “Ez naiz lasterketa asko irabaztekoa, baina horrelako lasterketa gazteetan parte hartzea gustatzen zait, horiei bultzada emateko asmoz. Aukera eman behar zaie, eta hobetzeko gomendioak ere eman. Aurrerapausoak ematen ari den lasterketa bat da, eta ederra da etortzea”.
Herrerak 22 urtegaz lortu du bigarren postua, bi beteranoen artean ailegatu baita. Hala ere, gazteak ere badabiltzala dio: “Beti dago norbera baino hobeto dabilen norbait. Polita izan da lasterketa, lehiatzea. Pozik nago bigarren postua eskuratu izanagaz”. Villalainek, bere aldetik, azpimarratu du lasterketa urtetik urtera hoberantz doala, eta berriro hurbiltzeko asmoa ere badaukala.
Lasterketako sailkapenaz gain, bestelako saikapen desberdinei erreparatuta, eliteko podiumean Zubero izan da lehena, Villalain bigarrena eta Julen Latorre, aldiz, hirugarrena. 23 urtez azpikoetan, berriz, Herrerak irabazi du, eta haren atzetik sailkatu dira Jokin Azkarai eta Ugaitz Arrieta. Master kategorietan, Master 30ean Iñaki Garrok irabazi du, eta Igor Garciak Master 40an.
Etxean, etxekoa irabazle.
Lasterketa laburrean, aldiz, bideak ondo ezagutzen zituen Aitor Ispizua ailegatu da lehen postuan, bi ordu, 25 minuto eta 59 segundoko denboragaz. Josu Velez izan da bigarrena, 2 ordu, 27 minuto eta 49 segundoko markagaz, eta Andoni Ispizua izan da hirugarrena, 2 ordu, 32 minuto eta 4 segundoko denboragaz.
Ispizuak herrian irabaztea “ederra” dela aitortu du, iaz laugarrena izan zela eta lehen aldian azken jaitsieran zulatua izan zuela gogoratuta: “Aurten lortu dugu, hirugarrenean, eta oso pozik nago”. Bideari dagokionez, “ondo seinaleztatuta, lehor eta arin joateko moduan” egon dela onartu du, jaitsiera teknikoak gustatu zaizkiola esanez. “Burgoako partea ere ondo markatuta egon da, egoera oso onean”, gehitu du.
Velezek, aldiz, lasterketaren “gogortasuna” azpimarratu du, baita egin duen “bero handia” ere. “Aitor oso azkarra izan da, bidea ondo ezagutzen zuen; makina bat da”, esan du. Eta, bere aldetik, hirugarrena izan den Ispizuak ere onartu du bideak ezagutzeak asko lagundu diola.
Lehiaketa baino askoz gehiago.
Lasterketak lehiatzeko baino askoz gehiagorako eguna izan da gaurkoa. Izan ere, kirola bizikleta bidezko jolasekin uztartu dute, baita kirol hori maite duten horientzako interesgarriak izan daitezkeen ikastaroekin ere. Izan ere, mekanikako saio magistrala eskaini dute Bizkaiko Txirrindularitza Federazioko kideek, eta zulatuak nola konpontzen diren adi-adi ikasi dute bertaratu diren etxeko txikienek zein nagusienek. Gainera, bizikletako katea ateratzen denean zer egin behar duten azaldu diete, eta praktikara ere eroan dute.
Saio praktiko hori denetariko probak zituen ginkana eder batekin osatu dute, eta bueltaka eta bueltaka ibili dira gaztetxoak, proba guztietan ondo pasatzeko asmoz. Euren trebetasuna agerian utzi dute hainbatek, ginkanako proba horiek saltoekin edota bestelako abileziak trukoekin uztartuz.
Pintxo solidarioa ere eduki dute parte hartzaile zein ikusleek aukeran, Serratsen eskutik, eta batzeb den diru guztia Aspanovasera bideratuko dute. Aspanovas minbizia duten haur eta nerabeen gurasoen Bizkaiko elkartea da, asistentziaren eta osasunaren arloan zeuden beharrei eta gabeziei erantzuteko sortu zena. Euren lana da adingabeen eta haien familien egoera medikoa, psikologikoa, asistentziala, hezkuntzakoa eta aisialdikoa hobetzea, “gaixotasunaren prozesu osoan dituzten beharrak kontutan hartuta”, eta zeregin horretan laguntzea bilatu dute, gaur, pintxo solidarioekin.
