Erronka berriei aurre egiten jarraitzeko prest
Hilabete luzez egindako lana kalera aterako du Arrain Azoka Elkarteak asteburuan, "ahal den neurrian" egoera berrietara egokitzen dakitela erakusteko gogoz.
Urteko astebururik berezienetakoa iritsi zaie bermeotarrei, eta hilabete luzez egindako lana plazaratzeko ordua, berriz, Arrain Azoka Elkarteari. Azokaren 31. aldia izango da aurtengoa, eta elkarteak 30 urte bete ditu antolakuntza eta kudeaketa zereginetan. Izan ere, Arrain Azoka Elkartea “formalki” azokaren bigarren urtean sortu zen, baina “partaideak berdinak izan dira denboran zehar, sorreratik”,
Elkartea bi helburu nagusigaz eratu zuten. Batetik, Bermeoko Arrain Azoka bezalako ekintza bat aurrera eraman ahal izateko “fundamentu juridikoa izateko”; bestetik, arrantza sektoreak “topagune bat izateko”. “Arrain Azokagaz hasi ginenean bakoitza bere kabuz ibiltzen zen, eta enpresak askoz sakabanatuago egon ziren euren arteko harremanetan”, azaldu du Bego Gangoiti azokaren proiektuaren sortzaileak. Elkartearen sorreraz geroztik, baina, elkartekideen arteko harremanak “pertsonalagoak” bihurtu dira, eta horrek eragina izan du enpresetan ere, harremanak “estutu” egin direlako.
Hasieratik buru-belarri lanean aritu da Gangoiti, baina urteetan zehar elkartekideak aldatzen joan direla antzeman du, “belaunaldi berriak” sartu direlako: “31 urte pasatu direnez, gaur egungo elkartekideak beste belaunaldi batekoak dira; enpresekin elkarlanean hasi ginenean zeuden eta gaur dauden ordezkariak ezberdinak dira, batzuk aurrekoen seme-alabak dira, baina, orokorrean, beste belaunaldi bat da”.
Nahiz eta urteek aurrera egin, elkartearen lanerako moduak “berbera” izaten jarraitzen du, eta elkartekide berriak lanerako gogoz datozela nabarmendu du: “Jendea beti dator ilusioagaz, ekarpenak egin eta gauzak aurrera eramateko gogoz”.
Etengabe egokituz.
1994an egin zuten lehenengo Arrain Azoka, eta geroztik, hamaika egoera edo testuingurutara moldatu behar izan dira, “garai berrietara egokitzeko”. Hasiera batean, enpresen topagune izatera bideratuta zegoen, eta gerora, gastronomiara egin dute salto.
“Urte batetik bestera ez da eboluzioa ikusten, baina hiruzpalau urtero bai ikusten dira aldaketa handiak azokan; guk behintzat horrela nabaritzen dugu”, nabarmendu du Gangoitik. Horren zergatia aztertzean, azoka eta elkartea “finkoak ez izatean” jarri du fokua: “Egoera berrietara egokitzen goaz, eta gurekin batera azoka, ahal den neurrian eta ditugun gaitasunekin”.
Testuinguru ezberdinetara egokitze horretan, aurten Euskaraldiagaz bat egingo du Arrain Azokak, eta Gangoitik “ezinbestekotzat” hartu du bat egite hori: “Euskaraldiagaz batera tokatzen zaigu aurten Arrain Azoka, eta nola ez, ezinbestekoa da herri euskaldun batean, itsaso euskaldun batean ere hori kontutan hartzea”. Euskaraldiagaz lotuta, Bermeoko eta itsasoko hizkera zabaltzeko “saiakera oso polita” egin du elkarteak, sare sozialetan zabaldu dituzten hiru bideoren bitartez. Ikus-entzunezkoek “erantzun bikaina” izan dutela nabarmendu du, bideoekin kartela osatuz joan direla azaltzeagaz batera.
Egokitzeak, gainera, “erronka berriak” dakartzala azpimarratu du: “Ez dira berdinak hasiera batean genituen erronkak edota gaur egun ditugunak, zentzu horretan alde nabarmena dago”. Gangoitik, Arrain Azoka Elkarteak urtero erronka berriak izaten dituela azpimarratu du, “urtero zeozer berria, zeozer gehiago” eskatzen diotelako, bai elkarteari, bai azokari.
Izan ere, azoka “guztiz errotuta” dago Bermeon, bai herritarren artean, bai sektoreko kideen artean, eta oro har, gizartean: “Jendea beti egoten da ea nobedaderik dagoen ikusteko zain, data noiz iritsiko itxaroten… Hori aberasgarria a guretzat ere, antolakuntzari begira”.
Era berean, aurtengo Hegaluze Saria “itsasoko emakumeei lotuta” egongo dela nabarmendu du: “Itsasoko emakumea oso zentzu zabalean hartuta, gainera; armadoreak, neskatilak, sareginak, hornitzaileak, hornitzaile teknologikoak, zientzialariak, arrain saltzaileak… Ziur asko faltako zaizkigula, baina ikuspuntu zabala eskaini nahi genuen”.
EGITARAUA:
GAUR (MAIATZAK 16)
- 09:00-11:00. Nautika eskolako nabigazio simulagailua ikusteko bisita.
- 09:30-11:30. Arrain Azoka Pro enpresen topaketa, Arrantzaleen Museoan: Jasangarritasuna lehiakortasuna galdu barik.
- 11:00-12:00. Arroyabe arrain kontserba lantegira bisita, doan. Erreserbak aurretiaz turismo bulegoan egin behar dira. Bermibusa 10:15 eta 11:15ean irtengo da Lamerako geltokitik eta kiroldegiko geltokian jaitsi beharko da.
- 12:00. Arrain Azokari harrera eta hasiera ofiziala. Hegaluze Saria emango dute Lamerako karpa handian.
- 12:45. Camus enpresaren aurkezpena, Gune Gastronomikoaren baitan.
- 13:00-17:00. Gune solidarioan atuna marmitakoan edo erreta jateko aukera izango da.
- 17:30. Umeentzako Bermeo Tuna Dastaketa: Tunido desberdinak ezagutzen, Gune Gastronomikoaren baitan. Sarrera aurretiaz erosi behar dela aurreratu dute. Turismo bulegoan 5 eurotan eros daiteke.
- 18:00. Arrain Azoka pintxo lehiaketa: profesionalen eta amateurren finala, Gune Gastronomikoaren baitan.
- 18:00. 6-12 urte bitarteko umeekin irteera laburrak belaontzietan, Galerna Belaontzi elkartearen eskutik.
- 19:00. Pilota partida nagusiak, Artza frontoian. IV. Bermeo Hiria-Inpesca pilota jaialdia. Urrutikoetxeari Bermeoren Agurra.
- 19:00-21:00. Gune solidarioan atuna marmitakoan edo erreta jateko aukera izango da.
- 20:00. Alkartasuna Dantza Taldea eta Joxepa Kale-Kale taldea, Lameran.
- 21:00. Larrain dantza herrikoia, Portuzarran.
- 20:00. Kanta Kanta Lorue taldearekin abesten, Alde Zaharrean, Lameran eta Portuzarran.
BIHAR (MAIATZAK 17):
- 10:00. Batelen estropada: X. Arrain Azoka Bandera.
- 10:00-13:00. Nautika eskolako nabigazio simulagailua ikusteko bisita eta korapiloak egiteko tailerra.
- 10:00-15:00. Bisita gidatuak Ortube atunontzian.
- 10:30-14:30. Umeentzako Izan arrantzale tailerra, Kofradia Itsas-Etxea taldearen eskutik.
- 11:15-11:40. Kostako enpresaren aurkezpena, Gune Gastronomikoaren baitan.
- 11:45-12:10. Umeentzako Bermeo Tuna Dastaketa: Tunido desberdinak ezagutzen, Gune Gastronomikoaren baitan. Sarrera aurretiaz erosi behar da turismo bulegoan, 5 eurotan.
- 12:20-13:00. Nagusientzako Bermeo Tuna Dastaketa: Tunido desberdinak ezagutzen, Gune Gastronomikoaren baitan. Sarrera aurretiaz erosi behar da turismo bulegoan, 10 eurotan.
- 12:00. Kalejira Musika Eskolako Kankinkabara, kantari txikiak eta Arrekatxutxa taldeekin, Lameran eta Portuzarran.
- 12:00. KIETB erraldoi txikien konpartsaren kalejira, Ordiziako erraldoiekin eta Gasteizko Arai Bere Aitona-Amonekin batera, Alde Zaharretik, Portuzarratik eta Lameratik.
- 13:00-21:00. Gune solidarioan atuna marmitakoan edo erreta jateko aukera izango da.
- 20:00. Frontoian Euskal kanta herrikoiak: Joxepa Kale-Kale taldearekin eta Ross akademiaren dantzekin. Sarrera doan, Radio Nervionen eskutik.
ETZI (MAIATZAK 18)
- 11:15. Juan Antonio Apraizen Koiote aurkezpena: Gure arrantza itsasotik mahai- dxera, Gune Gastronomikoaren baitan.
- 12:00. TI. Arrain Azoka Jai Alai Artza Frontoian. Bermeoko Zesta Punta Eskolak antolatuta.
- 12:30. Bermeoko erraldoiak, Lameran eta Portuzarran.
- 12:30. Erroxapeko Martxa ibiliko da Lamera eta Portuzarra girotzen.
- 13:00. Bermeoko Erraldoien Konpartsaren sari banaketa.
- 13:00-16:00. Gune solidarioan atuna marmitakoan edo erreta jateko aukera.
