Urregorrizko garaipena, euskal derbian
Gernika Rugby Taldeak 49 eta 15 irabazi du CMO Hernaniren kontrako euskal derbia. Aste honetan, partidu garrantzitsua jokatuko dute Madrilen, A.D. Ingenieros Industriales Las Rozas kontra, hurrengoan berriro etxean jokatu orduko. Basurdeak Elite Multzoaren bigarren postua lortzeko borrokan ari dira.
Argazkia: Gernika Rugby Taldea. Gernika Rugby Taldea denboraldiaren aldirik esanguratsuenean dago. Ohozko B Mailaren Elite Multzora sailkatuta, urteko lehen helburu nagusia bete zuten basurdeek; orain, multzo horretako play-offetara sailkatzea daukate ortzimugan. Atzo [martxoak 30], euskal derbia jokatu zuten Urbietan, etxeko jarraitzaileen aurrean eta CMO Hernani taldearen kontra. Partidu gogorra baina aparta jokatuta, merezimendu osoz gailendu ziren basurdeak: 49 eta 15.
Taldetik adierazi dutenez, markagailua ez da partiduan gertatutakoen “isla argia”: “Ustez garaipen erraz askoa lortu genuela dirudien arren, hasieran norgehiagokari neurria hartzea asko kostatu zitzaigun; partidu lehiatua eta fisikoa izan zen lehen segundotik”. Hain zuzen ere, gipuzkoarrek maila handia ezarri zioten neurketari, hasiera txistuak jo bezain pronto. Denboraldiko azken hitzorduak jokatzen egonda ere, “hasieratik kontzentratuta” egoteko gaitasuna erakutsi zuen etxeko taldeak, batez ere, lehen 20 minutu gaitzetan: “Baloiaren jabetza beraiek eduki zuten tarte horretan, eta guri defentsa sendoa antolatzea egokitu zitzaigun; presioa erraldoia izan zen, baina solidaritate handia bistaratu genuen defendatzerakoan”.
Baloiaren jabetza gipuzkoarren aldekoa izan zen hasieran, eta basurdeei defentsa sendoa eraikitzea tokatu zitzaien
0 eta 5 atzetik abiatu arren, 3 eta 5ekoa lortu zuten etxekoek. Baloiaren jabetzaren gehiengoa hernaniarrena izanda ere, markagailuak ez zuen argiki beren alde egiten. Ez hori bakarrik: lehen zatiaren hondarrean, Gernika RTk aldeko emaitzagaz amaitzea lortu zuen, 15 eta 8koagaz. Bigarren zatian, tentsioak ez zuen behera egin, eta gernika-lumotarrek aldaketekin “asmatu” egin zuten. Jokoari zegokionez, gora eta gora besterik ez zuten egin, bereziki, fase estatikoen kontrolari esker: basurdeak uztartzeetan eta alboko sakeetan jaun eta jabe izan ziren. Horrek ahalbidetu zien erasora jo ahal izatea eta baloiaren jabetza edukitzea, defensa beharretara mugatu ordez. Joko eraginkorraren uzta jaso ahal izan zuten, azkenean: 49 eta 15 nagusitu ziren, aurkari sendo baten aurkakoan.
Era berean, taldetik adierazi dute etxeko ikusleen berotasuna “zutabe” izan zela: “Paella janaldia antolatu genuen, giroa sortze aldera; ederto funtzionatu zuen, eta jarraitzaileak zein taldea uneoro eskutik joan ziren partiduan zehar”. Gainera, lantaldearen kide modura bere ibilbidea burututako Gotzon Lauzirika mediku eta fisioterapeuta gernika-lumotarrari “merezitako omenaldia” egin zioten. Hala, jardunaldiaren balorazio “ezin hobea” egin du Gernika RTk.
A.D. Ingenieros Industriales Las Rozas gernika-lumotarren ostean sailkaturik dago, lau puntu gutxiagogaz
Gauza asko erabakitzeke.
Atsedenerako tarterik gabe, asteon hurrengo partidua jokatu beharko dute basurdeek. Iragan domekako garaipenak Elite Multzoko bigarren posturaino (17 puntugaz) hauspotu baldin baditu, postu hori defendatzea dagokie orain. Domekan [apirilak 6], A.D. Ingenieros Industriales Las Rozas talde madrildarra, taulako hirugarrena (13 puntu), izango dute arerio, etxetik kanpo.
Neurketa horrek erabakiko du, funtsean, taldeak play-offak multzoko zein postutan jokatuko dituen. “Sailkapena ia-ia ziurtatuta dugu, baina taldeak bigarren postuan sailkatzeko jomuga dauka, eta horretarako behar egingo dugu”, argitu dute. Partidu “oso gogorra” aurreikusten dute: “Maila honetan, asko igartzen da etxetik kanpo jokatzeak duen zailtasuna: atsedenaren kalitateari eragiten dio; autobusez bidaia egin beharra dago; eta, gainera, madrildarren zelaigunea belar artifizialduna edo sintetikoa da, geure ez bezala”.
Hurrengo astean, oraindik partidurik irabazi ez duen RC L’Hospitalet hartuko dute Urbietan
Play-offetan, lehen sailkatuak laugarrenaren kontra jokatuko du, eta bigarrenak hirugarrenaren aurka, hurrenez hurren, lehenengoaren eta bigarrenaren zelaietan. Gaur-gaurkoz, CR Liceo Frances taldeak gainditzen ezinezkoa dirudi: 23 puntu ditu patrikan, eta egun arte ez du inongo pitzadurarik agertu. Gainontzeko taldeen artean, baina, “lehia handia” egon daiteke. Aipatutako Industriales taldeaz gain, Club de Rugby Sant Cugat kataluniarra ez dago urrun, eta Pasek Belenos asturiarra “behetik gora” egiten ari da. Industrialesen kontrako neurketaren ondoren, Urbietara bueltatuko da lehiaketa: domekan [apirilak 13], 12.30ean, oraindik multzoko partidurik irabazi ez duen RC L’Hospitalet taldea hartuko dute etxean. “Asteon egin dezakegunaz harago, bigarren neurketa hori irabaziz gero, bigarren postua ia ziurtatuta genuke”.
