Egilearen begiradatik ezagutuko dute obra
Gernika-Lumoko Euskal Herria Museoko 'Hitzen Bila' erakusketan modu intimoan ezagutzeko aukera egongo da eguenean Sonia Rueda sortzailearen eskutik. Aurretiaz izena eman behar da.
Eguenean, hilaren 3an, Hitzen Bila erakusketan modu intimoan eta gertukoan murgiltzeko aukera egongo da Gernika-Lumoko Euskal Herria museoan: doako bisita gidatua egingo dute, erakusketaren sortzaile Sonia Ruedaren eskutik, 18:00retan.
Beraz, artistaren lana era sakonagoan ulertzeko nahiaz hitz egingo dute Ruedak berak gidatuko duen bisita berezi batean: “Ez dira faltako ikusputnu pertsonal eta intimoa”. Hala, perspektiba hori ezagutu gura dutenek nahitaez izena eman beharko dute parte hartzeko, eta bi bidetatik egin daiteke hori: batetik, 94-625 54 51 telefono zenbakira deituta; bestetik, euskalherriamuseoa@bizkaia.eus helbide elektronikora mezua idatzita.
Apirilaren 27ra bitartean museoan ikusgai egongo da aipatutako erakusketa, baina bisita gidatuak are gehiago hurreratuko du bertaratzen dena. Barakadoztarrak Hitz Politakizeneko bere liburuan oinarrituta ondu du proiektua, eta beregan “hizkuntzarekiko interes handia eta irudi ugari” pizten dituzten euskararen terminoak bildu ditu. Funtsean, 50 obra bisual eta hiru poema uztartzen ditu; olerkiak Miren Agur Meabe lekeitiarrak idatziak dira.
Erakusketak paisaia batean egituratuta dagoen irudi sorta biltzen du, hitzetan oinarrituta: “Maite ditugunak eta gorroto ditugunak”. Era berean, hiru ardatzetan banaturik dago irudi sorta: Hodeiak, Eraikuntzak eta Sustraiak. Hori horrela, “unibertso bat” jorratu du Ruedak: “Giza nahiak, ingurunearen eta gizabanakoaren arteko erlazioa eta lur bateko kide izatearen zentzua aztertzen ditu”. Ibilbide autobiografikotzat du erakusketa egileak eta, “ikusleak esperientzia unibertsal batean murgiltzea” du helburu.
