Bizkaigane utzarazteko eskaera geldiarazteko eskatu du EHNE Bizkaiak
EHNE Bizkaiak Bizkaigane Elkartearen instalazioak kudeatzen dituen Txapel Koop kooperatibaren aurka egindako utzarazte eskaera geldiarazteko eskatu du. Nekazaritza sindikatuak Bizkaigane proiektuari babesa emateko elkarretaratzea deitu du eguenerako Gernikako epaitegiaren aurrean.
Bizkaigane Elkartearen instalazioak kudeatzen dituen Txapel Koop kooperatibak bere aurkako kaleratze salaketa jaso du, eta kooperatibakoek zein EHNE Bizkaia nekazaritza sindikatuak Bizkaigane utzarazteko eskaera geldiarazteko eskatu dute. Bihar (martxoak 27) ebazten da kaleratzeko eskaera Gernika-Lumoko epaitegian, eta sindikatuak elkarretaratzea deitu du: 11:15ean epaitegiaren aurrean jarri du hitzordua, eta herritarrei elkarretaratzean parte hartzeko deia egin die.
Instalazioen titulartasuna “ez da eztabaidagarria” sindikatuaren arabera, Bizkaiganeren jarduerak hala erakusten duelako. Eta, elkartekoek zein kooperatibakoek ere gogor salatu dute euren aurka epaitegian jarritako kaleratze salaketa: “Argi esan nahi dugu bertan dauden eraikinak duela 40 urte baino gehiago, eta orduko jabeen oniritzi eta onespenez eraiki eta eraberritu zirela. Ordutik, elikadura burujabetza bultzatzen eta sustatzen dihardugu, abereak eta lurra zainduz, jendarteari elikagai osasuntsu eta ekologikoak eskainiz”.
Bizkaigane azken berrogei urteetan eraiki dute, eta ustiategian bertan ekoitzitako elikagaiak eraldatzera bideratuta dago, abeltzaintza jarduera dibertsifikatu baten bidez (esnetarako eta haragitarako behiak, ardiak, txerriak). Gaur egun, txerri ekoizpena eta haragia eraldatzeko instalazioak dituzte bertan, “legearen barruan eta baimen guztiekin eraikiak”, administrazio eskakizunak betez: “Inbertsio pertsonal eta ekonomiko handia egin dugu. Eraikinak katastroan ere Bizkaigane elkartearen izenean daude eta Bizkaiganerenak dira”.
Elkartetik salatu dutenez, jasotako salaketa hau ez da euren proiektuaren aurka botatako lehen harria: “Sabotaiak, lapurretak, mehatxuak, langileen kontrako erasoak, animalien kontrako erasoak, salaketa faltsuak eta katastroko jabetza aldatzeko saiakerak ere egon dira tartean”. Diotenez, batzuek familiako gatazka modura kokatu gura dute hori guztia, baina hori “baino gehiago” dela salatu dute elkartekoek: “Nekazal proiektu baten aurkako jazarpen gogorra da hau guztia, baita bertako langile guztien aurkakoa ere”.
Horregatik, EHNE Bizkaiak kaleratze eskaera gelditzeko eta inplikatutako alderdi guztiei “irtenbide egoki bat” bilatzeko eskatu diete, “Bizkaiganeren ekoizpen jarduera bermatzeko premisagaz”. Hala ere, elkartetik esan dutenez, salatzaileen aldetik ez da egon “inolako nahirik” kontu hau beste era batera konpontzeko, “ez eta bestelako akordio batzuk bilatzeko”.
EHNE Bizkaiak gehitu du nekazaritza sektoreak ezin duela arriskuan jarri horrelako proiektu bat, elikagai ekoizpen iraunkor eta hurbileko zirkuituen bidez merkaturatutako baten adierazle argia dena. “Proiektu honek tokiko elikadura sistemak garatzeko osagai guztiak biltzen ditu, baita nekazaritza jarduerari jarraipena ematea ahalbidetzen duen belaunaldi erreleboa aktibatzea ere”, arrazoitu dute sindikatukoek. Hala, elikadura burujabetza Bizkaigane bezalako proiektuen garapenare eta defentsaren menpe dagoela uste dutenez, horren alde elkarretaratzean biltzeko deia egin dute.
