Gatiburen 'Azken zoramena' kontzertua San Kristobaleko aparkalekura lekualdatu dute
Astrako aparkalekua "txiki" geratu delako hartu dute erabakia Gatibuk eta Haziberrik. San Kristobaleko aparkalekuak 10.000 lagunentzako edukiera dauka, eta, beraz, sarrera gehiago jarri dituzte eskuragarri.
Haimar Arejita eta Alex Sardui Gatibuko kidea San Kristobaleko aparkalekuan. Haziberri Abenduan iragarri zuten Gatibuk eta Haziberrik Azken Zoramena kontzertua, taldeak agur esango duen urte honetan sorterrian emango duen azken emanaldi “berezia”. Astrako aparkalekua hautatu zuten horretarako gune, baina deialdiak izan duen erantzuna ikusita, eta Astrako aparkalekua “txiki” geratu dela jakitun, emanaldia lekualdatu dute: San Kristobaleko aparkalekuak hartuko du orain, azken kontzertua.
Aparkaleku berriak “espazio handiagoa, erosoagoa eta seguruagoa” dauka, baita 10.000 lagunentzako edukiera ere. Hala, sarrera gehiago jarri dituzte eskuragarri, www.haziberri.eus atarian zein Gernikako Turismo Bulegoan.
Gainera, esan dute datozen asteetan kontzertuaren kartela osatuko duten musika taldeak iragarriko dituztela, izan ere, festa arratsaldean hasiko da.
Gatibukoek “ez zuten inolaz ere espero” kontzertuak izan duen erantzuna, eta garrantzitsua da eurentzat, izan ere, Gatiburentzat kontzertu horrek garrantzia berezia dauka. Orain dela 25 urte udalerrian sortu zuten taldea, eta etxean eskainiko duten azken kontzertuak esangura berezia dauka: Gernikak Gatiburi emandakoa eta Gatibuk Gernikari eskainitakoa islatuko dute. Hala, Gatiburen sustraietara joz, errepertorio eta izaera propioa izango duen kontzertu “kañeroa” osatuko dutela iragarri dute. “Ekainaren 7an elkarrekin zoratuko gara”.
San Kristobaleko aparkalekua.Haziberri
