"B planera" pasatu dira Berbalagunak
Gernika-Lumoko Berbalagunek herriaren inguruko tokiez gozatzeko eta euskaraz hitz egiteko ibilbidea prest zuten zapaturako (martxoak 22), baina eguraldia ez zuten aldeko izan. Hala ere, ibilbidea laburtu, "b planera" igaro, eta aurrera egin zuten bertaratutako 28 lagunek.
Argazkia: Gernika-Lumoko Berbalagun. Gernika-Lumoko Berbalagunek irteera zuten aurreikusita zapaturako. Nahiz eta eguraldiagatik “b planera” igaro behar izan zuten, euriari aurre egin zioten: “Eguraldia aldaketa arratsalderako iragarrita, eta goiz epela zela ikusirik, arropa fresko eta euritakorik gabe elkartu ginen 28 Berbalagun kide. Bederatziretako kanpai-hotsekin batera, Lumoranzko bidea hartu genuen, eta “Cuatro bancos” errebuelta ezagunean, eskumarako aldapa gogorrari ekin genion. Zelako hasiera, hau berotua! Behin Bastegietara iritsitakoan, Berbalaguneko oroigarria dagoen gailurreraino jarraitu genuen; Ganagara, alegia. Halere, ordurako lehen euri-tantak hasi zitzaizkigun, eta hotza ere nabari zen hainbat kideren aurpegietan”.
Eguraldiak hobera egingo ez zuela ikusita ekin zioten bigarren aukerari. Hain zuzen ere, ibilbidea laburtzea erabaki zutela nabarmendu dute. “Maiaga azpitik inguratu, Madalen auzoa gurutzatu eta Amilaga auzoraino jaitsi ginen errepidetik. Azkenik, Errigoitiko bidea Zallo parean zeharkatu, eta Pago errekaren ertzetik Gernika-Lumora iritsi ginen”, gaineratu dute antolatzaileek.
Gauzak horrela, nahiz eta “aurreikusitako ibilbidea baino motzagoa” egin, Gernika-Lumoko eta inguruko bidezidorrez eta auzoez gozatzeko aukera izan zuten, ohi legez, euskarazko solasaldiak izatearekin batera. Alegia, “balorazio positiboa” egin dute Berbalagunek, eta gerturatutakoei eskerrak eman dizkiote.
