Neguko laugarren landaketa, Ordorikako kontserbazioko basoa bultzatzen jarraitzeko
Urretxindorra eskola komunitateak 200 landare landatu zituen domekan [martxoak 16], BaSOS elkarteak Ordorikan erositako lur-eremuan.
Argazkia: BaSOS Busturialdeko lursail bat erosi eta bertoko basoa hazi. Helburu argi horrekin jarri zuen martxan BaSOS elkarteak crowfunding kanpaina bat 2023an. Hasieran aurreikusitako erosketa posible izan ez zen arren, elkartekideek lanean jarraitu eta iaz, azaroan, sei hektareako lursail bat erosi zuten, Muxikan. Geroztik, baso landaketarako deialdiak egin dituzte; lehenengoa auzolanean egin zuten, bigarrena Allende Salazar ikastetxeko ikasle eta familiekin eta hirugarrena Barrutia eta Barrutialdeko komunitatearekin. Laugarrena domekan egin zuten, eta «berezia» izan zen, Muxikako Urretxindorra eskolako ikasle, familia eta langileekin batera egin zutelako.
Bezperan «negu gorria» somatu bazuten ere, landaketagaz bat egin zuten 15 muxikarrek eguzki izpiekin hasi zuten eguna: “Fresko bai, baina hotz handiegirik gabe. Eguraldi eskas samar honek goiz guztian zehar iraun zuen, eta asko eskertu genuen”, azaldu dute elkartekideek.
Argazkiak: BaSOS
Hala, katiuska eta eskularruak jantzi, eta aitzurrak eta landareak lepoan hartuta, Ariatzako aparkalekutik abiatu ziren Ordorikako lur-eremura. Bertan, gaur egungo baso kudeaketa eredutik aldenduta, otsalizarrak, urkiak, gereziondoak, lizarrak eta haritzak landatu zituzten.
Goizean zehar “martxa politean” aritu ziren, eta hamaiketakoa jateko tartea ere izan zuten: “Martxa politean ibili ginen, hain politean non 200 landara inguru landatu genituen». Landaketa familia giroan gauzatu zutela nabarmendu dute antolatzaileek, bertan izan ziren ama eta seme baten elkarrizketa gogoratuz: «Ama batek bere seme txikiari halako zerbait esan zion, ‘etorkizunean, hau baso bat izango da eta orkatzak, azkonarrak eta beste hainbat animalia ibiliko dira bertotik, eta guk esango dogu, baso honen sorreran parte hartu genuela esango dugu’”.
Izan ere, kontserbazioko basua bultzatzeko bidean bakoitzak bere alea jarri zuen domekan, eta ale horiek batuta, guztiona den horren alde lanean dihardute elkartetik: “Eskerrik asko bihotzez hurbildu zineten guztioi”.
