Erdi Aroko Azoka: kolorez eta tradizioz betetako jai giroaz gozatzeko aukera
Martxoak 7tik 9ra, Gernika-Lumok Erdi Aroko Azoka hartuko du; 70 postu baino gehiago egongo dira ikusgai, bertako kaleak "Erdi Arorako bidaia izugarri batean" murgilduz.
Gernika-Lumok Erdi Aroko Azoka hartuko du bihartik (martxoak 7) domekara (martxoak 9), eta bertako kaleak “Erdi Arorako bidaia zirraragarri” batean murgilduko ditu, Gernikako Merkatari Elkartuen hitzetan. Edozein herritarrentzat “esperientzia ahaztezina” izango den ekitaldi honek jarduera, artisautza eta gastronomia ugari izango ditu, gainera. Aurreratu dutenez, halaber, hiru egunetan goizeko 10:00etatik gabeko 22:00etara bitartean egongo da azoka ikusgai foru herrian.
“Hiru egunez, kolorez eta tradizioz betetako jai giroaz gozatzeko aukera izango dute bisitariek”, nabarmendu dute antolatzaileek, oro har. Alegia, 70 postu baino gehiago eskainiko ditu herriak, “artisauek beren produktuak erakusteko”: bitxigintza eta zeramika, ehungintza eta Erdi Aroko tresnak izango dira, besteak beste, azokako protagonista. Gainera, lanbide tradizionalen zuzeneko erakustaldiak ere izango direla aurreratu dute, “bertaratzen direnek garai hartan erabiltzen ziren teknikei buruz gehiago jakiteko” helburupean.
Ekitaldiak kultur programazio zabala ere izango du, ohartarazi dutenez: Erdi Aroko musika eta dantza ikuskizunak, kale antzerkia eta haurrentzako jarduera interaktiboak izango dira horren erakusle argiak, hain zuzen. “Haurrek eskulan tailerretan eta jolas tradizionaletan parte hartzeko aukera izango dute, eta helduek, berriz, gastronomiaz gozatzeko aukera izango dute”, argitu dute, bere gain.
Herritarrei deia. Erdi Aroko Azokaren antolaketa Gernikako Udalaren, Gernikako Merkatari Elkartuaken eta Santiago Mendizaleak Bideen Elkartearen lankidetzari esker izan dela goraipatu dute, eta azoka, ondare historiko eta kulturala nabarmenduko duen ekitaldia eskaintzeko lan handiaren erantzuna dela azaldu dute. Hala, herritarrei dei egin diote, herriko kaleak hartzeko, eta azokaz gozatzeko: “Gure sustraiak eta tradizioak ospatzen dituen esperientzia paregabe honetan murgiltzera gonbidatzen zaituztegu, familian gozatzeko eta Gernika-Lumoren xarma deskubritzeko aukera ezin hobea baita”.
